બે મેચની અનઓફિશિયલ ટેસ્ટ સિરિઝની પહેલી મેચ ભારત અને સાઉથ આફ્રિકા A ટીમો વચ્ચે બેંગલુરુના BCCI સેન્ટર ઓફ એક્સેલન્સમાં રમાઈ રહી છે. ત્રીજા દિવસની રમતના અંતે મેચ ખૂબ જ રોમાંચક તબક્કામાં પહોંચી ગઈ હતી, જેમાં ભારતીય A ટીમને છેલ્લા દિવસની રમતમાં જીતવા માટે 156 રનની જરૂર છે, જ્યારે આફ્રિકન ટીમ 6 વિકેટ લેવા માટે નજર રાખી રહી છે.
રિષભ પંત બનશે જીતનો હીરો?
ત્રીજા દિવસની રમતના અંતે સ્ટાર વિકેટકીપર બેટ્સમેન રિષભ પંત, જે આ સિરિઝમાં ભારતીય A ટીમનું નેતૃત્વ કરી રહ્યો છે, અણનમ રહ્યો હતો અને હવે ચોથા દિવસની રમતમાં જીત સુનિશ્ચિત કરવાની સૌથી મોટી જવાબદારી તેના પર રહેશે. નવેમ્બરમાં ભારત અને સાઉથ આફ્રિકાની ટોચની ટીમો વચ્ચે 2 મેચની ટેસ્ટ સિરિઝ રમાશે.
તે પહેલાં બંને A ટીમો વચ્ચે સિરિઝ રમાશે, જેમાં ઘણા મુખ્ય ખેલાડીઓ હશે. આ સિરિઝમાં સૌથી અગ્રણી ખેલાડી રિષભ પંત છે, જે ઈંગ્લેન્ડ પ્રવાસ દરમિયાન થયેલી ઈજા બાદ મેદાનમાં પરત ફરી રહ્યા છે. જ્યારે પંતે આ મેચમાં વિકેટકીપિંગ દ્વારા પોતાની ફિટનેસ સાબિત કરી છે, ત્યારે હવે તેમની પાસે પોતાનું બેટિંગ ફોર્મ દર્શાવવાની એક સારી તક છે.
રિષભ પંતની પ્રથમ ઈનિંગ કેવી રહી?
રિષભ પંત આ મેચની પહેલી ઈનિંગમાં માત્ર 17 રન બનાવીને આઉટ થયો હતો, પરંતુ બીજી ઈનિંગમાં તેમની બેટિંગ કૌશલ્ય અત્યાર સુધી પ્રભાવશાળી રહ્યું છે, જ્યાં તેને 81 બોલનો સામનો કર્યો અને ત્રીજા દિવસની રમતના અંતે અણનમ 64 રન બનાવ્યા, જેમાં 8 ચોગ્ગા અને 2 છગ્ગા ફટકાર્યા છે. બધાની નજર તેના પર રહેશે કે શું પંત અંતિમ દિવસે તેમની કેપ્ટનશીપ હેઠળ ભારતીય A ટીમને વિજય તરફ દોરી જશે.
આ મેચમાં બોલ સાથે તનુષ કોટિયનનું શાનદાર પ્રદર્શન
ભારતીય A ટીમ સાઉથ આફ્રિકા A સામેની પહેલી અનઓફિશિયલ ટેસ્ટ મેચમાં ફક્ત 234 રનમાં ઓલઆઉટ થઈ ગઈ હતી. ત્યારબાદ રમતના ત્રીજા દિવસે ભારતની બોલિંગમાં ફરી એકવાર સ્પિનર તનુષ કોટિયનનું શાનદાર પ્રદર્શન જોવા મળ્યું, જેને બીજી ઈનિંગમાં સાઉથ આફ્રિકા Aને ફક્ત 199 રન પર રોકી રાખવામાં મુખ્ય ભૂમિકા ભજવી હતી. તનુષે મેચમાં કુલ 8 વિકેટ લીધી, દરેક ઈનિંગમાં 4 વિકેટ લીધી છે.
