- ચેન્નાઈની એ જીતમાં રવિન્દ્ર જાડેજા હીરો હતો
- મોહિત શર્માની ઓવરમાં ફોર મારીને ચેન્નાઈને ચેમ્પિયન બનાવ્યું હતું
- મેચમાં હાજર તમામ ફેન્સ સીટ પરથી ઊભા થઈને સમ્માન આપશે
IPL 2024 ની 7મી મેચ ચેન્નાઈ સુપર કિંગ્સ અને ગુજરાત ટાઇટન્સ વચ્ચે રમાશે. આ મેચમાં ગત સિઝનની બંને ફાઇનલિસ્ટ ટીમો આમને-સામને ટકરાશે. ગત સિઝનની ફાઇનલ મેચ ગુજરાત ટાઇટન્સ અને ચેન્નાઇ સુપર કિંગ્સ વચ્ચે રમાઇ હતી. ચેન્નાઈ સુપર કિંગ્સ ટીમ તે સિઝનમાં ચેમ્પિયન બની હતી. ધોનીની કપ્તાનીમાં CSKએ પાંચમું ટાઈટલ જીતીને મુંબઈની બરાબરી કરી હતી. ચેન્નાઈની એ જીતમાં રવિન્દ્ર જાડેજા હીરો હતો. તેણે મોહિત શર્માની ઓવરમાં ચોગ્ગો ફટકારીને ચેન્નાઈને ચેમ્પિયન બનાવ્યું હતું. હવે એ જ રવિન્દ્ર જાડેજા ચેપોકમાં એ જ ફાઇનલિસ્ટ ટીમ સામે વિશેષ સન્માન મેળવશે.
સમગ્ર ચેપોક સર જાડેજાનું સન્માન કરશે
CSKના તમામ ફેન્સ અને સોશિયલ મીડિયા એકાઉન્ટ્સે આ વિશેષ સન્માન આપવાની જાહેરાત કરી છે. સત્તાવાર ઇન્સ્ટાગ્રામ પર એક ખાસ પોસ્ટ કરવામાં આવી હતી અને તેમાં લખવામાં આવ્યું હતું કે, IPL 2024 ની સાતમી મેચ શરૂ થયા પછી બરાબર 7.38 વાગ્યે ચેપોકમાં હાજર તમામ ફેન્સ તેમની બેઠકો પરથી ઉભા થઈને રવિન્દ્ર જાડેજાને માન આપશે. નોંધનીય છે કે મેચ ભારતીય સમય અનુસાર સાંજે 7.30 કલાકે શરૂ થશે. આ રીતે, તેઓ ગયા સિઝનમાં જીતેલા વિજય માટે સન્માનિત થશે.
ધોનીએ જાડેજાને ખભા પર ઉઠાવીને ઉજવણી કરી હતી
રવિન્દ્ર જાડેજાએ IPL 2023ની ફાઇનલમાં માત્ર 6 બોલ રમ્યા હતા. પરંતુ માત્ર આ 6 બોલમાં તે આખી મેચનો હીરો બની ગયો હતો. તેણે 6 બોલમાં 15 રનની અણનમ ઇનિંગ રમી હતી. પરંતુ તેની ઇનિંગ સદી કરતાં વધુ હતી કારણ કે તેણે ચેન્નાઈને મેચ જીતીને ચેમ્પિયન બનાવ્યું હતું જ્યાંથી ગુજરાતની જીત નિશ્ચિત જણાતી હતી. આ પછી એમએસ ધોનીએ તેને ખભા પર ઉઠાવીને ઉજવણી કરી. તેની તસવીર સિઝનનો ફોટો બની ગઈ. આજે પણ CSK કે ધોની-જાડેજાના ફેન્સ તેને યાદ કરે છે.
ધોનીએ કેપ્ટનશીપ છોડી દીધી
વર્તમાન સિઝન IPL 2024ના એક દિવસ પહેલા એમએસ ધોનીએ તેની કેપ્ટનશીપ છોડવાનો નિર્ણય લીધો હતો. આટલું જ નહીં ધોનીએ ટીમની કમાન રૂતુરાજ ગાયકવાડને સોંપી હતી. ધોનીએ 2022 IPL પહેલા પણ આવું જ કર્યું હતું અને રવિન્દ્ર જાડેજાને કેપ્ટન બનાવ્યો હતો. પરંતુ તેના કારણે ટીમનો ગ્રાફ નીચે ગયો અને જાડેજા પણ દબાણમાં આવી ગયો. આ કારણોસર ધોનીએ સિઝનના મધ્યમાં ફરી કમાન સંભાળી હતી. હવે ધોનીએ રુતુરાજને કમાન સોંપી છે અને જાડેજા ટીમનો બીજો સૌથી સિનિયર ખેલાડી છે. આવી સ્થિતિમાં આ વખતે રૂતુરાજને માર્ગદર્શન આપવાની જવાબદારી પણ તેમની પાસે રહેશે.
