- ભારત અને સાઉથ આફ્રિકા વચ્ચે બીજી ટેસ્ટ કેપટાઉનમાં રમાશે
- ફાસ્ટ બોલર ગેરાલ્ડ કોએત્ઝી ઈજાના કારણે ટીમમાંથી બહાર
- પ્રથમ ટેસ્ટ હાર્યા બાદ ભારતીય ટીમ સિરીઝમાં 0-1થી પાછળ
ભારત અને સાઉથ આફ્રિકા વચ્ચે ટેસ્ટ સિરીઝની બીજી મેચ કેપટાઉનમાં રમાશે. આ મેચ પહેલા સાઉથ આફ્રિકાને મોટો ઝટકો લાગ્યો છે. ફાસ્ટ બોલર ગેરાલ્ડ કોએત્ઝી ટીમની બહાર થઈ ગયો છે. તે 3 જાન્યુઆરીથી રમાનારી ભારત અને સાઉથ આફ્રિકા વચ્ચેની મેચ માટે ઉપલબ્ધ રહેશે નહીં. સાઉથ આફ્રિકાએ આ અંગે માહિતી શેર કરતા કહ્યું કે, ગેરાલ્ડ કોએત્ઝી ટેસ્ટ સિરીઝની પ્રથમ મેચમાં ઈજાના કારણે મુશ્કેલીનો સામનો કરી રહ્યો હતો. તેથી, તે બીજી મેચમાં ઉપલબ્ધ રહેશે નહીં
બીજી ટેસ્ટમાં કોએત્ઝી બહાર
ભારત અને સાઉથ આફ્રિકા વચ્ચે ટેસ્ટ સિરીઝની પ્રથમ મેચ સેન્ચુરિયનમાં રમાઈ હતી. આ મેચમાં ભારતને ખરાબ રીતે હારનો સામનો કરવો પડ્યો હતો. સાઉથ આફ્રિકાના ફાસ્ટ બોલર ગેરાલ્ડ કોએત્ઝી આ મેચમાં ઈજાથી પીડાઈ રહ્યા હતા. બોર્ડે તેને ગંભીરતાથી લઈને સ્કેનિંગ માટે મોકલી આપ્યો છે. સાઉથ આફ્રિકાએ હજુ સુધી કોએત્ઝીના સ્થાને અન્ય કોઈ ખેલાડીના નામની જાહેરાત કરી નથી.
ભારતનો કારમો પરાજય
સેન્ચુરિયનમાં રમાયેલી ટેસ્ટ મેચમાં ભારતને હારનો સામનો કરવો પડ્યો હતો. આ મેચમાં ભારતે પ્રથમ દાવમાં 245 રન અને બીજા દાવમાં 131 રન બનાવ્યા હતા. જવાબમાં સાઉથ આફ્રિકાએ પ્રથમ દાવમાં 408 રન બનાવ્યા હતા. આથી આફ્રિકાએ મેચ એક ઇનિંગ્સ અને 32 રને જીતી લીધી હતી. કોએત્ઝીએ પ્રથમ દાવમાં 16 ઓવર ફેંકી હતી. આ દરમિયાન તેણે 74 રનમાં એક વિકેટ લીધી હતી. બીજા દાવમાં તે માત્ર 5 ઓવર જ ફેંકી શક્યો હતો. આ દરમિયાન તેણે 28 રન આપ્યા હતા. આ મેચ દરમિયાન બોલિંગ કરતી વખતે કોએત્ઝી ગંભીર રીતે ઈજાગ્રસ્ત થયો હતો.
