ભારતીય કુસ્તી ટીમ માટે અમેરિકાથી ચિંતાજનક સમાચાર સામે આવ્યા છે. લાસ વેગાસમાં યોજાનારી U23 વર્લ્ડ ચેમ્પિયનશિપ માટે ભારતીય ટીમના 16 કુસ્તીબાજો બુધવારે નવી દિલ્હીના અમેરિકી દૂતાવાસમાં વિઝા ઇન્ટરવ્યૂ માટે પહોંચ્યા હતા. તેમાંથી 9 કુસ્તીબાજોની વિઝા અરજી રિજેક્ટ કરવામાં આવી. ઇન્ટરવ્યૂ બાદ તેમના પાસપોર્ટ પણ પરત કરી દેવામાં આવ્યા હતા. ભારતના કુલ 30 કુસ્તીબાજોની આ ચેમ્પિયનશિપ માટે પસંદગી કરવામાં આવી છે. બુધવારે 16 કુસ્તીબાજો ઉપરાંત સપોર્ટ સ્ટાફના 8 સભ્યો પણ વિઝા પ્રક્રિયા માટે પહોંચ્યા હતા. બાકીના કુસ્તીબાજો અને સપોર્ટ સ્ટાફના ઇન્ટરવ્યૂ ગુરુવારે નક્કી કરવામાં આવ્યા છે.
ઉંમર અને રોજગારના સ્ટેટસનો મુદ્દો
WFIના જણાવ્યા અનુસાર, વિઝા રિજેક્ટ થવાનું કારણ કુસ્તીબાજોની ઉંમર અને રોજગારની સ્થિતિ હોવાનું જણાવવામાં આવ્યું છે. 9માંથી 8 કુસ્તીબાજોની ઉંમર 20 વર્ષ અથવા તેનાથી ઓછી હોવાનું સામે આવ્યું છે. એક મહિલા કુસ્તીબાજે તાજેતરમાં જ ભારતીય રેલવેમાં નોકરી શરૂ કરી હતી અને ઇન્ટરવ્યૂ દરમિયાન પગાર તથા બેન્ક સંબંધિત વિગતો રજૂ કરી શકી ન હતી. WFIનું કહેવું છે કે આ U23 કેટેગરીની ચેમ્પિયનશિપ છે, જેમાં ભાગ લેનારા ખેલાડીઓની ઉંમર 18થી 23 વર્ષની વચ્ચે હોય છે. આથી ઘણા યુવા કુસ્તીબાજો હજુ પોતાની સ્પોર્ટ્સ કારકિર્દીની શરૂઆતમાં છે અને તેમની પાસે ઔપચારિક નોકરી ન હોવી સ્વાભાવિક છે.
2024ની U17 વર્લ્ડ ચેમ્પિયન પણ સામેલ
વિઝા ન મળનારા ખેલાડીઓમાં 2024ની U17 વર્લ્ડ ચેમ્પિયન નેહા સાંગવાનનું નામ પણ સામેલ છે. તેમની સાથે સમર્થ ગજાનન મ્હાકવે, ધીરજ કુમાર મલિક, સચિન કુમાર, નિખિલ, હરદીપ, પરવીન, અહિલ્યા શત્રુઘ્ન શિંદે અને નેહા શર્માનો પણ સમાવેશ થાય છે. નેહા સાંગવાને 2024માં U17 વર્લ્ડ ચેમ્પિયનશિપમાં ગોલ્ડ મેડલ જીત્યો હતો. હવે U23 વર્લ્ડ ચેમ્પિયનશિપમાં ભાગ લેતા પહેલા તેને વિઝા ન મળતા ભારતની ટીમ માટે મુશ્કેલી વધી છે.
WFIએ અમેરિકી દૂતાવાસને શું કહ્યું
ભારતીય કુસ્તી સંઘે અમેરિકી દૂતાવાસને પત્ર લખીને રિજેક્ટ થયેલી 9 અરજીઓ પર ફરી વિચાર કરવાની વિનંતી કરી છે. WFIએ કહ્યું છે કે આ યુવા ખેલાડીઓ હજુ પોતાની રમત પર ધ્યાન આપી રહ્યા છે, તેથી તેમનું ઔપચારિક રીતે નોકરીમાં ન હોવું તેમની ઉંમર અને કારકિર્દીના તબક્કાને જોતા સમજાય તેવી બાબત છે. સંઘે ગુરુવારે વિઝા ઇન્ટરવ્યૂ માટે જવાના બાકીના કુસ્તીબાજોને લઈને પણ ચિંતા વ્યક્ત કરી છે. WFIના જણાવ્યા અનુસાર, તેમાંના ઘણા ખેલાડીઓ પણ 20 વર્ષથી ઓછી ઉંમરના અને ઔપચારિક રીતે રોજગાર ધરાવતા નથી.
12 ઓક્ટોબરથી લાસ વેગાસમાં વર્લ્ડ ચેમ્પિયનશિપ
U23 વર્લ્ડ રેસલિંગ ચેમ્પિયનશિપ 12થી 18 ઓક્ટોબર દરમિયાન અમેરિકાના લાસ વેગાસમાં યોજાવાની છે. ટૂર્નામેન્ટ શરૂ થવામાં હવે થોડા જ દિવસ બાકી છે, તેથી વિઝા મુદ્દો ઝડપથી ઉકેલાય તે ભારતીય ટીમ માટે મહત્વનું છે. હાલ WFI અમેરિકી દૂતાવાસના પુનર્વિચારની રાહ જોઈ રહ્યું છે.
આ પણ વાંચો: ISRL રેસિંગ સીઝન 3માં રોમાંચક મુકાબલો, 21 દેશોના 146 રાઇડર્સ એક જ લીગમાં
