- પૂર્વ દિગ્ગજ હરભજન સિંહે પાકિસ્તાની ક્રિકેટરોને ઉધડા લે છે
- ભજ્જીએ પાકિસ્તાની પત્રકારને જોરદાર ઝાટકણી કાઢી હતી
- પાકિસ્તાન ચેમ્પિયન્સ ટ્રોફી 2025ની યજમાની કરી રહ્યું છે
ટીમ ઈન્ડિયાના પૂર્વ દિગ્ગજ સ્પિન બોલર હરભજન સિંહ અવારનવાર સોશિયલ મીડિયા પર પાકિસ્તાની ક્રિકેટરોને ઉધડા લે છે. થોડા દિવસો પહેલા પૂર્વ પાકિસ્તાની ક્રિકેટર કામરાન અકમલ અને હરભજન સિંહ વચ્ચે સોશિયલ મીડિયા પર જોરદાર દલીલ જોવા મળી હતી, જ્યારે ભજ્જીએ અકમલને ફટકાર લગાવી હતી, બાદમાં પૂર્વ પાકિસ્તાની ભારત અને ભજ્જીની માફી માંગતો જોવા મળ્યો હતો. જે બાદ હવે ભજ્જીએ પાકિસ્તાની પત્રકારને જોરદાર ઝાટકણી કાઢી છે.
પત્રકારે ભારતીય ખેલાડીઓ વિશે પોસ્ટ કરી
વાસ્તવમાં, આ વખતે પાકિસ્તાન ચેમ્પિયન્સ ટ્રોફી 2025ની યજમાની કરી રહ્યું છે. પરંતુ ભારતે પોતાની ટીમ પાકિસ્તાન મોકલવાની ના પાડી દીધી છે. જે બાદ હવે પાકિસ્તાનના એક પત્રકારે સોશિયલ મીડિયા પર એક પોસ્ટ શેર કરી ટીમ ઈન્ડિયાના ખેલાડીઓની મજાક ઉડાવવાનો પ્રયાસ કર્યો છે. આ પોસ્ટમાં, પત્રકારે વર્ષ 2006 દરમિયાન શાહિદ આફ્રિદી દ્વારા હરભજન સિંહને ફટકારેલા ચોગ્ગા અને છગ્ગાનો સ્કોરચાર્ટ શેર કર્યો છે.
આ પછી હરભજન સિંહે આ પાકિસ્તાની પત્રકારને ચૂપ કરાવતી એક પોસ્ટ શેર કરી. આ પોસ્ટમાં હરભજન સિંહે 2009ના એક અખબારનો સ્ક્રીનશોટ શેર કર્યો જ્યારે શ્રીલંકાની ટીમની બસ પર પાકિસ્તાની આતંકવાદીઓ દ્વારા હુમલો કરવામાં આવ્યો હતો. આ પોસ્ટ શેર કરતી વખતે ભજ્જીએ લખ્યું કે ના, આ માટે નહીં. ક્રિકેટમાં હંમેશા હાર-જીત થતી રહેતી હોય છે. ચાલો હું તમને કહી દઉં કે તે જ વાસ્તવિક સમસ્યા છે. ફોટો તપાસો.
ભારતે 2008માં પાકિસ્તાનનો પ્રવાસ કર્યો
2009માં પાકિસ્તાનમાં શ્રીલંકાની ટીમની બસ પર થયેલા આતંકવાદી હુમલા બાદ પાકિસ્તાન પર થોડા સમય માટે કોઈપણ આંતરરાષ્ટ્રીય મેચની યજમાની પર પ્રતિબંધ લગાવી દેવામાં આવ્યો હતો. જો કે હવે અન્ય ટીમો પાકિસ્તાનનો પ્રવાસ કરે છે પરંતુ ટીમ ઈન્ડિયા ક્યારેય પાકિસ્તાનનો પ્રવાસ કરતી નથી. છેલ્લી વખત ટીમ ઈન્ડિયાએ વર્ષ 2008માં પાકિસ્તાનનો પ્રવાસ કર્યો હતો.
