KKRના ખેલાડીનું તોફાન, સિક્સરનો વરસાદ કરી ટીમને અપાવી ફાઈનલની ટિકિટ

અફઘાનિસ્તાનના દિગ્ગજ સ્પિનર અને T20 કેપ્ટન રાશિદ ખાને લગ્ન કરી લીધા છે. રાશિદના લગ્નમાં મોટાભાગની અફઘાન ટીમના સાથીઓએ હાજરી આપી હતી પરંતુ રહેમાનુલ્લાહ ગુરબાઝ લગ્નમાં જોવા મળ્યો ન હતો. ગુરબાઝ કેરેબિયન પ્રીમિયર લીગમાં તબાહી મચાવી રહ્યો છે. ગુરબાઝની 18 બોલની ઇનિંગે ટીમને જીત અપાવવામાં મહત્વની ભૂમિકા ભજવી હતી. આ ઉપરાંત મોઈન અલીના ઓલરાઉન્ડ પ્રદર્શનના આધારે, ગયાના એમેઝોન વોરિયર્સે સતત બીજી વખત CPLની ફાઇનલમાં જગ્યા બનાવી છે.

ગયાના અને બાર્બાડોસ વચ્ચે ટક્કર

પ્રોવિડન્સમાં રમાયેલી ક્વોલિફાયર-2 મેચમાં ગયાનાનો સામનો બાર્બાડોસ રોયલ્સ સામે હતો. વેસ્ટ ઈન્ડિઝના ટી20 કેપ્ટન રોવમેન પોવેલની કપ્તાનીમાં રહેલી બાર્બાડોસની ટીમ આ મેચમાં બેટથી કંઈ ખાસ કરી શકી નથી. ટીમે પ્રથમ બેટિંગ કરી પરંતુ 20 ઓવરમાં માત્ર 148 રન જ બનાવી શકી, જે નોક આઉટ મેચને ધ્યાનમાં રાખીને મોટો સ્કોર ન હતો. આનું કારણ ગયાનાના સ્પિનરો હતા, જેમણે ઈકોનોમિકલી બોલિંગ કરીને સાથે વિકેટ પણ લીધી હતી અને ઈંગ્લેન્ડના ભૂતપૂર્વ ઓલરાઉન્ડર મોઈન અલી આમાં સૌથી આગળ હતા.

મોઈન અલીએ કર્યું શાનદાર પ્રદર્શન

CPL સિઝન મોઈન માટે સારી સાબિત થઈ છે, જેણે તાજેતરમાં જ આંતરરાષ્ટ્રીય ક્રિકેટમાંથી નિવૃત્તિની જાહેરાત કરી હતી. તેણે આ મેચમાં પણ તે જ ફોર્મ બતાવ્યું હતું, જ્યાં તેની ઓફ-બ્રેક બોલિંગનો કોઈ જવાબ નહોતો. મોઈને કેપ્ટન પોવેલ સહિત ટોપ ઓર્ડરની 2 વિકેટ લીધી અને માત્ર 24 રનનો ખર્ચ કર્યા. ગત મેચમાં વિસ્ફોટક અડધી સદી ફટકારનાર મિલરે આ વખતે પણ સારી ઇનિંગ રમી હતી અને 26 બોલમાં 36 રન બનાવ્યા હતા. 19મી ઓવરમાં તે આઉટ થતાં જ બાકીના બેટ્સમેનો વધુ 9 રન જ ઉમેરી શક્યા હતા.

ગુરબાઝે કરી ખતરનાક બેટિંગ

ગયાના તરફથી બેટિંગ કરવા ઉતરેલા ગુરબાઝે ખતરનાક શરૂઆત અપાવી હતી. ગુરબાઝે માત્ર 18 બોલમાં 4 શાનદાર છગ્ગા અને 2 ચોગ્ગા પણ ફટકાર્યા હતા. ખાસ વાત એ છે કે જ્યારે તે આઉટ થયો ત્યારે ટીમ પાસે માત્ર 54 રન હતા જેમાંથી 40 રન ગુરબાઝના હતા. શાઇ હોપ જીત પહેલા આઉટ થઈ ગયો હતો. તેણે 33 બોલમાં 6 ચોગ્ગા અને 2 છગ્ગાની મદદથી 56 રન બનાવ્યા, જ્યારે મોઈન 44 રન બનાવીને અણનમ પાછો ફર્યો અને ટીમને ફાઇનલમાં પહોંચાડી હતી.