- ભારત અને ઈંગ્લેન્ડ વચ્ચે પાંચ મેચની ટેસ્ટ સિરીઝ
- જો રૂટ આ સિરીઝમાં અત્યાર સુધી ફ્લોપ રહ્યો
- સિરીઝમાં રૂટે 30 રનનો આંકડો પાર કર્યો નથી
જો રૂટ ભારત સામે રમાઈ રહેલી ટેસ્ટ સીરીઝમાં અત્યાર સુધી ફ્લોપ દેખાઈ રહ્યો છે. રાજકોટમાં રમાઈ રહેલી ત્રીજી ટેસ્ટમાં પણ ઈંગ્લિશ બેટ્સમેન કંઈ ખાસ કરી શક્યો ન હતો. ઇંગ્લેન્ડની પ્રથમ ઇનિંગમાં રૂટ માત્ર 2 ફોરની મદદથી 31 બોલમાં 18 રન બનાવીને આઉટ થયો હતો. આ સિરીઝમાં આ પહેલીવાર નથી જ્યારે રૂટ ઓછા સ્કોર કરીને આઉટ થયો હોય. અત્યાર સુધી પાંચ ઇનિંગ્સમાં બેટિંગ કરનાર રૂટ એક વખત પણ 30 રનનો આંકડો પાર કરી શક્યો નથી.
ઈંગ્લેન્ડનો સૌથી અનુભવી બેટ્સમેન
રૂટ ઈંગ્લેન્ડનો સૌથી અનુભવી બેટ્સમેન છે જેને ભારતીય પરિસ્થિતિઓમાં રમવાનો પણ ઘણો અનુભવ છે. ઇંગ્લેન્ડે ભલે ભારતીય પરિસ્થિતિઓમાં રમવા માટે રૂટ પર સૌથી વધુ વિશ્વાસ વ્યક્ત કર્યો હોય, પરંતુ હજુ સુધી તે ટીમના વિશ્વાસ પર ખરા ઉતરી શક્યો નથી. રુટ સતત ત્રીજી ટેસ્ટમાં પણ ફ્લોપ રહ્યો હતો. રાજકોટમાં રમાઈ રહેલી ત્રીજી ટેસ્ટમાં જ્યાં ઈંગ્લેન્ડના બેન ડકેટે 153 રનની શાનદાર ઈનિંગ રમી ત્યારે રૂટ 20 રનનો આંકડો પણ પાર કરી શક્યો નહોતો.
સળંગ ત્રણેય ટેસ્ટમાં ફ્લોપ
રૂટ અત્યાર સુધીની ત્રણેય ટેસ્ટમાં ફ્લોપ રહ્યો છે. હૈદરાબાદમાં રમાયેલી સિરીઝની પ્રથમ મેચમાં રૂટે અનુક્રમે 29 અને 2 રન બનાવ્યા હતા. આ સિવાય વિશાખાપટ્ટનમમાં રમાયેલી બીજી મેચમાં રૂટે અનુક્રમે 5 અને 16 રન બનાવ્યા હતા. ત્યારબાદ રાજકોટમાં રમાઈ રહેલી ત્રીજી ટેસ્ટમાં રૂટ પ્રથમ દાવમાં માત્ર 18 રન બનાવી શક્યો હતો.
રૂટની કારકિર્દી
રૂટે તેની કારકિર્દીમાં અત્યાર સુધી 137 ટેસ્ટ રમી છે, જેમાં તેણે 251 ઇનિંગ્સમાં બેટિંગ કરતા 49.64ની એવરેજથી 11468 રન બનાવ્યા છે. આ સમયગાળા દરમિયાન, તેણે 30 સદી અને 60 ફિફટી ફટકારી છે, જેમાં તેનો ઉચ્ચ સ્કોર 254 રન છે.
