આ મારી છેલ્લી તક..! ત્રીજી T20 પહેલા ટેન્શનમાં હતો સંજુ સેમસન?

બાંગ્લાદેશ સામેની ત્રીજી T20 મેચમાં સંજુ સેમસનનું બેટ જોરથી બોલ્યું હતું. સંજુએ તોફાની બેટિંગ કરી અને તેની T20 આંતરરાષ્ટ્રીય કારકિર્દીની પ્રથમ સદી ફટકારી. વિકેટકીપર બેટ્સમેને માત્ર 40 બોલમાં પોતાની સદી ફટકારી હતી અને હૈદરાબાદના ચાહકોનું ઘણું મનોરંજન કર્યું હતું. સંજુએ 47 બોલમાં 111 રનની યાદગાર ઈનિંગ રમી, જેના કારણે ભારતીય ટીમે T-20 ઈન્ટરનેશનલમાં પોતાનો સર્વોચ્ચ સ્કોર બનાવ્યો.

ડરી ગયેલો હતો સંજુ સેમસન

પ્રથમ બેટિંગ કરતા ટીમ ઈન્ડિયાએ 20 ઓવરમાં 6 વિકેટ ગુમાવીને સ્કોર બોર્ડ પર 297 રન બનાવ્યા અને એકતરફી મેચમાં બાંગ્લાદેશને 133 રનથી હરાવ્યું. મેચ બાદ સંજુ સેમસને પ્રેસ કોન્ફરન્સમાં કહ્યું કે આ મેચમાં પ્રવેશતા પહેલા તે ડરી ગયો હતો. સંજુએ કહ્યું કે તેને લાગ્યું કે પોતાને સાબિત કરવાની આ છેલ્લી તક હશે. સંજુએ કહ્યું કે સદી ફટકાર્યા બાદ તે ખૂબ જ ખુશ છે અને તેણે રાહતનો શ્વાસ લીધો છે.

સંજુ ક્યારે 5 સિક્સર મારવાનું પ્લાનિંગ કરી રહ્યો હતો?

બાંગ્લાદેશ સામેની સિરીઝની પ્રથમ બે મેચમાં સંજુ સેમસનનું બેટ શાંત રહ્યું હતું. બીજી મેચમાં વહેલા આઉટ થયા બાદ સંજુને ઘણો ટ્રોલ કરવામાં આવ્યો હતો, પરંતુ તેની વિસ્ફોટક ઇનિંગથી સંજુએ ટીકાકારોને ચૂપ કરી દીધા હતા. ત્રીજી મેચમાં સંજુએ રિશાદ હુસૈનની એક ઓવરમાં સતત પાંચ સિક્સર ફટકારી હતી. મેચ બાદ બોલતા સંજુએ કહ્યું કે તે છેલ્લા એક વર્ષથી એક ઓવરમાં પાંચ સિક્સર મારવાનો પ્રયાસ કરી રહ્યો હતો. જે બાંગ્લાદેશ વિરૂદ્ધ સફળ થયો હતો.

સંજુએ શાનદાર સદી ફટકારી

ત્રીજી T20 મેચમાં સંજુ સેમસને તેની T20 કારકિર્દીની પ્રથમ સદી ફટકારી હતી. આ મેચમાં બેટિંગ કરતા તેણે માત્ર 47 બોલમાં 111 રન બનાવ્યા હતા. જેમાં 11 ફોર અને 8 સિક્સરનો સમાવેશ થાય છે. આ ઉપરાંત સંજુના નામે એક વિશેષ સિદ્ધિ પણ નોંધાઈ છે. સંજુ હવે T20 આંતરરાષ્ટ્રીય ક્રિકેટમાં સદી ફટકારનાર પ્રથમ ભારતીય વિકેટકીપર બેટ્સમેન બની ગયો છે.

ભારતે સિરીઝ 3-0થી જીતી લીધી હતી

ટેસ્ટ સીરીઝ બાદ ટીમ ઈન્ડિયાએ બાંગ્લાદેશને T20 સિરીઝમાં પણ હરાવ્યું છે. સૂર્યકુમાર યાદવની કપ્તાનીમાં ભારતે T20 સિરીઝ 3-0થી જીતી હતી. ટીમ ઈન્ડિયાએ ત્રીજી T20 મેચ 133 રને જીતી લીધી છે. સંજુ સેમસનને તેના શાનદાર પ્રદર્શન માટે પ્લેમેકર ઓફ ધ મેચ પસંદ કરવામાં આવ્યો હતો. આ સિવાય હાર્દિક પંડ્યાને પ્લેયર ઓફ ધ સિરીઝ પસંદ કરવામાં આવ્યો હતો.