ટીમ ઈન્ડિયા ફક્ત જીતી જ નથી રહી પણ ICC T20 વર્લ્ડકપ 2026માં રેકોર્ડ પણ બનાવી રહી છે. આ વખતે ભારતીય ટીમે 17 વર્ષ જૂનો રેકોર્ડ તોડીને એક અનોખો રેકોર્ડ હાંસલ કર્યો છે.

ભારતીય ટીમ એક જ T20 વર્લ્ડકપમાં સૌથી વધુ બોલરોનો ઉપયોગ કરનારી ટીમ બની ગઈ છે. ટીમ ઈન્ડિયાએ આ ટુર્નામેન્ટમાં અત્યાર સુધી કુલ 12 અલગ અલગ બોલરોનો ઉપયોગ કર્યો છે. આ એક જ T20 વર્લ્ડકપ સીઝનમાં ટીમ ઈન્ડિયા દ્વારા ઉપયોગમાં લેવાતા બોલરોની સૌથી મોટી સંખ્યા છે.

આ પહેલા ઈંગ્લેન્ડે 2009ના T20 વર્લ્ડ કપમાં 11 બોલરોનો ઉપયોગ કર્યો હતો, પરંતુ આ વખતે ટીમ ઈન્ડિયાએ તે રેકોર્ડને પાર કરી દીધો છે.

નેધરલેન્ડ્સ સામે 7 બોલરોનો ઉપયોગ કરવામાં આવ્યો

T20 વર્લ્ડકપ 2026માં અત્યાર સુધીમાં ભારત માટે વરુણ ચક્રવર્તી, કુલદીપ યાદવ, શિવમ દુબે, અર્શદીપ સિંહ, મોહમ્મદ સિરાજ, જસપ્રીત બુમરાહ, હાર્દિક પંડ્યા, અક્ષર પટેલ, તિલક વર્મા, રિંકુ સિંહ, વોશિંગ્ટન સુંદર અને અભિષેક શર્મા બોલિંગ કરી ચૂક્યા છે. અમદાવાદના નરેન્દ્ર મોદી સ્ટેડિયમમાં નેધરલેન્ડ સામેની મેચમાં ભારતે સાત અલગ અલગ બોલરોનો ઉપયોગ કર્યો હતો, જે દર્શાવે છે કે ટીમ મેનેજમેન્ટ દરેક ખેલાડી સાથે વ્યૂહાત્મક રીતે પ્રયોગ કરી રહ્યું છે.

સુપર-8 માં જોવા મળશે સ્ટાર ખેલાડીઓ

આ રેકોર્ડ દર્શાવે છે કે ભારતીય ટીમે આ વખતે ઊંડાણ અને વિવિધતા ધરાવતી ટીમ ઉતારી છે. કેપ્ટને ગ્રુપ સ્ટેજની પરિસ્થિતિઓને આધારે ફાસ્ટ બોલરોથી લઈને સ્પિનરો અને ઓલરાઉન્ડર સુધીના વિકલ્પોની વિશાળ સિરીઝનો ઉપયોગ કરી લીધો છે. સુપર 8 માં ભારતીય બોલિંગ યુનિટ કેટલી વધુ વિવિધતા દર્શાવે છે તે જોવું રસપ્રદ રહેશે.

તમને જણાવી દઈએ કે વરુણ ચક્રવર્તીએ T20 વર્લ્ડકપ 2026માં અત્યાર સુધી ભારત માટે સૌથી વધુ વિકેટ લીધી છે. તે કુલ વિકેટ લેવાની યાદીમાં બીજા નંબરે છે. વરુણ ચક્રવર્તી પછી અક્ષર પટેલ બીજા અને હાર્દિક પંડ્યા ત્રીજા નંબરે છે.