Asian Games 2026: ગોલ્ડ મેડલ સાથે ભારતનું ખાતું ખુલ્યું, જાણો હવે મેડલ ટેલીમાં કયા ક્રમે

Asian Games 2026: ભારતીય મહિલા ક્રિકેટ ટીમે એશિયન ગેમ્સમાં દેશ માટે પ્રથમ ગોલ્ડ મેડલ જીતીને પોતાનું વર્ચસ્વ જાળવી રાખ્યું. બીજી તરફ પુરુષ બેડમિન્ટન ટીમે જાપાનને હરાવીને મહિલા ટીમના બહાર થવા અને શૂટરો માટેના નિરાશાજનક દિવસની ભરપાઈ કરી. હરમનપ્રીત કૌરની આગેવાનીમાં ભારતીય ટીમે શ્રીલંકાને 147 રનથી હરાવીને સતત બીજી વખત એશિયન ગેમ્સની ચેમ્પિયન બનવાનું ગૌરવ મેળવ્યું. આ જીત સાથે ભારતનું ગોલ્ડ મેડલનું ખાતું પણ ખુલ્યું. બેડમિન્ટન અને વુશુમાં પણ ભારતના મેડલ પાક્કા થઈ ગયા છે. જ્યારે પુરુષ હોકી ટીમે પણ શાનદાર પ્રદર્શન કરતાં પૂશ્રીલંકાને 16-1થી હરાવ્યું. લક્ષ્ય સેનની જીત સાથે પુરુષ બેડમિન્ટન ટીમે શરૂઆતના ઉતાર-ચઢાવ બાદ જોરદાર વાપસી કરી અને જાપાનને હરાવીને ઓછામાં ઓછો બ્રોન્ઝ મેડલ પાક્કો કરી લીધો.

સાત્વિક, ચિરાગ અને આયુષની ટીમે અપાવી સફળતા

ભારતીય પુરુષ ટીમે અગાઉની એશિયન ગેમ્સમાં સિલ્વર મેડલ જીત્યો હતો. આ વખતે લક્ષ્ય સેને વાપસી કરતાં શાનદાર જીત મેળવી. તેમના ઉપરાંત સાત્વિકસાઈરાજ રંકીરેડ્ડી, ચિરાગ શેટ્ટી અને આયુષ શેટ્ટીની જીતે ટીમને સફળતા અપાવી. એશિયન ગેમ્સ પહેલાં સતત કેટલીક ટૂર્નામેન્ટમાં શરૂઆતના તબક્કામાં બહાર થઈ જવાને કારણે લક્ષ્ય સેનનું મનોબળ થોડું ઘટ્યું હતું.

લક્ષ્ય સેને નારાઓકાને હરાવ્યો

લક્ષ્ય સેને પ્રથમ ગેમ ગુમાવીને શરૂઆત કરી હતી. નિર્ણાયક ગેમમાં પણ તે 14-19થી પાછળ હતો અને હારના આરે હતો. જોકે અલ્મોડાના 25 વર્ષના ખેલાડીએ પોતાની ક્ષમતા બતાવીને સતત સાત પોઈન્ટ મેળવ્યા. તેણે વિશ્વના સાતમા ક્રમાંકિત અને બે વખતના વર્લ્ડ ચેમ્પિયનશિપ સિલ્વર મેડલ વિજેતા કોડાઈ નારાઓકાને 11-21, 21-5, 21-19થી હરાવીને ભારતને 1-0ની લીડ અપાવી.

ભારતનો મેડલ પાક્કો

આ સિઝનમાં બે ટાઇટલ જીતનારી સાત્વિકસાઈરાજ રંકીરેડ્ડી અને ચિરાગ શેટ્ટીની જોડીએ પૂર્વ વર્લ્ડ ચેમ્પિયન હોકી તાકુરો અને કોબાયાશી યુગોની જોડીને 21-18, 24-22થી હરાવીને ભારતની લીડ 2-0 કરી. ત્યારબાદ આ વર્ષે બેડમિન્ટન એશિયા ચેમ્પિયનશિપની ફાઇનલમાં પહોંચેલા આયુષ શેટ્ટીએ શાનદાર પ્રદર્શન કર્યું. તેણે વિશ્વના 16મા ક્રમાંકિત કોકી વતાનાબેને 21-10, 21-19થી હરાવીને મુકાબલો અને ભારતનો મેડલ પાક્કો કરી દીધો.

વુશુમાં પણ ભારતનો મેડલ પાક્કો

વુશુમાં રોશિબિના દેવી નાઓરેમે મહિલા 60 કિલોગ્રામ વર્ગની સેમિફાઇનલમાં જગ્યા બનાવીને ભારતનો એક મેડલ પાક્કો કરી દીધો. તેણે ક્વાર્ટર ફાઇનલમાં મકાઉની ચુ મેન સિનને હરાવી હતી. આ સ્પર્ધાની અગાઉની બે આવૃત્તિમાં સિલ્વર અને બ્રોન્ઝ મેડલ જીતી ચૂકેલી રોશિબિનાને ‘આઇચી પ્રીફેક્ચુરલ માર્શલ આર્ટ્સ હોલ’માં મકાઉની ખેલાડી સામે પોઈન્ટના અંતરના આધારે વિજેતા જાહેર કરવામાં આવી.

