અરશદ નદીમને અભિનંદન આપતા હરભજન સિંહે કરી મોટી ભૂલ, લોકોએ કર્યો ટ્રોલ

• પેરિસ ઓલિમ્પિકમાં અરશદ નદીમે ગોલ્ડ મેડલ જીત્યો હતો
  
• નીરજ ચોપરા સિલ્વર મેડલ જીતવામાં સફળ રહ્યો હતો
• ભારતીય ક્રિકેટર હરભજન સિંહે અરશદ નદીમને આપી પ્રતિક્રિયા

પેરિસ ઓલિમ્પિકમાં ભાલા ફેંક સ્પર્ધાની સૌ કોઈ રાહ જોઈ રહ્યા હતા. સમગ્ર ભારતની નજર નીરજ ચોપરા પર હતી. નીરજ ચોપરાએ વર્ષ 2020માં ટોક્યો ઓલિમ્પિકમાં ભાલા ફેંકમાં ગોલ્ડ જીત્યો હતો, પરંતુ આ વખતે પાકિસ્તાની ખેલાડી અરશદ નદીમને પણ પ્રબળ દાવેદાર માનવામાં આવી રહ્યો હતો. અરશદ નદીમે તેના બીજા જ થ્રોમાં ઓલિમ્પિક રેકોર્ડ તોડીને ગોલ્ડ મેડલ કબજે કર્યો હતો.

ભારતના નીરજ ચોપરા બીજા ક્રમે રહ્યા અને સિલ્વર મેડલ જીત્યો હતો. આ દરમિયાન અરશદ અને નીરજ ચોપરાનો એક ફોટો ફેક એકાઉન્ટથી શેર કરવામાં આવ્યો હતો અને ફોટો શેર કરનાર વ્યક્તિએ લખ્યું હતું કે અમે હંમેશા મિત્રો રહીશું.

હરભજન સિંહે ફેક એકાઉન્ટને ટેગ કર્યું

રસપ્રદ વાત એ હતી કે ભારતીય ક્રિકેટર હરભજન સિંહે પણ અરશદના આ ફેક એકાઉન્ટની પોસ્ટને ટ્વિટ કરી છે. તેણે ટ્વીટમાં લખ્યું,અરશદ તને અભિનંદન. સરસ ફોટા, રમત તે બધાને એકસાથે જોડે છે. આટલું જ નહીં, હરભજન સિંહે પોતાના ટ્વિટમાં અરશદ નદીમની ટ્વિટર પ્રોફાઇલને ટેગ કરી હતી.

સોશિયલ મીડિયા પર ટ્રોલ

ત્યારથી સોશિયલ મીડિયા યુઝર્સ હરભજન સિંહને સોશિયલ મીડિયા પર જોરદાર ટ્રોલ કરી રહ્યા છે. એક કારણ એ પણ છે કે ભારતીય ક્રિકેટર હરભજન સિંહ દ્વારા જે પ્રોફાઇલની પોસ્ટ શેર કરવામાં આવી છે તેના ઇન્ટ્રોમાં લખવામાં આવ્યું છે કે તે અરશદ નદીમનું પેરોડી એકાઉન્ટ છે. આ કારણે સોશિયલ મીડિયા પર હરભજન સિંહની ખૂબ મજાક ઉડાવવામાં આવી હતી.