- એપ્રિલ મહિનાના પ્લેયર ઓફ ધ મંથનો મળ્યો એવોર્ડ
- યૂએઈ માટે આ એવોર્ડ મેળવનારા પહેલા પ્લેયર બન્યા
- આફ્રિદી અને ગેરહાર્ડ ઈરાસ્મસને હરાવીને મેળવ્યો એવોર્ડ
આઈસીસીએ એપ્રિલ મહિના માટે પ્લેયર ઓફ ધ મંથ એવોર્ડના વિજેતાની જાહેરાત કરી છે. UAEના ઓપનર મુહમ્મદ વસીમે ACC પ્રીમિયર કપમાં શાનદાર બેટિંગ કરી હતી અને પોતાના પ્રદર્શનથી બધાને પ્રભાવિત કર્યા હતા. હવે તેને 2024માં એપ્રિલ મહિના માટે પ્લેયર ઓફ ધ મંથનો એવોર્ડ મળ્યો છે. UAE માટે પ્લેયર ઓફ ધ મંથનો એવોર્ડ જીતનાર તે પ્રથમ ખેલાડી બની ગયો છે. તેણે પાકિસ્તાનના શાહીન આફ્રિદી અને નામીબિયાના ગેરહાર્ડ ઈરાસ્મસને હરાવીને આ એવોર્ડ જીત્યો છે.
મુહમ્મદ વસીમે એવોર્ડ જીત્યા બાદ જાણો શું કહ્યું
મુહમ્મદ વસીમે કહ્યું કે આઈસીસી મેન્સ પ્લેયર ઓફ ધ મંથનો એવોર્ડ જીતવો એ એક મહાન સન્માન છે. વિશ્વભરના પુરસ્કાર વિજેતાઓની આ પ્રતિષ્ઠિત યાદીમાં જોડાઈને હું રોમાંચિત છું. આ એવોર્ડ ખેલાડીઓ માટે એક મોટી પ્રેરણા છે, ખાસ કરીને UAE જેવી ઉભરતી ક્રિકેટ ટીમના ખેલાડીઓ માટે. ગયા મહિને ઓમાનમાં ACC પ્રીમિયર કપમાં અમારો ઉદ્દેશ્ય આવતા વર્ષના એશિયા કપ માટે ક્વોલિફાય કરવાનો હતો અને મને અમારી ટીમ અને ટૂર્નામેન્ટમાં તેમના પ્રદર્શન પર ગર્વ છે. વ્યક્તિગત સ્તરે હું ખુશ છું કે મેં સામેથી ટીમનું નેતૃત્વ કર્યું છે અને તે પણ ખાસ કરીને ફાઇનલમાં.
મુહમ્મદ વસીમ શાનદાર ફોર્મમાં છે
મુહમ્મદ વસીમ છેલ્લા કેટલાક સમયથી શાનદાર ફોર્મમાં છે. એપ્રિલમાં એસીસી મેન્સ પ્રીમિયર કપમાં તેણે શાનદાર પ્રદર્શન કર્યું હતું. વસીમ કુવૈત સામે પહેલા જ બોલ પર શૂન્ય રને આઉટ થયો હતો. પરંતુ પછીની ત્રણ મેચમાં તેણે 65, 45 અને 48 રનની ઇનિંગ્સ રમી. તેણે ACC મેન્સ પ્રીમિયર કપની ફાઇનલમાં સદી ફટકારી હતી. વસીમને તેના શાનદાર પ્રદર્શન માટે પ્લેયર ઓફ ધ સિરીઝનો એવોર્ડ આપવામાં આવ્યો હતો.
UAE માટે ઘણા રન બનાવ્યા
મુહમ્મદ વસીમે વર્ષ 2021માં T20Iમાં UAE માટે ડેબ્યૂ કર્યું હતું. આ પછી, તે ટીમના બેટિંગ ઓર્ડરમાં એક મહત્વપૂર્ણ કડી બની ગયો છે. તેણે UAE માટે 53 T20I મેચોમાં 1977 રન બનાવ્યા છે. આ સમયગાળા દરમિયાન તેની સરેરાશ 40 અને 154.69 ની સ્ટ્રાઈક રેટ છે. આ સિવાય તેણે 48 ODI મેચમાં 1289 રન બનાવ્યા છે. તેણે ટી20માં ત્રણ સદી અને વનડેમાં એક સદી ફટકારી છે.
