રોહિત શર્માનો બલ્લો ના ચાલ્યો તો પણ નામે કર્યો મોટો રેકોર્ડ

• ઈંગ્લેન્ડ સામેની પ્રથમ ટેસ્ટ મેચમાં ભારતનો દબદબો રહ્યો
  
• રાહુલ-જયસ્વાલ અને જાડેજાની તોફાની બેટીંગ
• રોહિત શર્માએ એક મોટો રેકોર્ડ પોતાના નામે કરી લીધો

હૈદરાબાદના રાજીવ ગાંધી ઈન્ટરનેશનલ સ્ટેડિયમમાં ઈંગ્લેન્ડ સામેની પ્રથમ ટેસ્ટ મેચમાં ભારતનો દબદબો રહ્યો છે. પ્રથમ ટેસ્ટ મેચના બીજા દિવસના અંત સુધીમાં ભારતીય ટીમે 175 રનની લીડ મેળવી લીધી છે. ભારત તરફથી કેએલ રાહુલે સૌથી વધુ 86 રન બનાવ્યા હતા.

રાહુલ-જયસ્વાલ અને જાડેજાની તોફાની બેટીંગ

કેએલ રાહુલ ઉપરાંત યુવા બેટ્સમેન યશસ્વી જયસ્વાલે પણ ટીમ માટે મૂલ્યવાન ઇનિંગ્સ રમી હતી. યશસ્વી જયસ્વાલે સ્કોરિંગની શરૂઆત કરી અને 80 રન બનાવ્યા. આ ઉપરાંત જાડેજા પણ 81 રન બનાવી અણનમ રહ્યો હતો. ભારતીય કેપ્ટન રોહિત શર્મા ઈંગ્લેન્ડ સામેની પ્રથમ ટેસ્ટ મેચમાં બેટિંગથી કંઈ ખાસ કરી શક્યો નહોતો. આ મેચમાં રોહિત શર્મા 24 રન બનાવીને આઉટ થયો હતો. આમ છતાં રોહિત શર્માએ એક મોટો રેકોર્ડ પોતાના નામે કરી લીધો છે.

બીજા નંબર પર ભારત

વર્લ્ડ ટેસ્ટ ચેમ્પિયનશિપની દૃષ્ટિએ ભારત અને ઈંગ્લેન્ડ બંને માટે આ સિરીઝ ખૂબ જ મહત્વપૂર્ણ માનવામાં આવે છે. પાંચ મેચની શ્રેણી જીતનારી ટીમ વર્લ્ડ ટેસ્ટ ચેમ્પિયનશિપના પોઈન્ટ ટેબલમાં પોતાને સારી સ્થિતિમાં મૂકશે. ભારતીય ટીમ હાલમાં વર્લ્ડ ટેસ્ટ ચેમ્પિયનશિપના પોઈન્ટ ટેબલમાં બીજા સ્થાને છે.

રોહિતે એક રેકોર્ડ બનાવ્યો

વર્લ્ડ ટેસ્ટ ચેમ્પિયનશિપમાં ભારત તરફથી સૌથી વધુ કેચ લેવાના મામલે રોહિત શર્માએ અજિંક્ય રહાણેને પાછળ છોડી દીધો છે. ભારત માટે, અજિંક્ય રહાણેએ અત્યાર સુધી 29 વર્લ્ડ ટેસ્ટ ચેમ્પિયનશિપ મેચોમાં કુલ 29 કેચ લીધા છે. જ્યારે રોહિત શર્મા પોતાની 28મી મેચમાં જ 30 કેચ લેવામાં સફળ રહ્યો હતો. જો વર્લ્ડ ટેસ્ટ ચેમ્પિયનશિપમાં ભારત તરફથી સૌથી વધુ કેચ ઝડપનાર ભારતીય ખેલાડીની વાત કરીએ તો રોહિત શર્મા બીજા નંબર પર આવી ગયો છે.

સ્ટીવ સ્મિથ ટોપ પર

પૂર્વ ભારતીય કેપ્ટન વિરાટ કોહલીનું નામ નંબર વન પર છે. કોહલીએ 36 મેચમાં કુલ 39 કેચ પકડ્યા છે. વર્લ્ડ ટેસ્ટ ચેમ્પિયનશિપમાં સૌથી વધુ કેચ લેવાનો રેકોર્ડ ઓસ્ટ્રેલિયાના બેટ્સમેન સ્ટીવ સ્મિથના નામે છે. સ્ટીવ સ્મિથે કુલ 82 કેચ પકડ્યા છે. જ્યારે ઈંગ્લેન્ડનો જો રૂટ 77 કેચ સાથે બીજા ક્રમે છે. આ સાથે જ ઈંગ્લેન્ડના કેપ્ટન બેન સ્ટોક્સના નામે પણ 45 કેચ છે. આ યાદીમાં તે ત્રીજા નંબર પર છે.