ઓસ્ટ્રેલિયાની કેપ્ટન એલિસા હીલીએ આંતરરાષ્ટ્રીય ક્રિકેટમાંથી નિવૃત્તિની જાહેરાત કરી છે. મંગળવારે વિલો ટોક પોડકાસ્ટ પર તેણીએ આ વાતનો ખુલાસો કરતા કહ્યું કે ભારત સામેની આગામી ઘરેલુ સીરીઝ તેની 16 વર્ષની શાનદાર કારકિર્દીનો અંતિમ તબક્કો હશે.ભારત સામે ઓસ્ટ્રેલિયાની ઘરેલુ સીરીઝ 15 ફેબ્રુઆરીથી શરૂ થશે, જેમાં ત્રણ T20I, ત્રણ ODI અને એક ટેસ્ટ મેચ રમાશે. ઓસ્ટ્રેલિયા માટે હીલીની છેલ્લી મેચ 6 માર્ચે પર્થમાં રમાનારી એકમાત્ર ટેસ્ટ હશે.
એલિસા હીલીનું ક્રિકેટ કેરિયર
2010માં કિશોરાવસ્થામાં પદાર્પણ કર્યા પછી, હીલીએ 10 ટેસ્ટ, 123 વનડે અને 162 ટી20 આંતરરાષ્ટ્રીય મેચોમાં ઓસ્ટ્રેલિયાનું પ્રતિનિધિત્વ કર્યું છે. તેણીએ પોતાની કારકિર્દીમાં લગભગ 300 આંતરરાષ્ટ્રીય મેચ રમી છે, જેમાં તમામ ફોર્મેટમાં 7,000 થી વધુ રન બનાવ્યા છે. તે માત્ર એક મહાન બેટ્સમેન જ નથી પણ એક શાનદાર વિકેટકીપર પણ છે, તેણે વિકેટ પાછળ 275 આઉટ કર્યા છે. હીલીએ તેની કારકિર્દીના મોટાભાગના સમય માટે ઉપકેપ્ટન તરીકે સેવા આપી હતી, અને 2023 માં તે સંપૂર્ણ કેપ્ટન બની હતી.
