- હમાસ-ઇઝરાયેલના સંધર્ષની અસર વર્લ્ડ કપ પર પણ
- પાકિસ્તાનની નાપાક હરકત પર ભડક્યું ઇઝરાયેલ
- મોહમ્મદ રિઝવાન પોતાની હરકતથી વિવાદમાં ફસાયો
ઈઝરાયેલ અને હમાસ વચ્ચે ચાલી રહેલા સંઘર્ષની અસર આખી દુનિયામાં જોવા મળી રહી છે. વિશ્વ દેખીતી રીતે તેમના સમર્થનમાં વહેંચાયેલું છે, જેમાં એક વિભાગ સ્પષ્ટપણે પેલેસ્ટિનિયનો પ્રત્યે સહાનુભૂતિ ધરાવે છે, જ્યારે બીજી બાજુ ઇઝરાયેલીઓની તરફેણમાં બોલે છે. ભારતમાં યોજાનાર ICC વર્લ્ડ કપ 2023 પણ આનાથી અછૂત નથી.
થોડા દિવસો પહેલા જ પાકિસ્તાનના વિકેટકીપર બેટ્સમેન મોહમ્મદ રિઝવાને શ્રીલંકા સામેની સદી અને પાકિસ્તાનની ટીમની જીત 'ગાઝામાં પીડિત ભાઈ-બહેનો'ને સમર્પિત કરી હતી. શ્રીલંકા સામે રિઝવાનની સદીની મદદથી પાકિસ્તાને વર્લ્ડ કપના ઇતિહાસમાં સૌથી સફળ રન ચેઝ હાંસલ કર્યો હતો. આ શાનદાર જીત બાદ રિઝવાને ટ્વીટ કરીને ગાઝા પીડિતોના સમર્થનમાં એક પોસ્ટ કરી હતી, જેનો સેંકડો ભારતીય ફેન્સે વિરોધ કર્યો હતો.
ઈઝરાયલે ભારતના વખાણ કર્યા
હવે ઈઝરાયેલે પણ રિઝવાનની આ સોશિયલ મીડિયા પોસ્ટનો ખુલ્લેઆમ વિરોધ કર્યો છે અને ભારત દ્વારા ઈઝરાયેલને આપવામાં આવેલા સમર્થનની પ્રશંસા કરી છે. ઇઝરાયલે તેના સત્તાવાર ટ્વિટર હેન્ડલ દ્વારા લખ્યું, "અમારા ભારતીય મિત્રો દ્વારા ઇઝરાયેલ પ્રત્યે દર્શાવવામાં આવેલી એકતાથી અમે ખુશ છીએ. અમને ખુશી છે કે ક્રિકેટ વર્લ્ડ કપ 2023ની ભારત અને પાકિસ્તાન મેચમાં ભારત વિજયી બન્યું, અને પાકિસ્તાન પોતાની જીત શ્રેય હમાસના આંતકવાદીઓને આપી શક્યું નહી."
મોહમ્મદ રિઝવાન વિવાદોનું બીજું નામ
નોંધનીય છે કે મોહમ્મદ રિઝવાનને વર્લ્ડ કપ 2023 દરમિયાન ઘણી ટીકાઓનો સામનો કરવો પડી રહ્યો છે. ભારત vs પાકિસ્તાન મેચ દરમિયાન, જ્યારે તે આઉટ થઈને પેવેલિયનમાં પરત ફરી રહ્યો હતો, ત્યારે ભારતીય ફેન્સે "જય શ્રી રામ" ના નારા લગાવીને તેને ચીડવવાનો પ્રયાસ કર્યો હતો. આ સિવાય મોહમ્મદ રિઝવાન નેધરલેન્ડ સામેની પ્રથમ મેચ દરમિયાન નમાઝ પઢતો જોવા મળ્યો હતો, જેના કારણે સુપ્રીમ કોર્ટના વકીલ વિનીત જિંદાલે તેની વિરુદ્ધ ફરિયાદ દાખલ કરી છે.
તેમણે ટ્વિટર પર પોસ્ટ કર્યું અને લખ્યું, "રમતની ભાવનાને જીવંત રાખવા માટે, એડવોકેટ વિનીત જિંદાલે 6 ઓક્ટોબર 2023 ના રોજ ક્રિકેટ મેચ દરમિયાન "નમાઝ" અદા કરવા બદલ પાકિસ્તાન ક્રિકેટ ટીમના વિકેટકીપર અને બેટ્સમેન મોહમ્મદ રિઝવાન વિરુદ્ધ આંતરરાષ્ટ્રીય ફરિયાદ દાખલ કરી છે. ક્રિકેટ કાઉન્સિલ સાથે ફરિયાદ."