મહિલા બેડમિન્ટનમાં નિરાશા

બેડમિન્ટનમાં પુરુષ ટીમની સફળતા પહેલાં ભારતીય મહિલા ટીમને જાપાન સામે 1-3થી હારનો સામનો કરવો પડ્યો. વર્લ્ડ ચેમ્પિયનશિપમાં બ્રોન્ઝ મેડલ જીતનારી ત્રિશા જોલી અને ગાયત્રી ગોપીચંદની જોડીએ શાનદાર રમત બતાવી, પરંતુ સિંગલ્સ ખેલાડીઓના નિરાશાજનક પ્રદર્શનને કારણે ભારતીય મહિલા ટીમ ક્વાર્ટર ફાઇનલમાં જાપાન સામે 1-3થી હારીને બહાર થઈ ગઈ.

પીવી સિંધુ હારી

મહિલા વર્ગમાં ભારત તરફથી બે વખતની ઓલિમ્પિક મેડલ વિજેતા પીવી સિંધુએ મુકાબલાની શરૂઆત કરી. તેણે વિશ્વની ત્રીજા ક્રમાંકની ખેલાડી અકાને યામાગુચીને કડક ટક્કર આપી, પરંતુ નિર્ણાયક ગેમમાં તેનું પ્રદર્શન નિરાશાજનક રહ્યું અને તે અંતે 23-21, 18-21, 6-21થી હારી ગઈ. ત્યારબાદ ઉન્નતિ હુડ્ડા 2022ની વર્લ્ડ જુનિયર ચેમ્પિયન અને વિશ્વની સાતમા ક્રમાંકિત ખેલાડી તોમોકા મિયાઝાકી સામે 16-21, 18-21થી હારી ગઈ. આ સાથે જાપાન 2-0થી આગળ થઈ ગયું.

તન્વી શર્મા પણ હારી

નવી દિલ્હીમાં તાજેતરમાં વર્લ્ડ ચેમ્પિયનશિપમાં બ્રોન્ઝ મેડલ જીતનારી ત્રિશા અને ગાયત્રીએ પ્રથમ ડબલ્સ મેચમાં યુકી ફુકુશિમા અને માયુ માત્સુમોતોને 21-17, 21-16થી હરાવીને ભારતને મુકાબલામાં જાળવી રાખ્યું. પરંતુ યુવા શટલર તન્વી શર્મા ત્રીજી સિંગલ્સ મેચમાં પૂર્વ વર્લ્ડ ચેમ્પિયન નોઝોમી ઓકુહારાથી 12-21, 10-21થી હારી ગઈ. આ સાથે જાપાને 3-1થી જીત મેળવી.

બોક્સિંગમાં ભારતીય ખેલાડીઓ

બોક્સિંગમાં ભારતીય ખેલાડીઓનો અજેય સફર ચાલુ રહ્યો. સાક્ષી ચૌધરીએ મહિલા 51 કિલોગ્રામ વર્ગમાં પેરિસ ઓલિમ્પિકની બ્રોન્ઝ મેડલ વિજેતા ફિલિપાઇન્સની એરા વિલેગાસને 5-0થી હરાવીને મોટો અપસેટ કર્યો અને પ્રી-ક્વાર્ટર ફાઇનલમાં જગ્યા બનાવી. જ્યારે પુરુષ વર્ગમાં જાદુમણી સિંહે 55 કિલોગ્રામમાં નેપાળના ચંદ્રા બહાદુર થાપાને 5-0થી હરાવીને આગળનો રાઉન્ડ મેળવ્યો.

પ્રણતિ નાયકે ફાઇનલ માટે ક્વોલિફાય કર્યું

એશિયન ગેમ્સમાં ભાગ લઈ રહેલી ભારતની એકમાત્ર જિમનાસ્ટ પ્રણતિ નાયકે આર્ટિસ્ટિક જિમનાસ્ટિકમાં સાતમું સ્થાન મેળવીને વોલ્ટ ફાઇનલ માટે ક્વોલિફાય કર્યું. એશિયન જિમનાસ્ટિક્સ ચેમ્પિયનશિપમાં ત્રણ વખત બ્રોન્ઝ મેડલ જીતી ચૂકેલી પ્રણતિ 19 જિમનાસ્ટમાં સાતમા સ્થાને રહી. આ સાથે તેણે વોલ્ટ ઇવેન્ટની ફાઇનલમાં જગ્યા બનાવી. ફાઇનલ 24 સપ્ટેમ્બરે રમાશે.

