ભારતીય ચેસ જગતમાં એક નવો ઇતિહાસ રચાયો છે. મધ્યપ્રદેશના 22 વર્ષના અનુજ શ્રીવાસ્તવ ભારતના 100મા ચેસ ગ્રાન્ડમાસ્ટર બની ગયા છે. ફિલિપાઇન્સમાં રમાયેલી 7મી આસિયાન પ્લસ વ્યક્તિગત ઓપન ચેસ ચેમ્પિયનશિપ જીતીને તેમણે આ સિદ્ધિ મેળવી હતી. આ સાથે અનુજ મધ્યપ્રદેશના પ્રથમ ગ્રાન્ડમાસ્ટર પણ બન્યા છે. ભારતીય ચેસ માટે આ બેવડી ખુશીની ક્ષણ છે.
પહેલી જ રમતમાં હાર, છતાં જોરદાર વાપસી
અનુજ માટે આ ટુર્નામેન્ટની શરૂઆત સારી રહી નહોતી. પહેલી જ રમતમાં તેમને હારનો સામનો કરવો પડ્યો હતો. જોકે, આ હારથી નિરાશ થયા વિના તેમણે શાનદાર વાપસી કરી હતી. ત્યારબાદની આઠ રમતોમાં તેમણે 7 પોઇન્ટ મેળવ્યા અને ટુર્નામેન્ટમાં પ્રથમ સ્થાન હાંસલ કર્યું. આ સ્પર્ધા ફિલિપાઇન્સના મિસામિસ ઓક્સિડેન્ટલમાં આવેલા આસેન્સો ગ્લોબલ યુથ લીડરશિપ એન્ડ સ્પોર્ટ્સ કોમ્પ્લેક્સ ખાતે યોજાઈ હતી. અંતિમ બે રાઉન્ડમાં અનુજે દબાણ વચ્ચે જીત મેળવીને પોતાનું સ્થાન મજબૂત કર્યું હતું. અંતિમ ક્રમમાં વિયેતનામના ગુયેન ડુક હોઆ 6.5 પોઇન્ટ સાથે બીજા અને ફિલિપાઇન્સના નૌરી અલેખાઇન 6 પોઇન્ટ સાથે ત્રીજા સ્થાને રહ્યા હતા.
1987માં આનંદથી શરૂ થયેલી સફર 100 સુધી પહોંચી
ભારતને પ્રથમ ચેસ ગ્રાન્ડમાસ્ટર તરીકે વિશ્વનાથન આનંદ મળ્યા હતા. તેમણે 1987માં પોતાની ત્રીજી ગ્રાન્ડમાસ્ટર નોર્મ મેળવી હતી અને 1988માં ભારતના પ્રથમ ગ્રાન્ડમાસ્ટર તરીકે ઓળખ મેળવી હતી. હવે લગભગ ચાર દાયકા બાદ ભારતે 100 ગ્રાન્ડમાસ્ટરનો આંકડો પાર કર્યો છે. ખાસ વાત એ છે કે ભારતના છેલ્લા પાંચ ગ્રાન્ડમાસ્ટર માત્ર પાંચ મહિનામાં બન્યા છે. 2026ના જુલાઈથી નવેમ્બર વચ્ચે 96મા ગ્રાન્ડમાસ્ટરથી લઈને 100મા ગ્રાન્ડમાસ્ટર સુધીની સફર પૂર્ણ થઈ છે. અનુજ પહેલાં એથન વાઝ, હર્ષવર્ધન જીબી, એસ. અશ્વથ અને વી.એસ. રથનવીલને આ ખિતાબ મળ્યો હતો. જુલાઈમાં વી.એસ. રથનવીલ ભારતના 99મા ગ્રાન્ડમાસ્ટર બન્યા હતા.
ગ્રાન્ડમાસ્ટર બનવા માટે શું જરૂરી છે?
ગ્રાન્ડમાસ્ટર ચેસમાં આપવામાં આવતો સર્વોચ્ચ ખિતાબ છે. આંતરરાષ્ટ્રીય ચેસ મહાસંઘ એટલે કે ફિડે દ્વારા આ ખિતાબ આપવામાં આવે છે. સામાન્ય રીતે ખેલાડીએ ઓછામાં ઓછી ત્રણ ગ્રાન્ડમાસ્ટર નોર્મ મેળવવી પડે છે. આ ઉપરાંત તેના ફિડે રેટિંગે ઓછામાં ઓછા 2500નો આંકડો સ્પર્શવો જરૂરી છે.
ગ્રાન્ડમાસ્ટર નોર્મ મેળવવા માટે ખેલાડીએ મજબૂત આંતરરાષ્ટ્રીય સ્પર્ધામાં ઊંચા સ્તરનું પ્રદર્શન કરવું પડે છે. ત્રણ નોર્મ અને જરૂરી રેટિંગની શરતો પૂરી થયા બાદ ખેલાડીને ગ્રાન્ડમાસ્ટરનો ખિતાબ મળે છે. અનુજની આ સિદ્ધિથી ભારતીય ચેસમાં હવે 100 ગ્રાન્ડમાસ્ટર થઈ ગયા છે અને મધ્યપ્રદેશને તેનો પ્રથમ ગ્રાન્ડમાસ્ટર મળ્યો છે.
આ પણ વાંચો: દિવાળીએ WWE ફેન્સે બનાવી રે મિસ્ટિરિયોની રંગોળી, જોઈને રેસલર પણ રહી ગયો દંગ!
