ઓસ્ટ્રેલિયાના વિસ્ફોટક ઓપનર ટ્રેવિસ હેડે સિડની ટેસ્ટમાં શાનદાર સદી ફટકારીને ઈતિહાસ રચી દીધો છે. એશેઝ શ્રેણીની પાંચમી મેચમાં હેડે માત્ર 105 બોલમાં પોતાની સદી પૂરી કરી હતી. આ સાથે જ તે છેલ્લા 23 વર્ષમાં એક જ એશેઝ શ્રેણીમાં 3 સદી ફટકારનાર પ્રથમ ઓસ્ટ્રેલિયન ઓપનર બની ગયો છે. આ પહેલા વર્ષ 2002-03માં દિગ્ગજ મેથ્યુ હેડને આ પરાક્રમ કર્યું હતું. હેડની આ આક્રમક બેટિંગને કારણે ઓસ્ટ્રેલિયાની ટીમ હાલ મેચમાં મજબૂત સ્થિતિમાં છે.
21મી સદીમાં ડેવિડ વોર્નરની બરાબરી કરી
ચાલુ એશેઝ શ્રેણીમાં ટ્રેવિસ હેડનું ફોર્મ અત્યંત ઘાતક રહ્યું છે. તેણે આ સિરીઝની 9 ઇનિંગ્સમાં અત્યાર સુધીમાં 500થી વધુ રન બનાવી લીધા છે. 21મી સદીમાં એશેઝની એક શ્રેણીમાં 500 રનનો આંકડો પાર કરનાર તે ડેવિડ વોર્નર પછીનો બીજો ઓસ્ટ્રેલિયન ઓપનર બન્યો છે. વોર્નરે 2013-14ની એશેઝમાં આ સિદ્ધિ મેળવી હતી, જ્યારે હેડે હવે 2025-26ની શ્રેણીમાં આ મુકામ હાંસલ કરીને પોતાનું નામ સુવર્ણ અક્ષરે લખાવ્યું છે.
