- ભારત અને સાઉથ આફ્રિકા મહિલા ક્રિકેટ ટીમ વચ્ચે ODI સિરીઝ
- ભારતીય ટીમે સાઉથ આફ્રિકાને પ્રથમ મેચમાં 143 રનથી હરાવ્યું
- આ મેચમાં સ્મૃતિ મંધાનાએ 127 બોલમાં 117 રન બનાવ્યા હતા
ભારતીય મહિલા ક્રિકેટ ટીમે 3 ODI સિરીઝની પ્રથમ મેચમાં સાઉથ આફ્રિકાને આસાનીથી હરાવ્યું છે. સાઉથ આફ્રિકાની ટીમને 143 રનના વિશાળ અંતરથી હારનો સામનો કરવો પડ્યો હતો. પ્રથમ બેટિંગ કરવા આવેલી ભારતીય ટીમે 50 ઓવરમાં 8 વિકેટે 265 રન બનાવ્યા હતા. આ રીતે સાઉથ આફ્રિકાને 266 રનનો ટાર્ગેટ મળ્યો હતો, પરંતુ તે 37.4 ઓવરમાં માત્ર 122 રનમાં જ સમેટાઈ ગયું હતું. આ જીત બાદ ભારતીય ટીમ 3 વનડે સિરીઝમાં 1-0થી આગળ છે.
આ પહેલા ભારતીય ટીમની કેપ્ટન હરમનપ્રીત કૌરે ટોસ જીતીને બેટિંગ કરવાનો નિર્ણય લીધો હતો. ટીમ ઈન્ડિયા તરફથી ઓપનર સ્મૃતિ મંધાનાએ 127 બોલમાં 117 રન બનાવ્યા હતા. તેણે પોતાની ઇનિંગમાં 12 ફોર અને 1 સિક્સર ફટકારી હતી. આ સિવાય દિપ્તી શર્માએ 48 બોલમાં 37 રન અને પુજા વસ્ત્રકારે 42 બોલમાં 31 રનનું યોગદાન આપ્યું હતું.
