- કોલકાતા નાઈટ રાઈડર્સ IPL 2024માં ચેમ્પિયન બની હતી
- શાહરુખ ખાને ટ્રોફી જીત્યા બાદ ખેલાડીને આપેલું વચન પાળ્યું
- KKR ટીમે મેદાન પર ફ્લાઈંગ કિસ કરીને ઉજવણી કરી હતી
કોલકાતા નાઈટ રાઈડર્સના યુવા ઝડપી બોલર હર્ષિત રાણાએ ખુલાસો કર્યો કે ફ્રેન્ચાઈઝીના સહ-માલિક શાહરૂખ ખાને આઈપીએલ 2024 ફાઈનલ પછી તેમને આપેલું વચન પાળ્યું હતું. રાણાએ IPL સિઝનમાં શાનદાર પ્રદર્શન કર્યું હતું અને KKRની ત્રીજી ટાઇટલ જીતવામાં મહત્વની ભૂમિકા ભજવી હતી. દિલ્હીના આ યુવા ફાસ્ટ બોલરે 13 મેચમાં 19 વિકેટ લીધી હતી. જોકે, હેડલાઇન્સ બનાવનારી ઘટના એક મેચનો પ્રતિબંધ હતો.
ફ્લાઈંગ કિસ ભારે આપવી પડી હતી
હર્ષિત રાણાને સનરાઈઝર્સ હૈદરાબાદના બેટ્સમેન મયંક અગ્રવાલને ફ્લાઈંગ કિસ આપવાનું પરિણામ ભોગવવું પડ્યું હતું. આ પછી તેને દંડ ફટકારવામાં આવ્યો હતો. જોકે તે BCCIના રડાર પર આવી ગયો. તે IPL આચાર સંહિતાની કલમ 2.5 હેઠળ લેવલ 1 ના ગુના માટે દોષિત ઠર્યો હતો. રાણા પર એક મેચનો પ્રતિબંધ મૂકવામાં આવ્યો હતો.
શાહરૂખ ખાને વચન આપ્યું હતું
22 વર્ષીય ખેલાડીએ કહ્યું કે પ્રતિબંધ બાદ તે દુખી થયો હતો. ત્યારબાદ શાહરૂખ ખાને તેને પ્રોત્સાહિત કર્યો હતો અને વચન આપ્યું હતું કે જો તે IPL ટ્રોફી જીતશે તો આખી ટીમ ફ્લાઈંગ કિસ સેલિબ્રેશન સાથે ઉજવણી કરશે. રવિવારે KKRએ ત્રીજી ટ્રોફી જીત્યા બાદ બોલિવૂડના સુપરસ્ટારે પોતાનું વચન પાળ્યું અને સમગ્ર KKR ટીમે મેદાન પર ફ્લાઈંગ કિસ કરીને ઉજવણી કરી હતી.
હર્ષિતે કર્યો ખુલાસો
હર્ષિતે કહ્યું કે, એક મેચ પર પ્રતિબંધ લગાવ્યા બાદ હું ખૂબ જ દુખી હતો અને પછી શાહરૂખ સર મારી પાસે આવ્યા અને કહ્યું કે ટેન્શન ન લો, અમે આ સેલિબ્રેશન ટ્રોફી સાથે કરીશું. યુવા ફાસ્ટ બોલરે IPL ફાઇનલમાં પણ અવિશ્વસનીય પ્રદર્શન કર્યું હતું. તેણે ચાર ઓવરમાં માત્ર 24 રન આપીને બે વિકેટ લીધી હતી અને એક મેડન ઓવર પણ નાખી હતી, જે ફાઈનલ મેચમાં એક મોટી સિદ્ધિ છે.
