IND Vs ENG: જીત બાદ ભાવુક થયો રોહિત, વિરાટે કર્યું આ કામ

• રોહિત શર્મા સેમિફાઈનલમાં જીત બાદ ભાવુક થયો
  
• રોહિત-વિરાટનો એક ફોટો વાયરલ થઈ રહ્યો છે
• આ ફોટોમાં બંને વચ્ચે શાનદાર બોન્ડિંગ જોવા મળે છે

ટીમ ઈન્ડિયાએ ટી20 વર્લ્ડકપની સેમીફાઈનલમાં ઈંગ્લેન્ડને 68 રને હરાવીને 2022ની સેમીફાઈનલમાં મળેલી હારનો બદલો લીધો હતો. આ શાનદાર જીત બાદ ભારતીય ટીમે ફાઈનલમાં પ્રવેશ કરી લીધો છે. જ્યાં તેનો સામનો દક્ષિણ આફ્રિકા સામે થશે. ઈંગ્લેન્ડ સામેની આ ઐતિહાસિક જીત બાદ ટીમ ઈન્ડિયાનો કેપ્ટન રોહિત શર્મા ભાવુક જોવા મળ્યો હતો. તે ડ્રેસિંગ રૂમમાં રડવા લાગ્યો. રોહિતનો એક ફોટો વાયરલ થઈ રહ્યો છે. જેમાં તે પોતાની ગરદન નીચી કરીને અને હાથ વડે આંખોને સાફ કરતો જોવા મળે છે. તેની બાજુમાં વિરાટ કોહલી ઉભો છે. જેઓ તેમને સંભાળતા જોવા મળે છે.

વનડે વર્લ્ડકપમાં હારની યાદ અપાવી

સોશિયલ મીડિયા પર બે મહાન ખેલાડીઓના આ ફોટોને કરોડો ફેન્સ લાઈક કરી રહ્યા છે. મેદાન પર અને મેદાનની બહાર ઘણી વખત બંને વચ્ચે એક શાનદાર બોન્ડિગ જોવા મળ્યું છે. રોહિતના આ ફોટાએ વનડે વર્લ્ડ કપ 2023ની પણ યાદ અપાવી છે. જ્યારે ઓસ્ટ્રેલિયા સામેની ફાઈનલ હાર બાદ તે રડતો જોવા મળ્યો હતો. પરંતુ ત્યારે દુ:ખના આંસુ હતા અને આ વખતે વિજયની ખુશીના આંસુ હતા. કેપ્ટન અને વિરાટના આ એક ફોટોએ લાખો ફેન્સનું દિલ જીતી લીધું છે.

રોહિતનું શાનદાર પ્રદર્શન

ઈંગ્લેન્ડ સામેની આ શાનદાર જીત બાદ રોહિત શર્માની કેપ્ટનશિપના વખાણ થઈ રહ્યા છે. તેને કેપ્ટનશિપમાં શાનદાર પ્રદર્શન કરીને ટીમ ઈન્ડિયાને 10 વર્ષ પછી ફાઈનલમાં પહોંચાડ્યું છે. ઓસ્ટ્રેલિયા સામે 92 રનની વિસ્ફોટક ઈનિંગ બાદ રોહિતે ઈંગ્લેન્ડ સામેની આ મોટી મેચમાં 57 રનની મોટી ઈનિંગ રમી હતી. જેના કારણે ટીમ ઈન્ડિયાએ 171 રનનો મોટો સ્કોર બનાવ્યો હતો. જેનો પીછો કરતા ઈંગ્લેન્ડની ટીમ 16.4 ઓવરમાં 103 રનમાં જ ઓલ આઉટ થઈ ગઈ હતી. હવે દક્ષિણ આફ્રિકા સામેની ફાઈનલમાં હિટમેનનું પ્રદર્શન જોવા જેવું રહેશે.