કર્ણાટક અને જમ્મુ અને કાશ્મીર વચ્ચે 2025-26 રણજી ટ્રોફીની ફાઈનલ મેચ KSCA હુબલી ક્રિકેટ ગ્રાઉન્ડ પર રમાઈ રહી છે. મેચના ત્રીજા દિવસે જમ્મુ અને કાશ્મીરના ખેલાડીઓએ શાનદાર પ્રદર્શન કર્યું અને કર્ણાટકને પાછળ ધકેલી દીધું. ફાઈનલમાં જમ્મુ અને કાશ્મીરે પ્રથમ ઈનિંગમાં 584 રનનો વિશાળ સ્કોર બનાવ્યો અને પછી શાનદાર બોલિંગ પ્રદર્શન કર્યું.
આકિબ નબીએ શાનદાર બોલિંગ કરી અને 3 વિકેટ લીધી, જેના કારણે કર્ણાટક મુશ્કેલ સ્થિતિમાં મુકાઈ ગયું. ત્રીજા દિવસની રમતના અંત સુધીમાં કર્ણાટકનો સ્કોર 69 ઓવરમાં 5 વિકેટે 220 રન હતો, પરંતુ ટીમ હજુ પણ 364 રનથી પાછળ હતી. મુશ્કેલ પરિસ્થિતિઓમાં શાનદાર બેટિંગ કરતા મયંક અગ્રવાલે સદી ફટકારી અને 130 રન બનાવીને અણનમ રહ્યો. પરંતુ કેએલ રાહુલ ફ્લોપ સાબિત થયો.
જમ્મુ અને કાશ્મીરે પ્રથમ ઈનિંગમાં બનાવ્યા 584 રન
આ મેચમાં જમ્મુ અને કાશ્મીરે ટોસ જીતીને પહેલા બેટિંગ કરવાનો નિર્ણય લીધો. 2 દિવસથી વધુ સમય સુધી બેટિંગ કરતા તેઓએ 584 રનનો વિશાળ સ્કોર બનાવ્યો. જમ્મુ અને કાશ્મીર માટે શુભમ પુંડિરે 121 રનની શાનદાર સદી ફટકારી, જ્યારે અન્ય 5 બેટ્સમેનોએ અડધી સદી ફટકારી. ત્રીજા દિવસે જમ્મુ અને કાશ્મીરે 6 વિકેટે 527 રનથી રમત ફરી શરૂ કરી. પ્રસિદ્ધ કૃષ્ણાએ ટૂંક સમયમાં આબિદ મુશ્તાક અને પછી આકિબ નબીને આઉટ કરીને કર્ણાટકને રમતમાં પાછું લાવ્યું.
આ દરમિયાન સાહિલ લુથરાએ 72 રનની લડાયક ઈનિંગ રમી પરંતુ અંતે વિજયકુમાર વૈશાખ દ્વારા આઉટ થયો. યુદ્ધવીર સિંહ ચરકે અંતે ઝડપી 30 રન બનાવ્યા પરંતુ રન આઉટ થયો, જેના કારણે જમ્મુ અને કાશ્મીરની ઈનિંગ 584 પર સમાપ્ત થઈ ગઈ. કર્ણાટક માટે પ્રસિદ્ધ કૃષ્ણા સૌથી સફળ બોલર રહ્યા, તેને 5 વિકેટ લીધી.
મયંક અગ્રવાલે ફટકારી શાનદાર સદી
584 રનના જવાબમાં કર્ણાટકની શરૂઆત ખરાબ રહી. તેને માત્ર 57 રનમાં ચાર મુખ્ય વિકેટ ગુમાવી દીધી. 12મી ઓવરમાં આકિબ નબીએ સ્ટ્રાઈક કરીને કેએલ રાહુલને આઉટ કર્યો. રાહુલ માત્ર 13 રન બનાવી શક્યો. ત્રીજા નંબરે બેટિંગ કરી રહેલા કેપ્ટન દેવદત્ત પડિકલ માત્ર 11 રન બનાવીને આઉટ થયો, જ્યારે કરુણ નાયર પોતાનું ખાતું ખોલવામાં નિષ્ફળ રહ્યો. મુશ્કેલ પરિસ્થિતિઓમાં, મયંક અગ્રવાલે સદી ફટકારી, અને શ્રેયસ ગોપાલે ઈનિંગને સ્થિર કરી. બંનેએ પાંચમી વિકેટ માટે 105 રન બનાવ્યા. પરંતુ 49મી ઓવરમાં યુદ્ધવીર સિંહ ચરકે શ્રેયસ ગોપાલ 27 રને એલબીડબલ્યુ આઉટ કરીને પાર્ટનરશીપ તોડી.
મયંક 207 બોલમાં 17 ચોગ્ગા સાથે 130 રન બનાવીને અણનમ છે. કૃતિક કૃષ્ણા 27 રન બનાવીને તેની સાથે છે. બંનેએ છઠ્ઠી વિકેટ માટે 58 રનની પાર્ટનરશીપ કરી છે. મેચ હાલમાં નિર્ણાયક તબક્કે છે, પરંતુ લીડને કારણે કર્ણાટકની ટીમ પર દબાણ મજબૂત છે.
આ પણ વાંચો: 6,6,6,6,6... વૈભવ સૂર્યવંશીએ 14 બોલમાં અડધી સદી ફટકારી મચાવી ધૂમ
