ચાલુ મેચમાં બબાલ! સ્ટાર બોલરે વિકેટ લઈને ગુસ્સામાં છોડ્યું મેદાન, જુઓ Video

વેસ્ટ ઈન્ડિઝની ટીમે ત્રીજી વનડેમાં ઈંગ્લેન્ડને 8 વિકેટે હરાવીને વનડે સિરીઝ જીતી લીધી છે. આ મેચમાં ડ્રામા જોવા મળ્યો હતો, જ્યાં વેસ્ટ ઈન્ડિઝના ફાસ્ટ બોલર અલ્ઝારી જોસેફની કેપ્ટન શાઈ હોપ સાથે લડાઈ થઈ હતી. લડાઈ એટલી હદે વધી ગઈ કે જોસેફ ગુસ્સામાં મેદાન છોડીને ચાલ્યા ગયા, ત્યારબાદ વેસ્ટ ઈન્ડિઝની ટીમને થોડા સમય માટે માત્ર 10 ખેલાડીઓ સાથે રમવાની ફરજ પડી. આ ઘટના ઈંગ્લેન્ડની ઈનિંગની ચોથી ઓવરમાં બની હતી.

મેદાન પર થયો ડ્રામા

બ્રિજટાઉનમાં, વેસ્ટ ઈન્ડિઝે ટોસ જીતીને ઈંગ્લેન્ડને બેટિંગ કરવા આમંત્રિત કર્યું હતું.અલ્ઝારી જોસેફે મેથ્યુ ફોર્ડ સાથે બોલિંગની શરૂઆત કરી અને ઈંગ્લેન્ડ પર દબાણ બનાવ્યું. ફોર્ડે તેની બીજી ઓવરના ત્રીજા બોલ પર વિલ જેક્સને આઉટ કરીને ઈંગ્લેન્ડનો સ્કોર 9-1 સુધી પહોંચાડ્યો. આ પછી જ્યારે જોસેફ આગલી ઓવર કરવા આવ્યો ત્યારે તેણે કેપ્ટન હોપ સાથે લાંબી વાત કરી. અહીં ફાસ્ટ બોલરે કેપ્ટનને સ્લિપ હટાવવા અને ફિલ્ડરને પોઈન્ટ તરફ રાખવાનો ઈશારો કર્યો, પરંતુ તેની વિનંતી પર ધ્યાન આપવામાં ન આવ્યું, જેના પછી જોસેફ ગુસ્સે થઈ ગયો હતો.

વેસ્ટ ઈન્ડિઝ 10 ફિલ્ડરો સાથે રમ્યું

અહીં તેણે બોલિંગ ચાલુ રાખી અને ત્રીજા બોલ પર અંગ્રેજ બેટ્સમેન જોર્ડન કોક્સને કેચ આઉટ કરાવ્યો. કોક્સના આઉટ થયા બાદ પણ કેપ્ટન અને જોસેફ વચ્ચે બોલાચાલી ચાલુ રહી, જે બાદ ફાસ્ટ બોલર ગુસ્સામાં મેદાનની બહાર નીકળી ગયો. જોસેફ મેદાન છોડ્યા પછી, તે સમયે કોઈ ફિલ્ડર હાજર નહોતું, જેના કારણે વેસ્ટ ઈન્ડિઝ થોડા સમય માટે 10 ફિલ્ડરો સાથે રમ્યું. આ વીડિયો સોશિયલ મીડિયા પર ઘણો વાયરલ થઈ રહ્યો છે.

સેમીએ મામલો સંભાળવાનો પ્રયત્ન કર્યો

બાદમાં વેસ્ટ ઈન્ડિઝના કોચ ડેરેન સેમીને બાઉન્ડ્રીની નજીક જોવામાં આવ્યો હતો, જેણે જોસેફને શાંત રહેવાનો સંકેત આપ્યો હતો. ઓવર પૂરી કર્યા પછી, જોસેફ સીધો મેદાનની બહાર નીકળી ગયો અને સીડીઓ ચઢીને વેસ્ટ ઈન્ડિઝના ડ્રેસિંગ રૂમમાં ગયો. જ્યારે જોસેફ આગલી ઓવર માટે આવ્યો ન હતો, ત્યારે હેડન વોલ્શ જુનિયર તેની જગ્યાએ ફિલ્ડિંગ કરવા આવ્યો હતો. જો કે, જોસેફ તરત જ સીડી નીચે આવ્યો. આ ઘટના બાદ હોપે તેને બોલિંગ ડ્યૂટીમાંથી હટાવી દીધો હતો અને તેની જગ્યાએ રોમારિયો શેફર્ડને બોલિંગ સોંપવામાં આવી હતી. શેફર્ડે ઇંગ્લેન્ડના બેટ્સમેન જેકબ બેથેલને તેના પહેલા બોલે જ આઉટ કર્યા બાદ આ પરિવર્તન કામ કરી ગયું.