- રોહિત શર્મા મુંબઈ ઈન્ડિયન્સનો સાથ છોડવાની અટકળો ચાલું છે
- વાનખેડે સ્ટેડિયમમાં દર્શકોએ ઉભા થઈને રોહિતનું અભિવાદન કર્યું
- ટીમના મુખ્ય કોચ માર્ક બાઉચરે રોહિતના ભવિષ્યને લઈને મૌન તોડ્યું
મુંબઈ ઈન્ડિયન્સનો બેટ્સમેન રોહિત શર્મા ફ્રેન્ચાઈઝીનો સાથ છોડવાની અટકળો ચાલી રહી છે. લખનૌ સુપરજાયન્ટ્સ સામેની વર્તમાન સિઝનની મુંબઈની છેલ્લી મેચ પછી, આ સમાચારને વધુ બળ મળ્યું જ્યારે રોહિત આઉટ થઈને પેવેલિયનમાં પરત ફરી રહ્યો હતો અને વાનખેડે સ્ટેડિયમમાં હાજર દર્શકોએ ઉભા થઈને તેનું અભિવાદન કર્યું. હવે ટીમના મુખ્ય કોચ માર્ક બાઉચરે રોહિતના ભવિષ્યને લઈને પોતાનું મૌન તોડ્યું છે અને જણાવ્યું છે કે તેણે આ અંગે પૂર્વ કેપ્ટન સાથે શું વાતચીત કરી હતી.
'આગળ શું થશે તેની કોઈને ખબર નથી'
બાઉચરે કહ્યું, પ્રામાણિકપણે કહું તો રોહિતના ભવિષ્ય વિશે વધારે ચર્ચા થઈ નથી. આ સિઝનની થોડી સમીક્ષા કરવા માટે મેં તેમની સાથે વાત કરી અને મેં તેમને પૂછ્યું, તમે આગળ શું વિચારી રહ્યા છો? તેના પર રોહિતે કહ્યું કે તે T20 વર્લ્ડકપ વિશે વિચારી રહ્યો છે, જે યોગ્ય છે. મારા માટે રોહિત પોતાના ભાગ્યનો માસ્ટર છે. આગામી સિઝન માટે એક મોટી હરાજી ચાલી રહી છે અને આગળ શું થવાનું છે તે કોઈને ખબર નથી.
વર્તમાન સિઝનમાં મુંબઈ માટે રોહિતે સૌથી વધુ રન બનાવ્યા
રોહિત શર્માનું ફોર્મ આ સિઝનમાં ચિંતાનો વિષય બની શકે છે, પરંતુ તે IPL 2024માં તેની ટીમ માટે સૌથી વધુ રન બનાવનાર ખેલાડી હતો. રોહિતે 14 ઇનિંગ્સમાં 32.07ની એવરેજથી 427 રન બનાવ્યા જેમાં એક સદી અને બે અડધી સદી સામેલ છે. મુંબઈ માટે રોહિતની સૌથી સફળ સિઝન 2016 હતી જ્યારે તેણે 400 રનનો આંકડો પાર કર્યો હતો અને હવે 8 વર્ષ પછી તેણે ફરીથી આ સિદ્ધિ મેળવી છે.
'ચાહકોના હોબાળાને કારણે હાર્દિકને મુશ્કેલીનો સામનો કરવો પડ્યો'
બાઉચરનું કહેવું છે કે રોહિતની જગ્યાએ આ સિઝનમાં મુંબઈનો કેપ્ટન બનેલા હાર્દિક પંડ્યાને પણ પ્રશંસકોની બૂમાબૂમને કારણે મુશ્કેલીનો સામનો કરવો પડ્યો હતો. બાઉચરે કહ્યું, ચાહકો તરફથી આવી પ્રતિક્રિયાઓ સાંભળવી એ સારો અનુભવ નથી. હું હાર્દિક માટે ખૂબ જ ખરાબ અનુભવી રહ્યો હતો. આવા અનુભવમાંથી પસાર થવું બિલકુલ સરળ નથી. આવી ઘણી બાબતો છે જેની આપણે ચર્ચા કરવાની જરૂર છે. હાર્દિકની આસપાસ ઘણી બધી બાબતો ચાલી રહી હતી જે તેની યોજનાઓને અસર કરી રહી હતી. કેપ્ટન તરીકે હાર્દિક માટે તે ઘણો મુશ્કેલ સમય હતો.
આ સિઝનમાં હાર્દિકનું પ્રદર્શન નિરાશાજનક રહ્યું
IPLની વર્તમાન સિઝન હાર્દિક માટે ઘણી રીતે નિરાશાજનક રહી. માત્ર કેપ્ટન તરીકે જ નહીં પણ એક ખેલાડી તરીકે પણ હાર્દિક પ્રભાવ પાડી શક્યો નથી. હાર્દિકે આ સિઝનમાં 13 ઇનિંગ્સમાં 18ની એવરેજથી 216 રન બનાવ્યા છે. આ સિવાય તે બોલથી કંઈ ખાસ કરી શક્યો ન હતો અને 12 ઈનિંગ્સમાં માત્ર 11 વિકેટ જ લઈ શક્યો હતો. આ સમયગાળા દરમિયાન તેની ઇકોનોમી 10.75 હતી.
