T20 વર્લ્ડકપ પછી વાગશે IPLનું બ્યુગલ, આ દિવસે થશે હરાજી!

• ઈન્ડિયન પ્રીમિયર લીગ 2023ની તૈયારીઓ શરૂ
  
• IPL 2023 માટે ડિસેમ્બરમાં યોજાઈ શકે છે મીની હરાજી
• હરાજી માટે દરેક ટીમના પર્સમાં 95 કરોડ રૂપિયા હશે

ઈન્ડિયન પ્રીમિયર લીગ-2023ની તૈયારીઓ શરૂ થઈ ગઈ છે. રિપોર્ટ અનુસાર, હરાજી ડિસેમ્બર મહિનામાં થઈ શકે છે, જે એક પ્રકારની મીની હરાજી હશે. આ વખતે આઈપીએલ તેની જૂની સ્ટાઈલમાં પરત ફરવા જઈ રહી છે, જ્યાં દરેક ટીમના હોમ ગ્રાઉન્ડ પર મેચો યોજાવાની છે.

IPL 2023 માટે મીની હરાજી

ટીમ ઈન્ડિયા હાલમાં T20 વર્લ્ડકપની તૈયારી કરી રહી છે અને આ વર્લ્ડકપ આવતા મહિને ઓસ્ટ્રેલિયામાં રમાવાનો છે. આ દરમિયાન ક્રિકેટ ચાહકો માટે વધુ એક મોટા સમાચાર આવ્યા છે, ડિસેમ્બરમાં ઈન્ડિયન પ્રીમિયર લીગ 2023 માટે હરાજી થઈ શકે છે. આ એક મીની હરાજી હશે, જેનું સ્થળ હજુ નક્કી કરવામાં આવ્યું નથી.

16 ડિસેમ્બરે યોજાશે હરાજી!

BCCI ડિસેમ્બરના બીજા કે ત્રીજા સપ્તાહમાં આ હરાજી કરી શકે છે. એવું માનવામાં આવે છે કે 16 ડિસેમ્બરે, આ હરાજી IPL 2023 માટે થઈ શકે છે. IPL 2022 પહેલા એક મેગા ઓક્શન યોજાયો હતો, જેથી આ વખતે એક સરળ હરાજી જ થશે.

દરેક ટીમના પર્સમાં 95 કરોડ રૂપિયા

હરાજી માટે દરેક ટીમના પર્સમાં 95 કરોડ રૂપિયા હશે, જો કોઈ ખેલાડી બહાર જશે તો તે મુજબ ટીમના પર્સમાં રકમ વધી જશે. આ વખતે ટીમના પર્સમાં ગયા વર્ષની સરખામણીએ 5 કરોડ રૂપિયા વધુ છે, તેથી જોવાનું રહેશે કે ટીમો આ વખતે મિની IPLમાં કેવો ખર્ચ કરે છે.

ખેલાડીઓની હરાજીમાં થશે મોટા ઉલટફેર

IPL 2022 પછી ઘણી ટીમોમાં ખેલાડીઓના પ્રદર્શનની ચર્ચા હતી. આવી સ્થિતિમાં આ IPLમાં ઘણા મોટા સોદા જોવા મળી શકે છે, જેમાં ચેન્નાઈ સુપર કિંગ્સના રવિન્દ્ર જાડેજા, ગુજરાત ટાઈટન્સના શુભમન ગિલ જેવા ખેલાડીઓનું નામ આવે તેવી શક્યતા છે.

આ વખતની IPL ખાસ છે

BCCI પ્રમુખ સૌરવ ગાંગુલી પહેલા જ જાહેરાત કરી ચૂક્યા છે કે IPL 2023 તેની જૂની શૈલીમાં રમાશે. એટલે કે આ વખતે IPL ભારતમાં યોજાશે અને હોમ-અવે મેચની જેમ આયોજિત કરવામાં આવશે. એટલે કે, દરેક ટીમના હોમ ગ્રાઉન્ડમાં મેચો યોજાશે.

BCCI મોટા ઈવેન્ટની તૈયારીમાં વ્યસ્ત

આ IPL ઘણી રીતે ખાસ બનવાની છે, કારણ કે માનવામાં આવે છે કે આ મહેન્દ્ર સિંહ ધોનીની છેલ્લી IPL સાબિત થશે. આ સિવાય મહિલા IPL પણ વર્ષ 2023થી શરૂ થઈ શકે છે, તેથી BCCI આ તમામ મોટા ઈવેન્ટની તૈયારીમાં પહેલેથી જ વ્યસ્ત છે.