- ગૌતમ ગંભીર કોલકાતા નાઈટ રાઈડર્સમાં વાપસી કરી
- ગૌતમ ગંભીરે IPL ફ્રેન્ચાઇઝી લખનૌ સુપર જાયન્ટ્સને છોડી
- ગંભીરને કોલકાતા નાઈટ રાઈડર્સ મેન્ટર તરીકે નિયુક્ત કર્યો
ગૌતમ ગંભીર કોલકાતા નાઈટ રાઈડર્સમાં વાપસી કરી રહ્યો છે. શાહરૂખ ખાનની ટીમ KKRનએ ગૌતમ ગંભીરને IPL 2024 માટે તેના મેન્ટર તરીકે નિયુક્ત કર્યા છે. કોલકાતા નાઈટ રાઈડર્સે IPLમાં અત્યાર સુધી માત્ર બે વખત ટ્રોફી જીતી છે અને બંને વખત તેમની ટીમનો કેપ્ટન ગૌતમ ગંભીર હતો. IPLમાં ગૌતમ ગંભીરની સૌથી સફળ ટીમ કોલકાતા નાઈટ રાઈડર્સ રહી છે. તેણે ઘણા વર્ષો સુધી આ ટીમનું નેતૃત્વ કર્યું, અને IPL 2012 અને IPL 2014 ના ટાઇટલ જીતીને બે વાર KKR ને ચેમ્પિયન પણ બનાવ્યું હતું.
ગૌતમ ગંભીર કેકેઆરમાં પાછો ફર્યો
ભારતીય ક્રિકેટ ટીમના આ પૂર્વ બેટ્સમેને IPL 2011 થી IPL 2017 સુધી કોલકાતા નાઈટ રાઈડર્સ માટે ક્રિકેટ રમી હતી, પરંતુ IPL 2018માં તે દિલ્હીની ટીમમાં પાછો ફર્યો હતો, ત્યારબાદ તેણે IPLમાંથી નિવૃત્તિ પણ લઈ લીધી હતી. હવે ગૌતમ ગંભીર IPLમાં મેન્ટર તરીકે ટીમ સાથે રહે છે. IPL 2022માં નવી ટીમ લખનૌ સુપર જાયન્ટ્સે ગૌતમ ગંભીર સાથે તેની કારકિર્દીની શરૂઆત કરી હતી, પરંતુ તે લાંબો સમય ટકી શક્યો નહીં. ગૌતમ ગંભીરના માર્ગદર્શન હેઠળ, લખનૌની ટીમ IPL 2022ના પોઈન્ટ ટેબલમાં નંબર-3 પર હતી, જ્યારે IPL 2023માં પણ આ ટીમે તેનો લીગ સ્ટેજ નંબર-3 પર પુરો કર્યો હતો.
ગૌતમ ગંભીરે લખનૌ સુપર જાયન્ટ્સને છોડી
જો કે, લખનૌની સાથે IPLમાં પ્રવેશેલી બીજી નવી ટીમ, ગુજરાત ટાઇટન્સ, આશિષ નેહરાના માર્ગદર્શન હેઠળ IPL 2022 જીતી હતી અને 2023માં ફાઇનલમાં પણ પહોંચી હતી, પરંતુ લખનૌની ટીમ એકવાર પણ ફાઇનલમાં પહોંચી શકી નહોતી. હવે ગૌતમ ગંભીર લખનૌ છોડીને પોતાની જૂની અને સૌથી સફળ ટીમ કોલકાતા નાઈટ રાઈડર્સ સાથે જોડાઈ ગયો છે. આવી સ્થિતિમાં, તે જોવાનું રહેશે કે કોલકાતાની ટીમમાં તેના સૌથી જૂના અને સૌથી સફળ સુકાનીની વાપસી બાદ શું ફેરફારો થાય છે.
લખનૌનો આભાર માન્યો
ગૌતમ ગંભીરે ટ્વિટર પર એક ટ્વિટમાં લખનૌ સુપર જાયન્ટ્સ અને તેમના માલિકનો આભાર માન્યો છે. તે જ સમયે, કોલકાતા નાઈટ રાઈડર્સ ટીમે એક પ્રેસ રિલીઝ જારી કરીને માહિતી આપી છે કે, "ગૌતમ ગંભીર 'માર્ગદર્શક' તરીકે KKRમાં પરત ફરશે અને મુખ્ય કોચ ચંદ્રકાંત પંડિત સાથે મળીને ટીમને આગળ લઈ જશે."
