એલિસ પેરીએ WPLમાં રચ્યો ઇતિહાસ, 6 વિકેટ લઇ પોતાના નામે મોટો રેકોર્ડ

• એલિસ પેરીએ RCB માટે 4 ઓવરમાં 15 રન આપીને 6 વિકેટ લઈને ઈતિહાસ રચ્યો
  
• પેરીએ વિમેન્સ પ્રીમિયર લીગમાં સર્વશ્રેષ્ઠ બોલિંગ ફિગરનો રેકોર્ડ બનાવ્યો
• WPL ઈતિહાસમાં કોઈએ 6 વિકેટ લીધી ન હતી

વિમેન્સ પ્રીમિયર લીગની બીજી સિઝન ચાલી રહી છે અને આ સિઝનમાં એક પછી એક મેચમાં શાનદાર પ્રદર્શન જોવા મળી રહ્યું છે. સિઝનની શરૂઆત એવી હતી કે સજીવન સજનાએ છેલ્લા બોલ પર સિક્સર ફટકારીને મુંબઈને જીત અપાવી હતી. તે પછી, દીપ્તિ શર્માની હેટ્રિક, હરમનપ્રીત કૌરની ઇનિંગ્સ, રિચા ઘોષની બહાદુરી, આવી ઘણી ક્ષણો આ સિઝનમાં જોવા મળી છે.

હવે આ જ યાદીમાં ઓસ્ટ્રેલિયાની સ્ટાર ઓલરાઉન્ડર એલિસ પેરીનું નામ પણ જોડાઈ ગયું છે.મુંબઈ ઈન્ડિયન્સ સામેની મેચમાં પેરીએ RCB માટે 4 ઓવરમાં 15 રન આપીને 6 વિકેટ લઈને ઈતિહાસ રચ્યો હતો.

સૌથી મોટો રેકોર્ડ બનાવ્યો

એલિસ પેરીએ વિમેન્સ પ્રીમિયર લીગમાં સર્વશ્રેષ્ઠ બોલિંગ ફિગરનો રેકોર્ડ બનાવ્યો છે. તે જ સમયે, તેણે એક એવું પરાક્રમ કર્યું જે પહેલાં ક્યારેય બન્યું ન હતું. તે લીગના ઈતિહાસમાં છ વિકેટ લેનારી પ્રથમ બોલર બની ગઈ છે. તેના પહેલા, WPL ઈતિહાસમાં કોઈએ 6 વિકેટ લીધી ન હતી. આ ઇનિંગમાં, એલિસ પેરીએ 4 ઓવરનો શાનદાર સ્પેલ નાખ્યો અને માત્ર 15 રન આપીને મુંબઈની 6 મોટી વિકેટ લીધી. તેણે પોતાની છ વિકેટમાંથી ચાર ખેલાડીઓને ક્લીન બોલ્ડ કર્યા હતા. તેણે સજીવન સજના, નેટ સીવર બ્રન્ટ, હરમનપ્રીત કૌર, અમેલિયા કાર, અમનજોત કૌર અને પૂજા વસ્ત્રાકરની વિકેટ લીધી હતી.

WPL ઇતિહાસમાં શ્રેષ્ઠ બોલિંગ આંકડા

• એલિસ પેરી- 15/6 (RCB vs MI, WPL 2024)
• મેરિજન કેપ- 15/5 (DC vs GG, WPL 2023)
• આશા શોભના- 22/5 (RCB vs UPW, WPL 2024)
• તારા નોરિસ- 29/5 (DC vs RCB, WPL 2023)
• કિમ ગાર્થ- 36/5 (GG vs UPW, WPL 2023)

મુંબઈ ઈન્ડિયન્સની ખરાબ હાલત

આ મેચની વાત કરીએ તો RCB કેપ્ટન સ્મૃતિ મંધાના માટે આ જીત-જીતની મેચ છે. અહીં, ટોસ જીત્યા પછી, તેણે પ્રથમ બોલિંગ કરવાનું પસંદ કર્યું. તે પછી મુંબઈની શરૂઆત સારી રહી હતી અને નવો ઓપનર સજીવન સજના હતો અને તેની પાર્ટનર હેલી મેથ્યુસ હતી. આજની મેચમાં યસ્તિકા ભાટિયાને આરામ આપવામાં આવ્યો હતો. ટીમની પહેલી વિકેટ 43ના સ્કોર પર પડી હતી પરંતુ તે પછી વિકેટોની લાઇન શરૂ થઈ હતી. મુંબઈની ટીમે 92 રનમાં 8 વિકેટ ગુમાવી દીધી હતી. મુંબઈની ટીમ 19 ઓવરમાં 113 રન બનાવીને ઓલઆઉટ થઈ ગઈ હતી.