મયંક અગ્રવાલની ટીમે જીત્યું દુલીપ ટ્રોફીનું ટાઈટલ, ઈન્ડિયા Cને 132 રનથી હરાવ્યું

મયંક અગ્રવાલની કપ્તાનીવાળી ઈન્ડિયા A ટીમે દુલીપ ટ્રોફી 2024નો ખિતાબ જીત્યો છે. ઈન્ડિયા-A એ ઈન્ડિયા-Cને 132 રને હરાવ્યું છે. રુતુરાજ ગાયકવાડની આગેવાની હેઠળની ઈન્ડિયા C ટીમ માટે સાઈ સુદર્શને સદી ફટકારી હતી. પરંતુ તે ટીમને જીત અપાવી શક્યો ન હતો. ગાયકવાડ પ્રથમ દાવમાં કંઈ ખાસ કરી શક્યો નહોતો. તે બીજા દાવમાં 44 રન બનાવીને પેવેલિયન પરત ફર્યો હતો. ઈન્ડિયા માટે શાશ્વત રાવતે પ્રથમ ઇનિંગમાં સદી અને બીજી ઇનિંગમાં ફિફ્ટી ફટકારી હતી.

ઈન્ડિયા-Aનું પ્રદર્શન

ઈન્ડિયા-A એ પ્રથમ દાવમાં 297 રન બનાવ્યા હતા. આ દરમિયાન શાશ્વતે શાનદાર બેટિંગ કરી હતી. તેણે 250 બોલનો સામનો કરીને 124 રન બનાવ્યા હતા. શાશ્વતની આ ઇનિંગમાં 15 ફોર સામેલ હતી. આવેશ ખાને અણનમ ફિફ્ટી ફટકારી હતી. તેણે 68 બોલમાં 51 રન બનાવ્યા હતા. આ પછી ઈન્ડિયા-A એ 286 રન બનાવીને બીજી ઇનિંગ ડિકલેર કરી હતી. આ દરમિયાન રિયાન પરાગે 73 રનનું યોગદાન આપ્યું હતું. રિયાને 5 ફોર અને 1 સિક્સ ફટકારી હતી. શાશ્વતે 53 રન બનાવ્યા હતા. કુશાગ્રાએ 42 રનની ઇનિંગ રમી હતી.

સુદર્શનની સદીથી પણ ઈન્ડિયા-C જીતી શક્યું ન હતું 

ગાયકવાડના નેતૃત્વમાં ટીમ ઈન્ડિયા Cએ પ્રથમ દાવમાં 234 રન બનાવ્યા હતા. આ દરમિયાન અભિષેક પોરેલે 82 રનની ઇનિંગ રમી હતી. તેણે 9 ફોર ફટકારી હતા. રજત પાટીદાર શૂન્ય પર આઉટ થયો હતો. સાઈ સુદર્શન 17 રન બનાવીને પેવેલિયન પરત ફર્યો હતો. બીજા દાવમાં ટીમ 217 રન બનાવીને ઓલઆઉટ થઈ ગઈ હતી. ગાયકવાડે 44 રનનું યોગદાન આપ્યું હતું. જ્યારે સુદર્શને સદી ફટકારી હતી. તેણે 206 બોલમાં 111 રન બનાવ્યા હતા. જોકે તે ટીમને જીત અપાવી શક્યો નહોતો. આ સિવાય કોઈ ખાસ કરી શક્યું નહીં.