T20 વર્લ્ડકપ 2026ની 38મી મેચમાં ઝિમ્બાબ્વેએ શ્રીલંકાને 6 વિકેટથી હરાવ્યું. કોલંબોના આર. પ્રેમદાસા સ્ટેડિયમમાં રમાયેલી આ મેચમાં શ્રીલંકાએ પહેલા બેટિંગ કરીને 179 રનનો ટાર્ગેટ આપ્યો હતો. જવાબમાં ઝિમ્બાબ્વેએ શાનદાર બેટિંગ કરતા 19.3 ઓવરમાં ટાર્ગેટ હાંસલ કર્યો અને મેચ જીતી લીધી.
આ T20 વર્લ્ડકપના ઈતિહાસમાં બીજો સૌથી મોટો રન ચેઝ હતો, જે ઝિમ્બાબ્વેની ટુર્નામેન્ટમાં શ્રીલંકા સામે પહેલી જીત હતી. તે T20 વર્લ્ડકપ 2026માં ઝિમ્બાબ્વેનો બીજો મોટો અપસેટ પણ હતો. આ પહેલા ઝિમ્બાબ્વેએ ઓસ્ટ્રેલિયા જેવી મજબૂત ટીમને 23 રનથી હરાવી હતી.
પથુમ નિસાંકાની ઈનિંગ ગઈ વ્યર્થ
શ્રીલંકાએ ટોસ જીતીને પહેલા બેટિંગ કરવાનો નિર્ણય લીધો. પથુમ નિસાંકા અને કુસલ પરેરાએ શ્રીલંકાને મજબૂત શરૂઆત અપાવી, પહેલી વિકેટ માટે 54 રનની પાર્ટનરશીપ કરી. કુસલ પરેરા 14 બોલમાં 22 રન બનાવીને આઉટ થયો. ત્યારબાદ કુસલ મેન્ડિસ 14 રન બનાવીને આઉટ થયો. પરંતુ પથુમ નિસાંકા પોતાની સ્થિતિ પર ટકી રહ્યા અને શાનદાર અડધી સદી ફટકારી.
પથુમ નિસાંકાએ 41 બોલમાં 8 ચોગ્ગા સાથે 62 રન બનાવ્યા. પવન રત્નાયકે પણ 25 બોલમાં 3 ચોગ્ગા અને 2 છગ્ગા સાથે 44 રન બનાવ્યા. આ 2 સિવાય શ્રીલંકાના અન્ય કોઈ બેટ્સમેન ખાસ કંઈ કરી શક્યા નહીં અને ટીમ 20 ઓવરમાં 7 વિકેટે 178 રન બનાવી શકી. ઝિમ્બાબ્વે માટે બ્લેસિંગ મુઝારાબાની, બ્રેડ ઈવાન્સ અને ગ્રીમ ક્રીમરે 2-2 વિકેટ લીધી.
બ્રાયન બેનેટ અને સિકંદર રઝાએ રમી શાનદાર ઈનિંગ
179 રનના ટાર્ગેટનો પીછો કરવા ઉતરેલી ઝિમ્બાબ્વે ટીમે બ્રાયન બેનેટ અને તાદિવાનાશે મારુમાનીની ઓપનિંગ જોડી સાથે શાનદાર શરૂઆત કરી, જેમને પહેલી વિકેટ માટે 69 રનની પાર્ટનરશીપ કરી. મારુમાનીએ 26 બોલમાં 34 રન બનાવીને આઉટ થયો. આ દરમિયાન બ્રાયને એક છેડેથી ઈનિંગને પકડી રાખી, રાયન બર્લ સાથે બીજી વિકેટ માટે 29 રનની પાર્ટનરશીપ કરી, જે 12 બોલમાં 23 રન બનાવીને આઉટ થયા. ત્યારબાદ કેપ્ટન સિકંદર રઝા બેટિંગ કરવા આવ્યો અને બ્રાયન બેનેટ સાથે ત્રીજી વિકેટ માટે 69 રન જોડીને ઝિમ્બાબ્વેની જીત સુનિશ્ચિત કરી.
શ્રીલંકા સામે રઝા 26 બોલમાં 45 રન બનાવીને આઉટ થયો, જ્યારે બેનેટે 48 બોલમાં અણનમ 63 રન બનાવીને ઝિમ્બાબ્વેને શાનદાર જીત અપાવી. ઝિમ્બાબ્વેએ 19.3 ઓવરમાં 4 વિકેટે 182 રન બનાવીને મેચ જીતી લીધી હતી. શ્રીલંકા માટે દુસાન હેમંથાએ 2 વિકેટ લીધી હતી, જ્યારે દાસુન શનાકા અને દુનિથ વેલાગે 1-1 વિકેટ લીધી હતી.
26 ફેબ્રુઆરીએ ભારત સામે થશે ટક્કર
તમને જણાવી દઈએ કે ઝિમ્બાબ્વે T20 વર્લ્ડકપ 2026માં અપરાજિત રહ્યું છે અને તેને તેના ત્રણેય ગ્રુપ સ્ટેજ મેચ જીતીને સુપર 8 માં સ્થાન મેળવ્યું છે. ઝિમ્બાબ્વેની આયર્લેન્ડ સામેની મેચ વરસાદને કારણે ધોવાઈ ગઈ હતી. ઝિમ્બાબ્વે હવે તેની પહેલી સુપર 8 મેચ વેસ્ટ ઈન્ડિઝ સામે 23 ફેબ્રુઆરીએ મુંબઈના વાનખેડે સ્ટેડિયમમાં રમશે.
ત્યારબાદ ટીમ 26 ફેબ્રુઆરીએ ચેન્નાઈના એમએ ચિદમ્બરમ સ્ટેડિયમમાં ટીમ ઈન્ડિયા સામે ટકરાશે. ઝિમ્બાબ્વેનો અંતિમ સુપર 8 મેચ 1 માર્ચે દિલ્હીના અરુણ જેટલી સ્ટેડિયમ ખાતે સાઉથ આફ્રિકા સામે થશે.
આ પણ વાંચો: Nepalએ પાકિસ્તાનને છોડ્યું પાછળ, T20 વર્લ્ડકપમાં સર્જાયો મોટો અપસેટ
