મુલતાનમાં કંઈક એવું બન્યું જે ટેસ્ટ ક્રિકેટના 147 વર્ષના ઈતિહાસમાં પહેલાં ક્યારેય જોવા મળ્યું ન હતું. યજમાન પાકિસ્તાનની ટીમે પ્રથમ દાવમાં 3 બેટ્સમેનોની સદીની મદદથી 556 રન બનાવ્યા હતા પરંતુ તેમ છતાં ટીમ ખરાબ રીતે હારી ગઈ હતી. આ હાર એટલી શરમજનક છે કે ટેસ્ટ ક્રિકેટમાં એક નવો ઈતિહાસ રચાયો છે. ટેસ્ટ ક્રિકેટમાં આ પહેલીવાર બન્યું છે કે જ્યારે 500થી વધુ રન બનાવવા છતાં કોઈ ટીમને ઇનિંગ્સથી હારનો સામનો કરવો પડ્યો હોય.
ડિસેમ્બર 2023થી પાકિસ્તાન તેની છેલ્લી 6 ટેસ્ટ મેચ હારી ચૂક્યું છે. છેલ્લી 11 ટેસ્ટ મેચોમાં આ ટીમની ઘરઆંગણે સાતમી હાર પણ છે. બાકીની ચાર મેચ ડ્રો રહી છે. પાકિસ્તાને તેની છેલ્લી ટેસ્ટ મેચ ફેબ્રુઆરી 2021માં સાઉથ આફ્રિકા સામે જીતી હતી. એટલે કે 1341 દિવસથી પાકિસ્તાનને જીત મળી નથી.
રૂટ અને બ્રુકે કર્યો કમાલ
ઈંગ્લેન્ડે ઘરઆંગણે પાકિસ્તાનને એક દાવ અને 47 રનથી હરાવ્યું હતું. ઈંગ્લેન્ડની આ જીતમાં હેરી બ્રુક અને પૂર્વ કેપ્ટન જો રૂટનું મહત્વનું યોગદાન હતું. બંને બેટ્સમેનોએ ચોથી વિકેટ માટે 454 રનની રેકોર્ડ ભાગીદારી કરી અને પોતાની ટીમના સ્કોરને 800ની પાર પહોંચાડી દીધી. આ દરમિયાન બ્રુકે શાનદાર ત્રેવડી સદી ફટકારી હતી જ્યારે જો રૂટે 262 રનની શાનદાર ઇનિંગ રમી હતી.
ઇંગ્લેન્ડના વિશાળ સ્કોરનો પીછો કરવા આવેલી પાકિસ્તાનની ટીમને ઇનિંગ્સની હારથી બચવા માટે 276 રન બનાવવા પડ્યા હતા પરંતુ સમગ્ર ટીમ બીજી ઇનિંગમાં માત્ર 220 રનમાં જ સમેટાઇ ગઇ હતી. આ રીતે ઈંગ્લેન્ડે શાનદાર જીત નોંધાવી હતી. આ જીત સાથે જો રૂટના નામે એક મોટો રેકોર્ડ નોંધાઈ ગયો છે.
ડોન બ્રેડમેનનો તૂટ્યો વધુ એક રેકોર્ડ
જો રૂટે ટેસ્ટ જીતમાં સૌથી વધુ સદી ફટકારનારા બેટ્સમેનોની યાદીમાં ડોન બ્રેડમેનને પાછળ છોડી દીધા છે. જો રૂટે ટેસ્ટ મેચ જીતવામાં 24 સદી ફટકારી છે જ્યારે ડોન બ્રેડમેને 23 સદી ફટકારી છે. બ્રેડમેને તેની છેલ્લી સદી 1948માં ફટકારી હતી જેમાં ઓસ્ટ્રેલિયા જીત્યું હતું. હવે રૂટથી આગળ માત્ર 2 બેટ્સમેન છે. રિકી પોન્ટિંગ 30 સદી સાથે પ્રથમ સ્થાને છે જ્યારે સ્ટીવ સ્મિથ બીજા સ્થાને છે. સ્મિથે ટેસ્ટ મેચોમાં 25 સદી ફટકારી છે.
જીતેલી મેચોમાં સૌથી વધુ ટેસ્ટ સદી
- 30 - રિકી પોન્ટિંગ
- 25 - સ્ટીવ વો
- 24 - જો રૂટ*
- 23 - ડોન બ્રેડમેન
- 23 - મેથ્યુ હેડન
- 22 - જેક કાલિસ
- 21 - કેન વિલિયમસન
- 21 - સ્ટીવ સ્મિથ
- 20 - સચિન તેંડુલકર
