22 દિવસની કઠિન સ્પર્ધા અને ઉતાર-ચઢાવ પછી હવે તે દિવસ આવી ગયો છે, જેનો અંડર-19 ક્રિકેટરો આતુરતાથી રાહ જોઈ રહ્યા છે, શુક્રવાર, 6 ફેબ્રુઆરીએ ઝિમ્બાબ્વેના બુલાવાયો ખાતે અંડર-19 વર્લ્ડ કપ 2026ની ફાઇનલ રમાશે, જ્યાં ફરી એકવાર ભારત અને ઇંગ્લેન્ડ આમને-સામને થશે. 2022માં પણ બંને ટીમો ફાઇનલમાં ટકરાઈ હતી અને ત્યારે ભારતે ખિતાબ જીત્યો હતો. આ વખતે પણ ટીમ ઇન્ડિયા ટ્રોફી જીતવાની મજબૂત દાવેદાર છે અને તેના પાછળ સૌથી મોટું કારણ છે સ્ટાર ઓપનર વૈભવ સૂર્યવંશી.
ટીમ ઇન્ડિયા ફરી એકવાર ટ્રોફી પોતાના નામે કરવાની તક
જ્યારે ફાઇનલ શરૂ થશે ત્યારે ભારતીય ટીમ રેકોર્ડ છઠ્ઠી વખત અંડર-19 વર્લ્ડ કપ જીતવાના ઇરાદે મેદાનમાં ઉતરશે. આ ભારતીય ટીમની સતત છઠ્ઠી ફાઇનલ છે. છેલ્લો ખિતાબ ભારતે 2022માં ઇંગ્લેન્ડને હરાવીને જીત્યો હતો, જ્યારે 2024માં ઓસ્ટ્રેલિયા સામે ફાઇનલમાં હારનો સામનો કરવો પડ્યો હતો. હવે ટીમ ઇન્ડિયા ફરી એકવાર ટ્રોફી પોતાના નામે કરવાની કોશિશ કરશે. બીજી તરફ ઇંગ્લેન્ડ સામે 28 વર્ષથી ચાલતી ચેમ્પિયન બનવાની રાહ પૂરી કરવાનો મોટો પડકાર છે. ઇંગ્લેન્ડ 1998 બાદ અંડર-19 વર્લ્ડ કપ જીતવામાં નિષ્ફળ રહ્યું છે અને હવે ભારત સામે બદલો લેવાની તક પણ તેના હાથમાં છે.
ઇંગ્લેન્ડ સામે વૈભવનું બેટ કરે છે રાજ!
ઇંગ્લેન્ડની ટીમ પણ આ વખત મજબૂત દેખાઈ રહી છે. તેના કેપ્ટન થોમસ રિયૂ શાનદાર ફોર્મમાં છે અને સેમિફાઇનલમાં શતક પણ ફટકારી ચૂક્યો છે. ટીમના પેસર મેની લમ્સડેન ટૂર્નામેન્ટમાં સૌથી વધુ વિકેટ લેવાના મામલે આગળ છે. છતાં પણ ઇંગ્લેન્ડ માટે ફાઇનલ સરળ નથી, કારણ કે સૌથી મોટી મુશ્કેલી છે વૈભવ સૂર્યવંશી. યુવા ભારતીય ઓપનરે ગયા વર્ષે ઇંગ્લેન્ડ પ્રવાસ દરમિયાન શાનદાર પ્રદર્શન કરીને ટીમને હચમચાવી દીધી હતી.
વૈભવ સૂર્યવંશીના નિશાના પર હવે ઈંગ્લેન્ડ!
પ્રવાસમાં વૈભવે 5 વનડે અને 2 ટેસ્ટ મેચમાં કુલ 445 રન બનાવ્યા હતા, જેમાં 32 છક્કા સામેલ હતા. તેમાંમાંથી 355 રન વનડે ફોર્મેટમાં આવ્યા હતા, જેમાં એક શતક અને એક અર્ધશતક સામેલ છે. આ વનડે સિરીઝમાં વૈભવે 29 છક્કા ફટકાર્યા હતા. અંડર-19 વર્લ્ડ કપ પણ વનડે ફોર્મેટમાં રમાઈ રહ્યો છે, એટલે ફરી એકવાર વૈભવ ઇંગ્લેન્ડ માટે મોટો ખતરો બની શકે છે. વૈભવ સાથે-સાથે ટીમ ઇન્ડિયાના ઉપકેપ્ટન વિહાન મલ્હોત્રાનો રેકોર્ડ પણ ઇંગ્લેન્ડ સામે શાનદાર રહ્યો છે. તે જ સિરીઝમાં લેફ્ટ બેટ્સમેન વિહાને 5 મેચમાં 243 રન બનાવ્યા હતા, જેમાં એક શતક સામેલ હતું. યુથ ટેસ્ટમાં પણ તેણે એક શતક અને બે અર્ધશતક સાથે કુલ 277 રન બનાવ્યા હતા.
અંડર-19 વર્લ્ડ કપમાં વૈભવ-વિહાનનો દબદબો
અંડર-19 વર્લ્ડ કપની વાત કરીએ તો આ ટૂર્નામેન્ટમાં પણ આ બંને બેટ્સમેન ભારત માટે સૌથી સફળ સાબિત થયા છે. લેફ્ટ ઓપનર વૈભવે 6 ઇનિંગમાં 44ની સરેરાશ અને 147ના સ્ટ્રાઈક રેટ સાથે ભારત માટે સૌથી વધુ 264 રન બનાવ્યા છે. તેણે સેમિફાઇનલ સહિત 3 મેચમાં અર્ધશતક ફટકાર્યા છે. જ્યારે વિહાને 6 ઇનિંગમાં 70ની સરેરાશથી 210 રન બનાવ્યા છે, જેમાં એક શતક સામેલ છે.
આ પણ વાંચો- WPL 2026 Prize Money : RCB બની WPL 2026 ચેમ્પિયન, ઓરેન્જ કેપથી લઈને પર્પલ કેપ સુધી, જાણો કોણ બન્યું માલામાલ!
