ભારતીય ટેસ્ટ ટીમના વાઈસ કેપ્ટન અને સ્ટાર વિકેટકીપર-બેટ્સમેન રિષભ પંત ઈજા સામે ઝઝૂમી રહ્યા છે. તેમને 2025 એન્ડરસન-તેંડુલકર ટ્રોફીની ચોથી ટેસ્ટમાં આ ઈજા થઈ હતી. પગની આ ઈજાએ પંતને લાંબા સમયથી મેદાનથી દૂર રાખ્યો છે. ફેન્સ તેને મેદાન પર પાછો જોવા માટે ઉત્સુક છે. પંતના બધા ફેન્સ માટે સારા સમાચાર છે. મેચ વિજેતા રિષભ પંતની ફિટનેસ અંગે હવે એક મોટું અપડેટ આવ્યું છે, જેમાં સ્પષ્ટ કરવામાં આવ્યું છે કે તે કઈ સિરિઝમાં રમવા માટે પરત ફરશે.
પંત ODI ફોર્મેટમાં ટીમનો બીજો પસંદગીનો બેટ્સમેન
એક અહેવાલ મુજબ રિષભ પંત દક્ષિણ આફ્રિકા સામેની ઘરેલુ ટેસ્ટ સિરિઝમાં મેદાનમાં પાછા ફરી શકે છે. હાલમાં, રિષભ પંત નેશનલ ક્રિકેટ એકેડેમી (NCA) માં પોતાની ફિટનેસ પર કામ કરી રહ્યા છે. વેસ્ટ ઈન્ડિઝ સામેની ટેસ્ટ સિરિઝ 2 ઓક્ટોબરથી શરૂ થઈ રહી છે, જેના કારણે પંત માટે ત્યાં રમવાની શક્યતા ઓછી છે. અન્ય એક અહેવાલ મુજબ તાજેતરમાં પંતના પગમાં સોજો વધી ગયો છે, જેના કારણે તેના માટે ઝડપી વાપસી કરવી મુશ્કેલ બની ગઈ છે. આ ઈજા તેને ઓસ્ટ્રેલિયા સામેની ODI સિરિઝમાંથી પણ બહાર કરી શકે છે. પંત ODI ફોર્મેટમાં ટીમનો બીજો પસંદગીનો બેટ્સમેન છે, જ્યારે KL રાહુલ હાલમાં તે ફોર્મેટમાં ભારતીય ટીમ મેનેજમેન્ટની પહેલી પસંદગી હોય તેવું લાગે છે.
