ભારત અને ઈંગ્લેન્ડ વચ્ચે રમાઈ રહેલી પાંચ મેચની ટેસ્ટ સિરીઝની છેલ્લી મેચ ઓવલ મેદાન પર રમાઈ રહી છે. આ મેચમાં ટીમ ઈન્ડિયાના કેપ્ટન શુભમન ગિલ બેટિંગ કરતી વખતે મોટી ભૂલ કરતો જોવા મળ્યો, જેના કારણે ટીમ ઈન્ડિયાને મોટું નુકસાન સહન કરવું પડી શકે છે.
આ ટેસ્ટ મેચમાં ટીમ ઈન્ડિયા ટોસ હાર્યા બાદ પહેલા બેટિંગ કરવા ઉતરી હતી, જેમાં વરસાદને કારણે જ્યારે પહેલા સેશનની રમત બંધ થઈ ગઈ હતી, ત્યારે ત્યાં સુધીમાં ભારતીય ટીમે 2 વિકેટ ગુમાવીને 72 રન બનાવી લીધા હતા. તે સમયે કેપ્ટન ગિલ 15 રન બનાવીને રમી રહ્યો હતો. વરસાદ બંધ થયા પછી બીજા સેશનની શરૂઆત થતાં જ શુભમન ગિલે સારી શરૂઆત કરી હતી પરંતુ રન લેવાનો પ્રયાસ કરતી વખતે તેને પોતાની વિકેટ ગુમાવી દીધી હતી.
શુભમન ગિલે પોતાની ભૂલને કારણે ઈંગ્લેન્ડને વિકેટ ગિફ્ટમાં આપી
ટીમ ઈન્ડિયાની પહેલી ઈનિંગમાં જ્યારે 28મી ઓવર શરૂ થઈ ત્યારે ગુસ એટકિન્સન ઈંગ્લેન્ડ તરફથી બોલિંગ કરવા આવ્યો. શુભમન ગિલ આ ઓવરના પહેલા બોલ પર કોઈ રન બનાવી શક્યો નહીં. આ પછી તેને બીજો બોલ આગળની તરફ હળવો રમવાનો પ્રયાસ કર્યો અને રન લેવા દોડ્યો.
આ દરમિયાન ગુસ એટકિન્સન તરત જ બોલ તરફ દોડ્યો, તેને પકડી લીધો અને વિકેટ પર ફટકાર્યો. શુભમન ગિલ પિચથી બહાર અડધે સુધી આવી ગયો હતો, તેને ત્યાંથી પાછા જવાની કોઈ તક ન હતી. શુભમન ગિલ 35 બોલમાં 21 રન બનાવીને રન આઉટ થયો અને પછી પેવેલિયન પાછો ગયો. શુભમન ગિલ પણ આ રીતે આઉટ થયો પછી ખૂબ જ નિરાશ જોવા મળ્યો હતો.
શુભમન ગિલ પોતાની ટેસ્ટ કરિયરમાં બીજી વખત થયો રન આઉટ
અત્યાર સુધી પોતાના ટેસ્ટ કરિયરમાં 37 મેચ રમી ચૂકેલો શુભમન ગિલ બીજી વખત રન આઉટ થયો છે. શુભમન ગિલ આ પહેલા ગયા વર્ષે ઈંગ્લેન્ડ સામેની ઘરઆંગણેની ટેસ્ટ સિરીઝમાં રન આઉટ થયો હતો. ઈંગ્લેન્ડ સામેની આ ટેસ્ટ સિરીઝમાં પહેલીવાર 20 રનનો આંકડો પાર કર્યા બાદ શુભમન ગિલ પોતાની ઈનિંગ્સમાં સદી ફટકારી શક્યો નથી. આ પહેલા બધી ઈનિંગમાં જ્યારે પણ શુભમન ગિલે ઈંગ્લેન્ડ સામેના આ પ્રવાસમાં 20 રનનો આંકડો પાર કર્યો છે, ત્યારે તેના બેટમાંથી સદી જોવા મળી છે.
