- દિનેશ કાર્તિકે IPLમાંથી નિવૃત્તિની જાહેરાત કરી
- RCBએ દિનેશ કાર્તિકને ભવ્ય વિદાય આપી હતી
- કોહલીએ કાર્તિક સાથેની કેટલીક ખાસ ક્ષણો શેર કરી
ટીમ ઈન્ડિયા અને RCBના સ્ટાર વિકેટકીપર બેટ્સમેન દિનેશ કાર્તિકે IPLમાંથી નિવૃત્તિની જાહેરાત કરી છે. જો કે કાર્તિકે આ અંગે પહેલા જ કહ્યું હતું કે આ તેની છેલ્લી IPL સિઝન હશે. દિનેશ માટે સીઝન-17 શાનદાર રહી છે અને જ્યારે પણ તેને તક મળી ત્યારે તેણે તેની ટીમ RCBને નિરાશ થવા દીધી ન હતી. કાર્તિકે તેની છેલ્લી મેચ રાજસ્થાન રોયલ્સ સામે રમી હતી, જે RCB માટે એલિમિનેટર મેચ હતી.
RCB આ મેચ હારી ગયું હતું. જે બાદ RCBએ દિનેશ કાર્તિકને ભવ્ય વિદાય આપી હતી. હવે ટીમે સોશિયલ મીડિયા પર કાર્તિક માટે એક ખાસ વીડિયો શેર કર્યો છે. જેમાં વિરાટ કોહલી અને કાર્તિકની પત્ની દીપિકા પલ્લીકલ દિનેશ વિશે વાત કરતા જોવા મળે છે.
દિનેશની પત્ની દીપિકા ભાવુક થઈ ગઈ
RCBએ તેના X એકાઉન્ટ પર દિનેશ કાર્તિકને લઈને એક ખાસ વીડિયો શેર કર્યો છે. જેમાં દિનેશ કાર્તિકની પત્ની દીપિકા પલ્લીકલ કહે છે કે મેં જોયું છે કે જ્યારે તે સારું પ્રદર્શન કરી શક્યો ન હતો ત્યારે તેને ટીમમાંથી બહાર કરી દેવામાં આવ્યો હતો. જો તેની જગ્યાએ બીજું કોઈ હોત તો કદાચ તે અત્યાર સુધીમાં હારી ગયો હોત પણ તેણે ક્યારેય હાર માની નહીં. દરેક વખતે તેણે પોતાની જાતને મજબૂત કરી અને સાબિત કરી. તેમનું વલણ ક્યારેય હાર ન માનવા જેવું રહ્યું છે. તે અત્યારે જે સ્તર પર છે અને તેણે જે હાંસલ કર્યું છે. હવે તેઓ તેનાથી સંતુષ્ટ છે. તેણે હવે આગળ વધવાનું નક્કી કર્યું છે.
કોહલીએ કેટલીક ખાસ ક્ષણો શેર કરી
વિરાટ કોહલીએ આ વીડિયોમાં કાર્તિક સાથે વિતાવેલી પળોને યાદ કરી. કોહલીએ કહ્યું કે હું દિનેશને પહેલીવાર 2009માં મળ્યો હતો જ્યારે અમે સાઉથ આફ્રિકામાં ચેમ્પિયન્સ ટ્રોફી રમી રહ્યા હતા. તે સમયે અમે પહેલીવાર ડ્રેસિંગ રૂમ શેર કર્યો હતો. મને દિનેશ એકદમ મનોરંજક લાગ્યો. હું દિનેશ વિશે એટલું જ કહેવા માંગુ છું કે તે ક્યારેય રોકાયો નથી. તે શરૂઆતથી જ શાનદાર બેટ્સમેન રહ્યો છે. હું દિનેશ સાથે મેદાનની બહાર પણ વાત કરું છું અને તેને ક્રિકેટની સાથે સાથે ઘણી બધી બાબતોની જાણકારી છે. જ્યારે મારી IPL 2022ની સિઝન સારી ચાલી રહી ન હતી, ત્યારે મેં દિનેશ સાથે વાત કરી અને તેણે મારો આત્મવિશ્વાસ વધાર્યો, જે મને આજે પણ યાદ છે.
