એશિયન ગેમ્સ 2026માં ભારતીય મહિલા હોકી ટીમે શાનદાર શરૂઆત કરી છે. ભારતે પોતાની પ્રથમ મેચમાં ઉઝબેકિસ્તાનને એકતરફી મુકાબલામાં 19-0થી હરાવીને જબરદસ્ત વિજય મેળવ્યો. સમગ્ર મેચ દરમિયાન ભારતીય ટીમનું વર્ચસ્વ જોવા મળ્યું અને ઉઝબેકિસ્તાનની ટીમ ભારતીય હુમલા સામે ટકી શકી નહોતી.ભારતે ભલે 19 ગોલ કર્યા હોય, પરંતુ આ જીત સાથે આંતરરાષ્ટ્રીય મેચમાં સૌથી વધુ ગોલ કરવાનો ભારતીય મહિલા હોકી ટીમનો રેકોર્ડ તૂટ્યો નથી. જોકે, આ મેચમાં દીપિકા સેહરાવતે વ્યક્તિગત રીતે 8 ગોલ કરીને ભારતીય મહિલા હોકીમાં એક મેચમાં સૌથી વધુ ગોલ કરવાનો રેકોર્ડ બનાવ્યો છે.

દીપિકા સેહરાવતે 8 ગોલ કરીને રચ્યો ઈતિહાસ

ભારતની આ મોટી જીતમાં દીપિકા સેહરાવત સૌથી મોટી સ્ટાર રહી. તેમણે એકલા જ 8 ગોલ કરીને ટીમની જીતમાં મહત્વની ભૂમિકા ભજવી. દીપિકાએ મેચની 8મી, 22મી, 25મી, 33મી, 36મી, 38મી, 41મી અને 54મી મિનિટે ગોલ કર્યા.આ 8 ગોલ સાથે દીપિકા સેહરાવતે મહિલા હોકીમાં એક મેચમાં ભારતીય ખેલાડી દ્વારા સૌથી વધુ ગોલ કરવાનો રેકોર્ડ પોતાના નામે કર્યો છે. તેમની આ સિદ્ધિ એશિયન ગેમ્સ 2026માં ભારત માટે ખાસ નોંધપાત્ર બની છે.

ઇશિકાએ ગોલની હેટ્રિક ફટકારી

દીપિકા ઉપરાંત ઇશિકાએ પણ શાનદાર પ્રદર્શન કર્યું. ઇશિકાએ 3 ગોલ કરીને પોતાની હેટ્રિક પૂરી કરી. તેમણે 11મી, 42મી અને 54મી મિનિટે ગોલ કર્યા.નવનીત કૌરે 23મી અને 45મી મિનિટે ગોલ કર્યા હતા. લઠંતલુઆંગીએ 42મી અને 51મી મિનિટે બે ગોલ નોંધાવ્યા. આ ઉપરાંત લાલરેમસિયામી, બલજીત કૌર, નેહા ગોયલ અને સાક્ષી રાણાએ 1-1 ગોલ કરીને ભારતની મોટી જીતમાં યોગદાન આપ્યું.

https://x.com/TheHockeyIndia/status/2101523085996540362?s=20


ભારતની સૌથી મોટી જીતનો રેકોર્ડ હજુ અકબંધ

19-0ની આ જીત મોટી હોવા છતાં ભારતીય મહિલા હોકી ટીમની એક મેચમાં સૌથી વધુ ગોલની સિદ્ધિ હજુ પણ અકબંધ છે. ભારતે 2016ના સાઉથ એશિયન ગેમ્સમાં નેપાળ સામે એક મેચમાં 24 ગોલ કર્યા હતા.એશિયન ગેમ્સની વાત કરીએ તો ભારતે 1982માં હોંગકોંગ સામે એક મેચમાં 22 ગોલ કર્યા હતા. જ્યારે 2018ના એશિયન ગેમ્સમાં ભારતે કઝાકિસ્તાનને 21-0થી હરાવ્યું હતું.આ આંકડાઓને જોતા ઉઝબેકિસ્તાન સામેની 19-0ની જીત ભારતીય મહિલા હોકી ટીમની સૌથી મોટી જીતોમાં સામેલ થઈ ગઈ છે. ટીમે આ મેચમાં આક્રમક હોકીનું શાનદાર પ્રદર્શન કર્યું અને શરૂઆતથી અંત સુધી પોતાનું વર્ચસ્વ જાળવી રાખ્યું.

એશિયન ગેમ્સમાં ભારતની મજબૂત શરૂઆત

એશિયન ગેમ્સ 2026માં ભારત માટે મહિલા હોકીની શરૂઆત ખાસ રહી છે. ટીમે 19 ગોલ કરીને પોતાના અભિયાનની શરૂઆત કરી છે, જ્યારે દીપિકા સેહરાવતે વ્યક્તિગત રેકોર્ડ બનાવીને પોતાની ઓળખ વધુ મજબૂત કરી છે.ભારતીય ટીમ હવે આગામી મેચોમાં પણ આ લય જાળવી રાખવા માટે મેદાનમાં ઉતરશે. એશિયન ગેમ્સમાં મહિલા હોકીમાં ભારત પાસેથી વધુ સારા પ્રદર્શનની અપેક્ષા રહેશે.

આ પણ વાંચો - Asian Games 2026 : ભારતીય મહિલા શૂટિંગ ટીમનો કમાલ, 10 મીટર એર રાઇફલમાં જીત્યો સિલ્વર મેડલ