- ક્રિક્રેટ પ્રેમીઓમાં વર્લ્ડ કપને લઈને ભારે ઉત્સાહ
- ભારત અને પાક મેચ માટે હોસ્પિટલમાં બુકિંગ
- હોટલોમાં જગ્યા ન મળતા હોસ્પિટલમાં બેડ બુક કરાવ્યા
વર્લ્ડ કપ 2023ની ઑક્ટોબરથી શરુઆત થવા જઈ રહી છે. ક્રિક્રેટ પ્રેમીઓમાં વર્લ્ડ કપને લઈને ભારે ઉત્સાહ જોવા મળી રહ્યો છે. તેમાં પણ ખાસ કરીને ભારત અને પાકિસ્તાનના મેચ માટે ફેન્સ એડવાન્સ બુકિંગ કરાવી રહ્યા છે. ભારત અને પાકિસ્તાનની પહેલી મેચ અમદાવાદ ખાતે રમાશે. આ મેચની એડવાન્સ બુકિંગ માટે હવે અમદાવાદની હોટલોમાં જગ્યા બચી નથી.
વર્લ્ડ કપ 2023 આ વખતે ભારતમાં યોજાવાનો છે. ટીમ ઈન્ડિયા અને પાકિસ્તાન વચ્ચે 15 ઓક્ટોબરે મેચ રમાશે. આ મેચ અમદાવાદમાં યોજાશે. આને લઈને ફેન્સ ખૂબ જ ઉત્સાહિત છે. આ મેચને કારણે અમદાવાદની હોટલોમાં જગ્યા બચી નથી. આ અંગે એક રસપ્રદ સમાચાર સામે આવ્યા છે. માહિતી અનુસાર, ભારત-પાકિસ્તાન મેચને કારણે હોટલમાં જગ્યાના અભાવે ફેન્સ હોસ્પિટલમાં બેડ બુક કરાવી રહ્યા છે.
હોસ્પિટલમાં કરાવી રહ્યા છે બુકિંગ
માહિતી અનુસાર, અમદાવાદની એક હોસ્પિટલમાં કામ કરતા એક ડોક્ટરે જણાવ્યું છે કે લોકો સંપૂર્ણ બોડી ચેકઅપની સાથે એક રાત રોકાવા માટે બેડ બુક કરી રહ્યા છે. ડોક્ટરનું કહેવું છે કે લોકો હોસ્પિટલના કોઈપણ પ્રકારનો રૂમ કે બેડ બુક કરવા તૈયાર છે. તેઓ કહે છે કે અમારી પાસે મર્યાદિત જગ્યા છે. જેના કારણે દર્દીઓને ધ્યાનમાં રાખીને તેઓ બુકિંગ અંગે વિચારી રહ્યા છે.
તેમજ ડૉક્ટરે કહ્યું, "મારા એક યુએસએના મિત્રએ હોસ્પિટલમાં રહેવા વિશે પૂછપરછ કરી હતી. તે ભારત અને પાકિસ્તાન વચ્ચેની મેચ જોવા માંગે છે. તે હોસ્પિટલમાં મેડિકલ સુવિધા પણ લેવા માંગે છે.
હોટલોના ભાડામાં 10 ગણો વધારો
ઉલ્લેખનીય છે કે, ભૂતકાળમાં અનેક પ્રકારના સમાચાર સામે આવ્યા હતા. મીડિયા રિપોર્ટ્સ અનુસાર, હોટલોમાં એક રાત્રિ રોકાણ માટે 10 ગણાથી વધુ ભાડું વસૂલવામાં આવી રહ્યું છે. હોટલમાં એક રાત રોકાવા માટે એક લાખ રૂપિયા સુધી લેવામાં આવી રહ્યા છે. વર્લ્ડ કપ 2023ની પ્રથમ મેચ અમદાવાદમાં રમાશે. અહીં કુલ પાંચ મેચો રમાવાની છે. ભારત અને પાકિસ્તાન વચ્ચેની મેચની સાથે ફાઈનલ પણ રમાશે. આ વખતે વર્લ્ડ કપની ફાઇનલ મેચ 19 નવેમ્બરે રમાશે.
