- પેરિસ ઓલિમ્પિક 26 જુલાઈથી 11 ઓગસ્ટ સુધી ચાલશે
- પેરિસ ઓલિમ્પિકમાં ભારતના 117 ખેલાડીઓ ભાગ લેશે
- સહાયક સ્ટાફના 72 સભ્યોને સરકારી ખર્ચે મંજૂરી આપવામાં આવી
પેરિસ ઓલિમ્પિક 26 જુલાઈથી શરૂ થશે અને 11 ઓગસ્ટ સુધી ચાલશે.પેરિસ ઓલિમ્પિકમાં ભારતના 117 ખેલાડીઓ ભાગ લેશે. આ સિવાય રમત મંત્રાલયે સપોર્ટ સ્ટાફના 140 સભ્યોને પણ મંજૂરી આપી છે, જેમાં સ્પોર્ટ્સ ઓફિસર પણ સામેલ છે. સહાયક સ્ટાફના 72 સભ્યોને સરકારી ખર્ચે મંજૂરી આપવામાં આવી છે. ટોક્યો ઓલિમ્પિકમાં ભારતના 119 ખેલાડીઓએ ભાગ લીધો હતો, જેમણે 7 મેડલ જીત્યા હતા. જેમાં નીરજ ચોપરાએ ભાલા ફેંકમાં જીતેલા ઐતિહાસિક ગોલ્ડ મેડલનો સમાવેશ થાય છે.
પેરિસ ઓલિમ્પિક માટે ક્વોલિફાય થયેલા ખેલાડીઓમાં માત્ર શોટ પુટ એથ્લીટ આભા ખટુઆનું નામ યાદીમાં નથી. વર્લ્ડ રેન્કિંગ દ્વારા ક્વોટા હાંસલ કરનાર આભા ખટુઆનું નામ હટાવવા અંગે કોઈ સ્પષ્ટતા કરવામાં આવી નથી. થોડા દિવસો પહેલા ઓલિમ્પિકમાં ભાગ લેનાર ખેલાડીઓની વર્લ્ડ એથ્લેટિક્સની યાદીમાંથી તેનું નામ હટાવી દેવામાં આવ્યું હતું.
72 સભ્યોને સરકારી ખર્ચે મંજૂરી આપવામાં આવી
રમતગમત મંત્રાલય દ્વારા ભારતીય ઓલિમ્પિક એસોસિએશન (IOA)ના પ્રમુખ પીટી ઉષાને લખેલા પત્રમાં કહેવામાં આવ્યું છે કે, 'ઓલિમ્પિક ગેમ્સ 2024ની ઓર્ગેનાઈઝિંગ કમિટીના નિયમો અનુસાર, સપોર્ટ સ્ટાફના માત્ર 67 સભ્યો જ જઈ શકે છે. ગેમ્સ વિલેજમાં IOA સહિત 11 અધિકારીઓ પણ સામેલ છે. અધિકારીઓમાં 5 સભ્યો મેડિકલ ટીમના છે.પત્રમાં કહેવામાં આવ્યું છે કે, 'ખેલાડીઓની જરૂરિયાતોને પહોંચી વળવા માટે, 72 વધારાના કોચ અને અન્ય સહાયક સ્ટાફને સરકારી ખર્ચે મંજૂરી આપવામાં આવી છે અને તેમના રહેવાની વ્યવસ્થા હોટલ અને ગેમ્સ વિલેજની બહારના સ્થળોએ કરવામાં આવી છે.'
જાણો કઈ રમતમાં કેટલા ખેલાડી લેશે ભાગ
ખેલાડીઓની યાદીમાં સૌથી વધુ 29 (11 મહિલા અને 18 પુરૂષ) ખેલાડીઓ એથ્લેટિક્સના છે. તેમના પછી શૂટિંગ (21) અને હોકી (19) આવે છે. ભારતના 8 ખેલાડીઓ ટેબલ ટેનિસમાં ભાગ લેશે જ્યારે બે વખતની ઓલિમ્પિક મેડલ વિજેતા પીવી સિંધુ સહિત 7 ખેલાડીઓ બેડમિન્ટનમાં ભાગ લેશે. કુસ્તી (6), તીરંદાજી (6) અને બોક્સિંગ (6) ખેલાડીઓ ભાગ લઈ રહ્યા છે. આ પછી ગોલ્ફ (4), ટેનિસ (3), સ્વિમિંગ (2), સેઇલિંગ (2) ખેલાડી ભાગ લેશે. ઘોડેસવારી, જુડો, રોઇંગ અને વેઇટ લિફ્ટિંગમાં એક-એક ખેલાડી ભાગ લેશે.
