અમદાવાદમાં યોજાયેલા BRICS પરંપરાગત અને આદિવાસી રમતોના પ્રદર્શન કાર્યક્રમમાં કેન્દ્રીય રમતગમત મંત્રી મનસુખ માંડવિયાએ વિવિધ દેશોની પરંપરાગત રમતોને જાળવવા માટે સંયુક્ત પહેલનો પ્રસ્તાવ મૂક્યો છે. તેમણે BRICS દેશોની પરંપરાગત અને સ્વદેશી રમતોનો ઇતિહાસ, સાંસ્કૃતિક મહત્ત્વ, નિયમો અને સાધનોની વિગતો એકત્રિત કરતું સ્વૈચ્છિક ભંડાર ઊભું કરવાની ભલામણ કરી હતી. આ ઉપરાંત, રમતો સાથે જોડાયેલા ખેલાડીઓ, કોચ, સંશોધકો અને સાંસ્કૃતિક નિષ્ણાતો વચ્ચે આદાનપ્રદાન વધારવા તથા ભવિષ્યના BRICS રમતગમત કાર્યક્રમોમાં આવી રમતોનું નિયમિત પ્રદર્શન યોજવા પણ સૂચન કર્યું હતું.
અમદાવાદમાં 10 દેશોની રમતોનું પ્રદર્શન
સોમવાર, 12 ઓક્ટોબરે અમદાવાદના નારણપુરા સ્થિત વીર સાવરકર સ્પોર્ટ્સ કોમ્પ્લેક્સમાં BRICS Traditional and Indigenous Demonstration Games 2026 યોજાઈ હતી. કેન્દ્રીય રમતગમત મંત્રી મનસુખ માંડવિયાએ ગુજરાતના નાયબ મુખ્યમંત્રી હર્ષ સંઘવીની ઉપસ્થિતિમાં કાર્યક્રમનું ઉદ્ઘાટન કર્યું હતું. આ કાર્યક્રમનો હેતુ સ્પર્ધા કરતાં વિવિધ દેશોની પરંપરાગત રમતો, સાંસ્કૃતિક વારસો અને રમતગમત સાથે જોડાયેલી પરંપરાઓને રજૂ કરવાનો હતો. માંડવિયાએ જણાવ્યું હતું કે રમતગમત માત્ર સ્પર્ધા પૂરતી મર્યાદિત નથી. તે યુવાનોના વિકાસ, સામાજિક સમાવેશ, સાંસ્કૃતિક સમજણ અને આંતરરાષ્ટ્રીય સહયોગનું માધ્યમ પણ છે. તેમના મતે, પરંપરાગત રમતોને સાચવવાથી વિવિધ દેશોની સંસ્કૃતિ અને સ્થાનિક સમુદાયોના જ્ઞાનને નવી પેઢી સુધી પહોંચાડવામાં મદદ મળી શકે છે.
https://x.com/khadseraksha/status/2109692444845768939?s=20
પરંપરાગત રમતો માટે ત્રણ સૂચનો
માંડવિયાએ BRICS દેશો વચ્ચે સહયોગ માટે ત્રણ મુખ્ય સૂચનો રજૂ કર્યા હતા. પ્રથમ, પરંપરાગત અને સ્વદેશી રમતોનું સ્વૈચ્છિક સંયુક્ત ભંડાર બનાવવું, જેમાં દરેક રમતનો ઇતિહાસ, સાંસ્કૃતિક મહત્ત્વ, નિયમો, ઉપયોગમાં લેવાતાં સાધનો અને રમવાના મેદાન સંબંધિત જરૂરિયાતોની વિગતો નોંધવામાં આવે. બીજા સૂચન હેઠળ તેમણે આ રમતોના ખેલાડીઓ, કોચ, સંશોધકો, શૈક્ષણિક સંસ્થાઓ અને સાંસ્કૃતિક નિષ્ણાતો વચ્ચે પરસ્પર મુલાકાતો તથા જ્ઞાનનું આદાનપ્રદાન વધારવા પર ભાર મૂક્યો હતો. ત્રીજા સૂચન મુજબ, ભવિષ્યમાં યોજાનારા BRICS રમતગમત કાર્યક્રમોમાં સમયાંતરે પરંપરાગત રમતોનું પ્રદર્શન યોજવાની શક્યતા તપાસવી જોઈએ. આ પહેલનો મુખ્ય ઉદ્દેશ વિવિધ દેશોની સ્થાનિક રમતગમત પરંપરાઓનું દસ્તાવેજીકરણ કરવા ઉપરાંત, તેને આંતરરાષ્ટ્રીય સ્તરે ઓળખ અપાવવાનો છે.
