ક્રિસ્ટિયાનો રોનાલ્ડો માટે પોર્ટુગલની જર્સીમાં વાપસીની મેચ ગોલ વગર પૂરી થઈ, પરંતુ સ્ટેડિયમમાં તેમની લોકપ્રિયતા ફરી એકવાર જોવા મળી. UEFA નેશન્સ લીગમાં પોર્ટુગલે વેલ્સને 1-0થી હરાવ્યું. મેચમાં રોનાલ્ડો ગોલ કરી શક્યા નહોતા, તેમ છતાં 67મી મિનિટે તેમને મેદાનમાંથી બહાર બોલાવવામાં આવ્યા ત્યારે ચાહકોએ ઊભા થઈને જોરદાર તાળીઓ પાડી હતી. આ મેચ પોર્ટુગલ માટે નવા કોચ જોર્જ જીસસ હેઠળની પહેલી મેચ હતી. રોનાલ્ડો પણ 2026ના વર્લ્ડ કપ બાદ પહેલીવાર પોર્ટુગલ માટે રમવા ઉતર્યા હતા. 41 વર્ષના રોનાલ્ડો શરૂઆતથી જ વેલ્સની ડિફેન્સ માટે મોટો પડકાર રહ્યા હતા. જ્યારે પણ તેઓ વેલ્સના પેનલ્ટી એરિયામાં બોલ સાથે પહોંચતા ત્યારે સ્ટેડિયમમાં ચાહકોનો ઉત્સાહ વધી જતો હતો.
રોનાલ્ડોની અનેક તક, પરંતુ ગોલ થયો નહીં
રોનાલ્ડોને મેચમાં ગોલ કરવાની ઘણી તક મળી હતી. તેમણે એક વખત સાઇડ નેટિંગમાં બોલ માર્યો હતો, જ્યારે બીજી તકમાં નજીકથી મારેલો વોલી શોટ પણ ગોલમાં ફેરવી શક્યા નહોતા. બીજા હાફની શરૂઆતમાં રોનાલ્ડો પાસે તો ખૂબ જ સરળ તક આવી હતી. રૂબેન નેવેસે જમણી બાજુથી સરસ ક્રોસ આપ્યો હતો અને રોનાલ્ડો ગોલ સામે એકદમ ખુલ્લા હતા. જોકે તેમનો શોટ યોગ્ય રીતે કનેક્ટ ન થતાં બોલ ગોલ ઉપરથી બહાર ગયો. થોડી જ મિનિટો બાદ રોનાલ્ડોએ બોલને ગોલમાં પહોંચાડી દીધો હતો અને તેમની જાણીતી 'સિઉ' ઉજવણી પણ થવાની શક્યતા હતી. જોકે VAR તપાસ બાદ રોનાલ્ડો ઓફસાઇડ હોવાનું સામે આવ્યું અને ગોલ રદ કરવામાં આવ્યો.
67મી મિનિટે રોનાલ્ડોને મળ્યું જોરદાર સન્માન
મેચની 67મી મિનિટે કોચ જોર્જ જીસસે રોનાલ્ડોને મેદાનમાંથી બહાર બોલાવ્યા. રોનાલ્ડોએ કેપ્ટનની આર્મબેન્ડ ઉતારી અને મેદાન છોડ્યું ત્યારે આખું સ્ટેડિયમ તાળીઓથી ગુંજી ઊઠ્યું. વેલ્સના ચાહકો સિવાય લગભગ આખા સ્ટેડિયમ તરફથી તેમને સ્ટેન્ડિંગ ઓવેશન મળ્યું. રોનાલ્ડો માટે આ ક્ષણ ખાસ હતી, કારણ કે તેઓ લાંબા સમય બાદ લિસ્બનમાં પોર્ટુગલ માટે રમતા જોવા મળ્યા હતા.
https://x.com/RazedFootball/status/2103228030340723124?s=20
જોઆઓ ફેલિક્સે અપાવ્યો પોર્ટુગલને વિજય
મેચનો એકમાત્ર ગોલ જોઆઓ ફેલિક્સે 22મી મિનિટે કર્યો હતો. નુનો મેન્ડેસ પાસેથી મળેલા બોલને ફેલિક્સે લગભગ 20 યાર્ડ દૂરથી શોટ માર્યો હતો. બોલ વેલ્સના ડિફેન્ડર બેન ડેવિસને અડીને ગોલમાં ગયો હતો. વેલ્સે બીજા હાફમાં બરાબરી કરવાની કોશિશ કરી હતી. બ્રેનન જોન્સનનો શોટ ક્રોસબાર સાથે અથડાયો હતો, જ્યારે લુઇસ કૂમાસની તકને રૂબેન ડાયસે અટકાવી હતી. જોકે પોર્ટુગલે અંત સુધી 1-0ની લીડ જાળવી રાખી હતી. પોર્ટુગલે મેચમાં કુલ 22 શોટ લીધા હતા, જ્યારે વેલ્સ માત્ર 5 શોટ લઈ શક્યું હતું. રોનાલ્ડોએ એકલા 7 શોટ લીધા હતા, જે મેચમાં કોઈપણ ખેલાડી કરતાં સૌથી વધુ હતા, પરંતુ એક પણ શોટ ગોલમાં ફેરવી શક્યા નહોતા.
આ જીત સાથે પોર્ટુગલે નેશન્સ લીગના નવા અભિયાનની શરૂઆત કરી છે. રોનાલ્ડો માટે ગોલ ન હોવા છતાં ચાહકોનું આ સન્માન બતાવે છે કે પોર્ટુગલની ટીમમાં તેમનું સ્થાન હજુ પણ કેટલું ખાસ છે. UEFAના તાજેતરના આંકડા પ્રમાણે રોનાલ્ડોના નામે પોર્ટુગલ માટે રેકોર્ડ 146 આંતરરાષ્ટ્રીય ગોલ છે.
આ પણ વાંચો: Asian Games માં 6ઠ્ઠા દિવસે ભારતનો 'સોનાનો સૂરજ ઉગ્યો'...કમલજીત અને સુરુચિએ શૂટિંગમાં સુવર્ણ ચંદ્રક જીત્યો
