ભારતીય ફૂટબોલ ટીમ માટે બ્રાઝિલ અને ઉરુગ્વે સામેની બે મોટી આંતરરાષ્ટ્રીય ફ્રેન્ડલી મેચનું પરિણામ ભલે નિરાશાજનક રહ્યું હોય, પરંતુ આ મુકાબલાઓમાંથી કેટલાક ખેલાડીઓનું પ્રદર્શન ચોક્કસ રીતે ચર્ચામાં રહ્યું. ભારત બ્રાઝિલ સામે 0-4થી અને ત્યારબાદ ઉરુગ્વે સામે 1-6થી હારી ગયું હતું. જોકે આ બંને મેચમાં ભારતીય ખેલાડીઓએ દિગ્ગજ ટીમો સામે પોતાની ક્ષમતા બતાવવાની કેટલીક તક મેળવી.
1. અશ્વિષેક સિંહ ટેકચમ
બ્રાઝિલ સામેની મેચમાં 21 વર્ષના અશ્વિષેક સિંહ ટેકચમે ખાસ ધ્યાન ખેંચ્યું હતું. તેની સામે વિશ્વના સ્ટાર ફોરવર્ડ વિનિસિયસ જુનિયર હતો. અશ્વિષેકે ઘણી વખત વિનિસિયસને રોક્યો અને તેને સરળતાથી તક બનાવવા દીધી નહોતી. તેણે ઓફસાઇડ ટ્રેપનો પણ સારો ઉપયોગ કર્યો હતો. જોકે વિનિસિયસે કેટલીક કાઉન્ટર એટેકમાં અશ્વિષેકને મુશ્કેલીમાં મૂક્યો હતો, પરંતુ આ સ્તરના ખેલાડી સામે મળેલા અનુભવથી યુવા ભારતીય ડિફેન્ડરને ઘણો ફાયદો થઈ શકે છે. બ્રાઝિલ સામેની આ કામગીરીએ બતાવ્યું કે અશ્વિષેક મોટા આંતરરાષ્ટ્રીય મુકાબલામાં દબાણ સંભાળી શકે છે.
2. સહાલ અબ્દુલ સમદ
બ્રાઝિલ સામે ભારતીય ટીમની આક્રમક રમતના સૌથી સારા પાસાઓમાં સહાલ અબ્દુલ સમદનું નામ પણ આવ્યું હતું. પનામા સામે તેને સબસ્ટિટ્યૂટ તરીકે ઉપયોગ કર્યા બાદ કોચ ખાલિદ જમીલે બ્રાઝિલ સામે તેને શરૂઆતની ટીમમાં તક આપી હતી. સહાલે બ્રાઝિલ સામે 3માંથી 2 ડ્રિબલ સફળ કર્યા હતા અને તેનો પાસિંગ સફળતા દર 87% રહ્યો હતો. તેની બોલ પરની કાબેલિયત અને ડિફેન્ડરોને ડ્રિબલથી પસાર કરવાની ક્ષમતાએ ભારતના એટેકને અલગ પ્રકારની ધાર આપી હતી. ગોલ કે આસિસ્ટ ન મળ્યા હોવા છતાં તેની રમત ભારતીય ટીમ માટે સકારાત્મક પાસું રહી.
3. રેયાન વિલિયમ્સ
ભારતના એટેકમાં રેયાન વિલિયમ્સ પણ મહત્વના ખેલાડી તરીકે સામે આવ્યો. પનામા સામે 1-1ના ડ્રોમાં ગોલ કર્યા બાદ બ્રાઝિલ સામે પણ તેણે સતત જોખમ ઊભું કરવાનો પ્રયાસ કર્યો હતો. બ્રાઝિલ સામે રેયાને 2 શોટ ટાર્ગેટ પર લગાવ્યા હતા. તેમાંથી એક પ્રયાસને ડિફેન્ડરે ગોલલાઇન પરથી ક્લિયર કર્યો હતો. આ ઉપરાંત તેણે 4 વખત બોલ રિકવર કર્યો અને 3 ગ્રાઉન્ડ ડ્યૂઅલ જીત્યા હતા. ભારતના એટેકમાં હવે રેયાનની ભૂમિકા વધુ મહત્વની બની રહી છે.
ઉરુગ્વે સામે થાપાએ ઇતિહાસ રચ્યો
આ ત્રણ ખેલાડીઓ ઉપરાંત ઉરુગ્વે સામે અનિરુદ્ધ થાપાનું પ્રદર્શન પણ ખાસ નોંધવા જેવું રહ્યું. ભારત 6-1થી હારી ગયું, પરંતુ થાપાએ 22મી મિનિટે ગોલ કરીને ભારતને 1-1ની બરાબરી અપાવી હતી. આ ગોલ સાથે થાપા ઉરુગ્વે સામે સિનિયર આંતરરાષ્ટ્રીય મેચમાં ગોલ કરનાર માત્ર બીજા ભારતીય ખેલાડી બન્યા. તેમના પહેલાં 1982માં માનસ ભટ્ટાચાર્યે ઉરુગ્વે સામે ગોલ કર્યો હતો. એટલે ભારત માટે 44 વર્ષ બાદ ઉરુગ્વે સામે ગોલ કરવાનો ઇતિહાસ ફરી લખાયો.
મોટી ટીમો સામે અનુભવ સૌથી મોટી કમાણી
બ્રાઝિલ અને ઉરુગ્વે સામે ભારતને પરિણામ મળ્યું નહીં, પરંતુ આ બંને મેચ ભારતીય ખેલાડીઓ માટે આંતરરાષ્ટ્રીય સ્તરના અનુભવની દૃષ્ટિએ મહત્વપૂર્ણ રહી. ઉરુગ્વેના કોચ અને 2010 વર્લ્ડ કપના ગોલ્ડન બોલ વિજેતા ડિએગો ફોરલાને પણ કહ્યું હતું કે ભારત પાસે યુવા પ્રતિભા છે અને બ્રાઝિલ-ઉરુગ્વે જેવી ટીમો સામે રમવાથી ખેલાડીઓના વિકાસમાં મદદ મળશે.
ભારત માટે હવે સૌથી મોટો પડકાર આ અનુભવને આગામી મેચોમાં પરિણામમાં બદલવાનો રહેશે. ખાસ કરીને અશ્વિષેક, સહાલ અને રેયાન જેવા ખેલાડીઓ જો આવી મોટી મેચોમાં મળેલા અનુભવને આગળ લઈ જાય તો ભારતીય ટીમના ભવિષ્ય માટે તે સારો સંકેત બની શકે છે.
આ પણ વાંચો: Indian Football : કોલકાતામાં થાપાનો ઐતિહાસિક ગોલ, ઉરુગ્વેએ 6 ગોલ ફટકારી ભારતને 6-1થી હરાવ્યું
