ન્યૂઝીલેન્ડ સામે 11 જાન્યુઆરીથી ODI સીરિઝની શરૂઆત થવા જઇ રહી છે, જેને લઇને વિરાટ કોહલી અને રોહિત શર્મા સહિતના સ્ટાર ખેલાડીઓ વડોદરા પહોંચી ગયા છે. આસિરિઝમાં પોતાની છાપ છોડવા આ 2 દિગ્ગજ ખેલાડીઓ પૂરી રીતે તૈયાર છે. ત્યારે આ વચ્ચે કિંગ કોહલી (King Kohli) એ એક ઇન્સ્ટાગ્રામ પર પોસ્ટ શેર કરી સૌ કોઇને ચોંકાવી દીધા છે. શું છે આ પોસ્ટ આવો જાણીએ.
સોશિયલ મીડિયા પર સંકેત
ભારતીય ક્રિકેટના ઇતિહાસમાં જેમના નામે અનેક રેકોર્ડ્સ નોંધાયેલા છે તેવા વિરાટ કોહલી ફરી એકવાર મેદાન પર ધમાલ મચાવવા માટે સજ્જ થયા છે. વિરાટ કોહલીએ તાજેતરમાં ટેસ્ટ અને T20 આંતરરાષ્ટ્રીય ક્રિકેટમાંથી નિવૃત્તિ જાહેર કરી દીધી છે, જેનો અર્થ છે કે હવે તે બ્લુ જર્સીમાં માત્ર વન ડે ઇન્ટરનેશનલ ફોર્મેટમાં જ રમતા જોવા મળશે. આ જ કારણ છે કે આગામી ન્યૂઝીલેન્ડ સામેની 3 મેચની વનડે સીરિઝ તેમના માટે અત્યંત મહત્વની બની રહી છે. ન્યૂઝીલેન્ડ સામેની સિરીઝની શરૂઆત થાય તે પહેલા જ વિરાટ કોહલીએ પોતાની તૈયારીઓ તેજ કરી દીધી છે. સોશિયલ મીડિયા પ્લેટફોર્મ ઇન્સ્ટાગ્રામ પર કોહલીએ તેની જીમ અને મેદાન પરની સખત મહેનતના ફોટા શેર કર્યા છે. આ ફોટામાં તે પરસેવે રેબઝેબ જોવા મળી રહ્યો છે, જે સ્પષ્ટપણે દર્શાવે છે કે તે કીવી ટીમ સામે રન અને સદીનો વરસાદ કરવા માટે કેટલો આતુર છે. ચાહકો પણ તેના આ નવા 'કિંગ કોહલી' અવતારને જોવા માટે ભારે ઉત્સાહિત છે.
