બેંગલુરુ ટેસ્ટમાં હારથી વધી ભારતની મુશ્કેલી, WTC પોઈન્ટ ટેબલમાં થયો મોટો ફેરફાર

ટીમ ઈન્ડિયાને બેંગલુરુ ટેસ્ટમાં 8 વિકેટે કારમી હારનો સામનો કરવો પડ્યો છે. ભારતે કિવી ટીમને 107 રનનો ટાર્ગેટ આપ્યો હતો જેને ટીમે બે વિકેટ ગુમાવીને હાંસલ કરી લીધો હતો. આ મેચમાં હાર્યા બાદ વર્લ્ડ ટેસ્ટ ચેમ્પિયનશિપની ફાઇનલમાં પહોંચવાની ભારતની આશાને થોડો આંચકો લાગ્યો છે. આ હાર બાદ ટીમે હવે ઓસ્ટ્રેલિયા સામેની બોર્ડર-ગાવસ્કર સિરીઝમાં પ્રયાસો કરવા પડશે.

કેટલી મેચ જીતવી જરૂરી

ભારતે હવે WTC ફાઈનલ પહેલા કુલ સાત મેચ રમવાની છે. ટીમને આમાંથી ચાર મેચ જીતવી જરૂરી છે. બેંગલુરુમાં હાર્યા બાદ ટીમે હવે કિવી ટીમ સામે ત્રણ મેચની સિરીઝની આગામી બે મેચ જીતવી પડશે. આટલું જ નહીં, ટીમને પાંચ મેચની બોર્ડર-ગાવસ્કર સિરીઝમાં બે મેચ જીતવી પડશે. આ રીતે સાતમાંથી ચાર મેચ જીતીને ટીમ ઈન્ડિયા સરળતાથી ફાઈનલમાં જગ્યા બનાવી લેશે. પરંતુ ધારો કે ટીમ ઈન્ડિયા આમાંથી માત્ર ત્રણ જ મેચ જીતે છે તો તેણે અન્ય ટીમોના પરિણામો પર નિર્ભર રહેવું પડશે.

ભારતની નજર સતત ત્રીજી વખત ફાઇનલમાં પહોંચવા પર છે

જો ભારત આ વખતે પણ વર્લ્ડ ટેસ્ટ ચેમ્પિયનશિપની ફાઇનલમાં જગ્યા બનાવવામાં સફળ થાય છે, તો તે સતત ત્રીજી વખત બનશે કે જ્યારે ટીમ ફાઇનલમાં જગ્યા બનાવી છે. જોકે ટીમ એક વખત પણ ટાઈટલ જીતવામાં સફળ રહી નથી.

ફાઈનલ લોર્ડ્સમાં રમાશે

પ્રથમ વખત ટીમને ન્યુઝીલેન્ડ સામે અને બીજી વખત ઓસ્ટ્રેલિયા સામે ટાઈટલ મેચમાં હારનો સામનો કરવો પડ્યો હતો. ICC પહેલા જ જાહેરાત કરી ચૂક્યું છે કે આ વખતે ફાઇનલ મેચ આવતા વર્ષે 11 થી 15 જૂન વચ્ચે લોર્ડ્સમાં રમાશે. 16 જૂનને મેચ માટે રિઝર્વ ડે તરીકે પણ રાખવામાં આવ્યો છે.