ટેબલ ટેનિસમાં મહિલા ટીમ ક્વાર્ટર ફાઇનલમાં

ભારતીય મહિલા ટીમે એશિયન ગેમ્સની ટેબલ ટેનિસ સ્પર્ધામાં થાઇલેન્ડને હરાવીને ક્વાર્ટર ફાઇનલમાં જગ્યા બનાવી. જોકે ભારતીય પુરુષ ટીમ મંગળવારે દક્ષિણ કોરિયા સામે હારીને બહાર થઈ ગઈ. ભારતીય મહિલા ટીમે સ્કાય હોલમાં થાઇલેન્ડને 3-2થી હરાવ્યું, જ્યારે પુરુષ ટીમ 0-3થી હારી ગઈ. ગ્રુપ તબક્કામાં ઈરાન સામેની હાર બાદ આ ટીમની બીજી હાર હતી.

શૂટિંગમાં ભારતનું નિરાશાજનક પ્રદર્શન

શૂટિંગમાં મંગળવારે ભારતનું પ્રદર્શન થોડું નિરાશાજનક રહ્યું. ઈલાવેનીલ વાલારિવાન અને યુવા શૂટર પાર્થ માને સારી શરૂઆતને મેડલમાં બદલી શક્યા નહીં. તેઓ અહીં એશિયન ગેમ્સની 10 મીટર એર રાઇફલ મિક્સ્ડ ટીમ ઇવેન્ટની ફાઇનલમાં ચોથા અને અંતિમ સ્થાને રહ્યા. ઈલાવેનીલ અને પાર્થ 634.6 પોઈન્ટ સાથે બીજા સ્થાને રહીને ફાઇનલ માટે ક્વોલિફાય થયા હતા અને ગોલ્ડ મેડલની દાવેદારીમાં મજબૂત સ્થિતિમાં દેખાઈ રહ્યા હતા.**

અનંતજીત સિંહ નારૂકા ફાઇનલની રેસમાં

ભારતીય જોડી ક્વોલિફિકેશનમાં જે લયમાં હતી તે ફાઇનલમાં જાળવી શકી નહીં અને 18મા શોટ બાદ મેડલની રેસમાંથી બહાર થઈ ગઈ. સ્કીટ શૂટિંગમાં અનંતજીત સિંહ નારૂકા 100માંથી 96 નિશાન સાથે એશિયન ગેમ્સની ફાઇનલમાં જગ્યા બનાવવાની રેસમાં યથાવત છે. 25-25 નિશાનના ચાર રાઉન્ડ બાદ તે ચાર ખેલાડીઓ સાથે પોઈન્ટ ટેબલમાં ટોચ પર છે.

બુધવારે ક્વોલિફિકેશનનો છેલ્લો રાઉન્ડ

ઓલિમ્પિયન અને વર્લ્ડ કપ ફાઇનલના બ્રોન્ઝ મેડલ વિજેતા નારૂકાએ પ્રથમ દિવસે 24 અને 25નો સ્કોર કર્યો હતો. ત્યારબાદ મંગળવારે તેણે 23 અને 24નો સ્કોર કર્યો. ક્વોલિફિકેશનમાં બુધવારે 25 નિશાનનો વધુ એક રાઉન્ડ બાકી છે. નારૂકા આઠ શૂટર્સની ફાઇનલમાં જગ્યા બનાવીને મેડલ માટે પડકાર રજૂ કરવાની મજબૂત સ્થિતિમાં છે.

ભારતને ઝટકો

અનુભવી મેરાજ અહમદ ખાન અને ભવતેગ સિંહ ગિલ ફાઇનલમાં જગ્યા બનાવવાની રેસમાંથી લગભગ બહાર થઈ ગયા છે. મેરાજે દિવસનો અંત 91 (23, 22, 23, 23)ના સ્કોર સાથે કર્યો, જ્યારે ગિલ 86 (21, 23, 20, 22)ના સ્કોર પર રહ્યો. ભારતની ટીમ મેડલની આશાઓને પણ મોટો ઝટકો લાગ્યો છે. ભારતીય ત્રિપુટી 273ના કુલ સ્કોર સાથે સંયુક્ત રીતે પાંચમા સ્થાને છે.

મહેશ્વરી ચૌહાણ લગભગ બહાર

મહિલા સ્કીટ સ્પર્ધામાં રાઇઝા ઢિલ્લોન ચાર રાઉન્ડ બાદ 92 (25, 21, 22, 24)ના સ્કોર સાથે પાંચમા સ્થાને છે. જ્યારે પરિનાઝ ધાલીવાલ 89 (23, 21, 21, 24)ના સ્કોર સાથે સંયુક્ત રીતે નવમા સ્થાને રહીને ફાઇનલની રેસમાં છે. ઓલિમ્પિયન મહેશ્વરી ચૌહાણ 85ના સ્કોર સાથે વ્યક્તિગત સ્પર્ધામાંથી લગભગ બહાર થઈ ગઈ છે.

મેડલ ટેલીમાં ભારત ક્યા સ્થાને?

આ પણ વાંચો: મેડલ ટેલીમાં ભારતે લગાવી છલાંગ, ટોપ 10માં મળ્યું સ્થાન