IND vs BAN: આજે બન્યા આ ખાસ રેકોર્ડ, પ્રથમ દિવસે અશ્વિન છવાયો

ચેન્નાઈમાં ભારત અને બાંગ્લાદેશ વચ્ચે પ્રથમ ટેસ્ટ મેચ રમાઈ રહી છે. રમતનો પ્રથમ દિવસ ઘણો વિસ્ફોટક રહ્યો હતો. બાંગ્લાદેશની ટીમે પ્રથમ બે સત્રમાં પ્રભુત્વ જમાવ્યું હતું, જ્યારે છેલ્લા સત્રમાં ટીમ ઈન્ડિયાએ મુલાકાતી ટીમને કોઈ તક આપી ન હતી. રવિચંદ્રન અશ્વિને શાનદાર સદી ફટકારીને ભારતને 300ની પાર પહોંચાડી દીધું હતું. ટીમ ઈન્ડિયાએ પહેલા દિવસે સ્ટમ્પના સમયે 339 રન બનાવી લીધા છે.

ટીમ ઈન્ડિયાનો શરૂઆતમાં ધબડકો

એક સમયે ભારતીય ક્રિકેટ ટીમે 144 રનમાં 6 વિકેટ ગુમાવી દીધી હતી. જો કે, આ પછી રવિચંદ્રન અશ્વિન અને રવિન્દ્ર જાડેજાએ છઠ્ઠી વિકેટ માટે અણનમ ભાગીદારી કરી અને ભારતને 300થી આગળ લઈ ગયા. બંને ખેલાડીઓએ પોતાની શાનદાર બેટિંગથી ઘણા મોટા રેકોર્ડ બનાવ્યા. તમને જણાવી દઈએ કે ભારત અને બાંગ્લાદેશ વચ્ચે ચેન્નાઈ ટેસ્ટ મેચના પહેલા દિવસે કયા 5 મોટા રેકોર્ડ બન્યા હતા.

ટેસ્ટ મેચના પહેલા દિવસે બન્યા આ રેકોર્ડ

• રિષભ પંતે વિકેટકીપર બેટ્સમેન તરીકે આંતરરાષ્ટ્રીય ક્રિકેટમાં 4000 રન પૂરા કર્યા. હવે એમએસ ધોની પછી તે આંતરરાષ્ટ્રીય ક્રિકેટમાં 4 હજાર કે તેથી વધુ રન બનાવનાર બીજો ભારતીય વિકેટકીપર બની ગયો છે.
• રવિચંદ્રન અશ્વિને ટેસ્ટ ક્રિકેટમાં તેની કારકિર્દીની બીજી સૌથી ઝડપી અડધી સદી ફટકારી. તેણે માત્ર 58 બોલમાં અડધી સદી ફટકારી હતી. ટેસ્ટ ક્રિકેટમાં રવિચંદ્રન અશ્વિનની આ બીજી સૌથી ઝડપી અડધી સદી છે. આ પહેલા તેણે 2012માં સૌથી ઝડપી ટેસ્ટ અડધી સદીનો રેકોર્ડ બનાવ્યો હતો.

• રવિચંદ્રન અશ્વિને તેની ટેસ્ટ કારકિર્દીની સૌથી ઝડપી સદી ફટકારી. અશ્વિને 108 બોલમાં 10 ચોગ્ગા અને 2 છગ્ગાની મદદથી પોતાની સદી પૂરી કરી અને નવો ઈતિહાસ રચ્યો. આ તેની ઓવરઓલ છઠ્ઠી ટેસ્ટ સદી છે.
• રવિચંદ્રન અશ્વિન અને જાડેજાએ સાતમી વિકેટ માટે 195 રનની ભાગીદારી કરી હતી. સાતમા કે તેનાથી નીચેના સ્તરે બાંગ્લાદેશ સામે કોઈપણ વિકેટ માટે ભારતની અત્યાર સુધીની આ સૌથી મોટી ભાગીદારી છે. આ પહેલા 2004માં ઝહીર ખાન અને સચિન તેંડુલકરે 10મી વિકેટ માટે 133 રનની ભાગીદારી કરી હતી.

• અશ્વિન વિશ્વનો એકમાત્ર એવો ખેલાડી છે જેણે 500 થી વધુ ટેસ્ટ વિકેટ લીધી છે અને 6 સદી પણ ફટકારી છે.
• અશ્વિન હવે ટેસ્ટમાં 500થી વધુ વિકેટ લેનાર વિશ્વનો પ્રથમ ખેલાડી બની ગયો છે અને તેણે 20 વખત ફિફ્ટી પ્લસ સ્કોર પણ બનાવ્યો છે. આ મામલે અશ્વિન પછી બીજા સ્થાન પર ઈંગ્લેન્ડનો સ્ટુઅર્ટ બ્રોડ છે, જેણે ટેસ્ટમાં 604 વિકેટ સાથે 14 વખત ફિફ્ટી પ્લસ સ્કોર બનાવ્યો છે.