જાપાનના નાગોયા અને આઇચી વિસ્તારોમાં ૧૯ સપ્ટેમ્બરથી ૪ ઓક્ટોબર દરમિયાન યોજાનારી એશિયન ગેમ્સ શરૂ થાય તે પહેલાં જ વિવાદોમાં ઘેરાઈ છે. ક્રિકેટરો માટે અત્યંત નાના હોટલ રૂમ અને ટેન્ટેડ ડ્રેસિંગ રૂમની વ્યવસ્થાને લઈને ભારે હોબાળો મચ્યો હતો. જોકે, હવે સામે આવેલા અહેવાલો મુજબ આયોજકો ક્રિકેટરોને અન્ય રમતોના એથ્લેટ્સની સરખામણીએ વિશેષ (VIP) સુવિધાઓ અને વધુ સારા રૂમ પૂરા પાડવાની તૈયારી કરી રહ્યા છે.
ખેલાડીઓની સુવિધા મામલે આયોજકો અને ACC વચ્ચે બેઠક
જાપાનમાં ક્રિકેટરો માટે યોગ્ય ફાઇવ સ્ટાર હોટલોના અભાવ અંગે ચિંતાઓ વ્યક્ત કરવામાં આવી છે. જાપાન ક્રિકેટ એસોસિએશનના વડાના જણાવ્યા અનુસાર, ખેલાડીઓ માટે બહેતર રહેઠાણ અને સુવિધાઓ સુનિશ્ચિત કરવા માટે એશિયન ગેમ્સના આયોજકો અને એશિયન ક્રિકેટ કાઉન્સિલ (ACC) વચ્ચે સતત ચર્ચા ચાલી રહી છે.
લાકડાના કન્ટેનર અને ક્રુઝ શિપમાં રહેવાની વ્યવસ્થા
શ્રીલંકન ક્રિકેટ બોર્ડના એક અધિકારીએ ખુલાસો કર્યો હતો કે એશિયાની કેટલીક ટોચની ટીમોએ આયોજકો દ્વારા આપવામાં આવેલી સુવિધાઓ સામે સવાલો ઉઠાવ્યા છે. આ વખતે આયોજકો દ્વારા કોઈ સ્પેશિયલ એથ્લેટ્સ વિલેજ (Athletes' Village) બનાવવામાં આવ્યું નથી. તેના બદલે ખેલાડીઓને રાખવા માટે કામચલાઉ લાકડાના કન્ટેનર, ક્રુઝ શિપની કેબિન અને સ્થાનિક હોટલોનો ઉપયોગ કરવામાં આવી રહ્યો છે.
એશિયન ગેમ્સમાં ૧૭,૦૦૦ એથ્લેટ્સ ભાગ લેશે
આ વખતે એશિયન ગેમ્સમાં ભાગ લેનારા ખેલાડીઓની સંખ્યા વધીને આશરે ૧૭,૦૦૦ સુધી પહોંચી ગઈ છે, જે ૨૦૨૪ના પેરિસ ઓલિમ્પિક્સના ૧૧,૦૦૦ ખેલાડીઓ કરતાં પણ વધુ છે. ખેલાડીઓની વિશાળ સંખ્યાને કારણે રહેઠાણની અછત સર્જાઈ છે, પરંતુ ક્રિકેટરોને અન્ય રમતવીરોની સરખામણીએ સુધારેલી VIP ટ્રીટમેન્ટ આપવામાં આવશે.
એશિયન ગેમ્સ અને ક્રિકેટનો ઇતિહાસ
એશિયન ગેમ્સના ઇતિહાસમાં ક્રિકેટનો સમાવેશ કરવામાં આવ્યો હોય તેવો આ પ્રસંગ વિશેષ મહત્વ ધરાવે છે. આ અગાઉ યોજાયેલી ગુઆંગઝુ એશિયન ગેમ્સમાં ભારતીય ક્રિકેટ ટીમે ગોલ્ડ મેડલ જીતીને દેશનું નામ રોશન કર્યું હતું. આ ક્રિકેટ ટુર્નામેન્ટનું આયોજન એશિયન ગેમ્સ ઓર્ગેનાઇઝિંગ કમિટી અને એશિયન ક્રિકેટ કાઉન્સિલ (ACC) દ્વારા સંયુક્ત રીતે કરવામાં આવી રહ્યું છે.
આ પણ વાંચો : Lionel Messiએ 39 વર્ષની ઉંમરે સંન્યાસની કરી જાહેરાત, ઈન્ટરનેશનલ ફૂટબોલને કહ્યું અલવિદા