ભારત સહિતના દેશોએ રજૂ કરી પોતાની રમતો
કાર્યક્રમમાં ભાગ લેનારા દેશોએ પોતાની પરંપરાગત રમતો રજૂ કરી હતી. ભારતે મલ્લખંભ, યોગાસન અને કલારીપયટ્ટુનું પ્રદર્શન કર્યું હતું. ચીને વુશુ, લાયન ડાન્સ અને હેલ્થ કિગોંગ રજૂ કર્યા હતા, જ્યારે બ્રાઝિલે કેપોઇરા, લોગ રેસ અને અન્ય પરંપરાગત રમતપ્રકારો રજૂ કર્યા હતા. કઝાકિસ્તાનની ટીમે અસિક અતુ, તોગિઝકુમાલક અને કઝાક કુસ્તીનું પ્રદર્શન કર્યું હતું. રશિયાએ ગોરોડકી અને સામ્બો, દક્ષિણ આફ્રિકાએ કગાટી અને ઇન્ટોંગા, જ્યારે સંયુક્ત આરબ અમીરાતે અલ તબ્બાહ રજૂ કરી હતી. બોલિવિયા, બેલારુસ અને ઈરાન સહિતના દેશોએ પણ પોતાની પરંપરાગત રમતો રજૂ કરી હતી. રમતગમતના પ્રદર્શનોની સાથે સાંસ્કૃતિક કાર્યક્રમો અને દર્શકોની ભાગીદારી માટેની પ્રવૃત્તિઓ પણ યોજાઈ હતી. આયોજકોનો ઉદ્દેશ વિવિધ દેશોના રમતગમત વારસાને એક મંચ પર લાવી પરસ્પર સમજણ અને સહયોગને પ્રોત્સાહન આપવાનો હતો.
ફિટનેસને જીવનશૈલી બનાવવાનો પ્રયાસ
માંડવિયાએ દેશમાં શારીરિક પ્રવૃત્તિ અને ફિટનેસને પ્રોત્સાહન આપવા માટેના ફિટ ઇન્ડિયા અભિયાનનો પણ ઉલ્લેખ કર્યો હતો. તેમણે જણાવ્યું હતું કે ‘સન્ડેઝ ઓન સાયકલ’ અભિયાનમાં દર રવિવારે 3 લાખથી વધુ સ્થળોએ 50 લાખથી વધુ લોકો જોડાય છે. આ અભિયાનની અત્યાર સુધીમાં 94 આવૃત્તિઓ યોજાઈ હોવાનું પણ તેમણે જણાવ્યું હતું. માંડવિયાના જણાવ્યા અનુસાર, ખેલાડીઓને મેદાનથી આંતરરાષ્ટ્રીય મંચ સુધી આગળ વધારવા માટે રમતગમતનું માળખું, તાલીમ, રમતવિજ્ઞાન, પ્રતિભાની ઓળખ અને ખેલાડીઓના કલ્યાણ પર ધ્યાન આપવું જરૂરી છે. પરંપરાગત રમતોના સંરક્ષણ સાથે રમતગમત ક્ષેત્રે આંતરરાષ્ટ્રીય સહયોગ વધારવો પણ આ પહેલનો મહત્વનો ભાગ છે.
આ પણ વાંચો: SA vs Aus: ટેસ્ટમાં 49 વર્ષ પહેલાં એક ભારતીયે કર્યું હતું આવું, આ કારનામું કરનારો લાબુશેન બીજો ખેલાડી
