ટીમ ઇન્ડિયાના દિગ્ગજ બેટ્સમેન રોહિત શર્મા અને વિરાટ કોહલીએ ઇન્ડિયન પ્રીમિયર લીગ (IPL) 2025 દરમિયાન
ટેસ્ટ ક્રિકેટમાંથી નિવૃત્તિની જાહેરાત કરી હતી. આ પછી શુભમન ગિલને ટેસ્ટ ટીમની કમાન સોંપવામાં આવી હતી. હવે ભારતીય ટીમના ભૂતપૂર્વ ઓલરાઉન્ડર ઇરફાન પઠાણે રોહિત શર્મા વિશે એક મોટો ખુલાસો કર્યો છે, જેનાથી બધા ચોંકી ગયા છે. ઇરફાન પઠાણે એક ઇન્ટરવ્યુમાં કહ્યું હતું કે જો રોહિત શર્મા ટીમનો કેપ્ટન ન હોત, તો તેને પ્લેઇંગ ઇલેવનમાંથી બહાર કરી દેવામાં આવ્યો હોત. ઓસ્ટ્રેલિયા પ્રવાસમાં રોહિત શર્મા મોટો ફ્લોપ રહ્યો હતો.
ઇરફાન પઠાણે શું કહ્યું?
એક ઈન્ટરવ્યુ દરમિયાન ટીમ ઈન્ડિયાના ભૂતપૂર્વ ઓલરાઉન્ડર ઈરફાન પઠાણે રોહિત શર્મા વિશે એક મોટી વાત કહી છે. તેમણે કહ્યું હતું કે, બોર્ડર-ગાવસ્કર ટ્રોફી 2024-25માં રોહિત શર્મા મોટો ફ્લોપ રહ્યો હતો. ઈરફાને કહ્યું, જો આ ટીમ ઈન્ડિયા ઓપનર ટીમનો કેપ્ટન ન હોત, તો તેને પ્લેઈંગ ઈલેવનમાંથી બહાર કરી દેવામાં આવ્યો હોત. ઈરફાન પઠાણે કહ્યું કે તેમાં કોઈ શંકા છે જ નહીં કે રોહિત શર્મા વાઈટ બોલ ક્રિકેટનો મહાન ખેલાડી છે, પરંતુ તે વર્ષે (બોર્ડર-ગાવસ્કર ટ્રોફી 2024-25માં) ટેસ્ટ ક્રિકેટમાં તેની સરેરાશ માત્ર 6 હતી, તેથી જો તે કેપ્ટન ન હોત, તો તે ટીમની બહાર હોત.
રોહિતને ટેકો આપવા પર પ્રશ્નો ઉભા થયા
ટીમ ઈન્ડિયાના આ ભૂતપૂર્વ ક્રિકેટરે આગળ કહ્યું કે મને પૂછવામાં આવ્યું કે રોહિતના ખરાબ પ્રદર્શન છતાં તમે તેને કેમ ટેકો આપ્યો? હું તે સમયે કોમેન્ટ્રી કરી રહ્યો હતો અને જ્યારે તમે કોઈને ઇન્ટરવ્યૂ માટે બોલાવો છો, ત્યારે તમે તેની સાથે આદરથી વાત કરો છો. તેમણે કહ્યું, લોકો કહે છે કે મેં રોહિત શર્માને જરૂર કરતાં વધુ ટેકો આપ્યો હતો. જ્યારે કોઈ તમારી બ્રોડકાસ્ટિંગ ચેનલ પર ઇન્ટરવ્યૂ આપવા આવે છે, ત્યારે તમે તેની સાથે ખરાબ વર્તન નહીં કરો? તમે તેને બોલાવ્યો છે તેથી તમે યોગ્ય વર્તન કરશો. જ્યારે રોહિત ઇન્ટરવ્યૂ માટે આવ્યો હતો, ત્યારે અમે પણ એવું જ કર્યું, કારણ કે તે અમારો મહેમાન હતો.
ઓસ્ટ્રેલિયામાં રોહિતનું પ્રદર્શન
ભારતીય ટીમને 2024-25માં બોર્ડર ગાવસ્કર ટ્રોફીમાં ઓસ્ટ્રેલિયા પ્રવાસ પર ખરાબ પરિસ્થિતિનો સામનો કરવો પડ્યો હતો . રોહિત શર્મા આ પાંચ ટેસ્ટ મેચની સીરીઝમાં મોટો ફ્લોપ રહ્યો હતો. તે 3 મેચની 5 ઇનિંગ્સમાં 6.20 ની સરેરાશથી ફક્ત 31 રન બનાવી શક્યો હતો. આ પછી, તેણે સિડની ટેસ્ટ મેચમાં ન રમવાનો નિર્ણય લીધો. ક્રિકેટમાંથી નિવૃત્તિ લીધા પછી ઇરફાન પઠાણ હવે કોમેન્ટ્રી કરતો જોવા મળે છે.
IPL 2025માં તક ન મળી
ઇરફાન પઠાણને IPL 2025માં કોમેન્ટ્રી કરવાની તક મળી ન હતી. તેમનું નામ કોમેન્ટ્રી પેનલમાં સામેલ કરવામાં આવ્યું ન હતું. રિપોર્ટ મુજબ, કેટલાક ખેલાડીઓની ટીકા કરવાના કારણે આ ભૂતપૂર્વ ઓલરાઉન્ડરને કોમેન્ટ્રી પેનલમાં સામેલ કરવામાં આવ્યો ન હતો. રોહિત શર્માનું નામ પણ તે ખેલાડીઓમાં હતું.
