IPL 2026માં ગુજરાત ટાઈટન્સ સામેની મેચમાં વિરાટ કોહલીએ 1 જ ઓવરમાં સતત 5 ચોગ્ગા ફટકારીને ઐતિહાસિક રેકોર્ડ બનાવ્યો છે. ટીમ ઇન્ડિયાના સ્ટાર ક્રિકેટર વિરાટની આ એકમાત્ર સિદ્ધિ નથી. IPLમાં વિરાટની વધુ એક સિદ્ધિ છે. ક્રિકેટના કિંગ કહેવાતા વિરાટ કોહલી ભારતીય ધરતી પર 8,000 IPL રન પૂર્ણ કરનાર વિશ્વનો પ્રથમ બેટ્સમેન બન્યો. ચિત્તા જેવી ઝડપથી દોડતા આ ખેલાડીએ સાબિત કર્યું છે કે તે ભારતીય ટીમનો જ નહીં દુનિયાનો શ્રેષ્ઠ બેટસમેન છે.
નરેન્દ્ર મોદી સ્ટેડિયમમાં વિરાટનો મોટો રેકોર્ડ
ગુરુવારે, અમદાવાદના નરેન્દ્ર મોદી સ્ટેડિયમમાં ગુજરાત ટાઇટન્સ સામે રમતી વખતે, કોહલીએ આઈપીએલમાં વધુ રન કરવાનો ઇતિહાસ રચ્યો. GT સામેની મેચ પહેલા વિરાટને 8000ના આ જાદુઈ આંકડા સુધી પહોંચવા માટે ફક્ત 12 રનની જરૂર હતી. ત્યારે કાગીસો રબાડાના બોલ પર ચોગ્ગાનો વરસાદ કરીને વિરાટે ઇનિંગની બીજી ઓવરમાં જ આ સિદ્ધિ હાંસલ કરી લીધી. 28 રનની તેની ટૂંકી પરંતુ આક્રમક ઇનિંગ દરમિયાન, કોહલીએ રબાડાની એક જ ઓવરમાં પાંચ બાઉન્ડ્રી ફટકારીને સનસનાટી મચાવી દીધી.
