ફુટબોલની ઈન્ટરનેશનલ બ્રેક દરમિયાન દુનિયાના ઘણા મોટા ખેલાડીઓને ઈજા થઈ છે. ફુટબોલમાં ઈન્ટરનેશનલ બ્રેક એટલે એવો સમયગાળો જ્યારે ક્લબ ટીમોની મેચો થોડા દિવસ માટે અટકે છે અને ખેલાડીઓ પોતાના દેશની રાષ્ટ્રીય ટીમ માટે મેચ રમવા જાય છે. દેશની ટીમ માટે મેચ રમવા ગયેલા ખેલાડીઓમાંથી કેટલાકને મેચ દરમિયાન ઈજા થઈ, જ્યારે કેટલાક ખેલાડીઓને ટ્રેનિંગ દરમિયાન તકલીફ થઈ. તેના કારણે હવે તેમની ક્લબ ટીમો પણ ચિંતામાં છે. આ યાદીમાં ફ્રાન્સના કિલિયન એમબાપ્પે, જર્મનીના જમાલ મુસિયાલા અને કાઈ હાવર્ટ્ઝ, બ્રાઝિલના રાફિન્હા, નેધરલેન્ડ્સના કોડી ગાક્પો અને બ્રાયન બ્રોબી, સ્વીડનના એલેક્ઝાન્ડર ઇસાક અને નોર્વેના માર્ટિન ઓડેગાર્ડ જેવા મોટા નામ સામેલ છે.
કિલિયન એમબાપ્પેને ઘૂંટણમાં ઈજા
રિયલ મેડ્રિડ અને ફ્રાન્સના સ્ટાર ફોરવર્ડ કિલિયન એમબાપ્પેને તુર્કી સામેની મેચમાં ઘૂંટણમાં ઈજા થઈ હતી. તપાસમાં ડાબા ઘૂંટણમાં ઈજા સામે આવી હતી. જોકે તેમની ઈજા ખૂબ ગંભીર નથી અને લગભગ 10થી 12 દિવસમાં તેઓ ફિટ થઈ શકે તેવી માહિતી સામે આવી હતી. એટલે રિયલ મેડ્રિડને તેમની વાપસીની આશા છે.
જર્મનીના બે મોટા ખેલાડીઓ પણ બહાર
જર્મનીના જમાલ મુસિયાલાને નેધરલેન્ડ્સ સામેની મેચ પહેલાં જ વોર્મ-અપ દરમિયાન જમણી જાંઘમાં ઈજા થઈ હતી. તેના કારણે તેઓ મેચમાં રમી શક્યા નહોતા. બીજી તરફ કાઈ હાવર્ટ્ઝ નેધરલેન્ડ્સ સામેની મેચમાં માત્ર 30 મિનિટ રમ્યા બાદ મેદાનની બહાર થઈ ગયા હતા. તેમને સ્નાયુમાં ઈજા થઈ હતી અને ત્યારબાદ તેઓ સારવાર માટે આર્સેનલમાં પાછા ફર્યા હતા.
રાફિન્હા અને લિવરપૂલના ખેલાડીઓની પણ મુશ્કેલી
બાર્સેલોના અને બ્રાઝિલના સ્ટાર રાફિન્હાને ઓસ્ટ્રેલિયા સામેની મેચમાં જમણી જાંઘમાં તકલીફ થઈ હતી. તેઓ મેચના હાફટાઈમ બાદ મેદાનમાં પાછા ફર્યા નહોતા અને બ્રાઝિલની ટીમમાંથી બહાર થઈને બાર્સેલોના પરત ફર્યા હતા. લિવરપૂલ માટે પણ ચિંતા વધી છે. નેધરલેન્ડ્સના કોડી ગાક્પોને પગના ઘૂંટીમાં ઈજા થઈ છે, જ્યારે સ્વીડનના એલેક્ઝાન્ડર ઇસાકને જાંઘમાં તકલીફના કારણે રાષ્ટ્રીય ટીમનો કેમ્પ છોડવો પડ્યો છે. નેધરલેન્ડ્સના બ્રાયન બ્રોબીને હેમસ્ટ્રિંગ એટલે કે જાંઘના પાછળના સ્નાયુમાં ઈજા થઈ છે.
મેનચેસ્ટર યુનાઇટેડ અને આર્સેનલની પણ ચિંતા
મેનચેસ્ટર યુનાઇટેડના પેટ્રિક ડોર્ગુને વેલ્સ સામેની ડેનમાર્કની મેચમાં જાંઘના પાછળના ભાગમાં ઈજા થઈ હતી. બીજી તરફ યુનાઇટેડના કેપ્ટન બ્રુનો ફર્નાન્ડિસ પણ ફિટનેસની સમસ્યાથી પસાર થઈ રહ્યા છે. આર્સેનલના માર્ટિન ઓડેગાર્ડને પોર્ટુગલ સામેની મેચમાં પગના ઘૂંટીમાં ઈજા થઈ હતી.
હવે ઈંગ્લેન્ડનો એલેક્સ સ્કોટ પણ ઈજાગ્રસ્ત
આ યાદીમાં હવે ઈંગ્લેન્ડના મિડફિલ્ડર એલેક્સ સ્કોટનું નામ પણ ઉમેરાયું છે. ક્રોએશિયા સામે ઈંગ્લેન્ડની 7-0ની જીતમાં સ્કોટે શાનદાર રમત બતાવી હતી. પરંતુ મેચ દરમિયાન તેમને જાંઘમાં ઈજા થઈ અને હવે તેઓ ઈંગ્લેન્ડની ટીમમાંથી બહાર થઈ ગયા છે. શરૂઆતની માહિતી પ્રમાણે તેમને કેટલાક અઠવાડિયા સુધી મેદાનથી દૂર રહેવું પડી શકે છે.
ક્લબ ટીમો માટે મુશ્કેલી વધી
ઈન્ટરનેશનલ બ્રેકનો સમય પૂરો થયા બાદ ખેલાડીઓ પોતાની ક્લબ ટીમોમાં પાછા ફરશે. ત્યારે તેમની ફિટનેસની તપાસ કરવામાં આવશે અને તેઓ આગામી મેચમાં રમી શકશે કે નહીં તે નક્કી થશે. લાંબી ઈન્ટરનેશનલ બ્રેકમાં ઘણી ટીમોના ખેલાડીઓને સતત મેચો રમવી પડી હોવાથી ખેલાડીઓ પર શારીરિક ભાર પણ વધ્યો છે. હવે ક્લબો માટે સૌથી મોટો સવાલ એ છે કે તેમના મુખ્ય ખેલાડીઓ કેટલા સમયમાં સંપૂર્ણ રીતે ફિટ થઈને મેદાન પર પાછા ફરે છે.
આ પણ વાંચો: Hockyમાં આગામી 2-3 મહિના મહત્વના, ક્રેગ ફુલ્ટને LA 2028 માટે બનાવી નવી યોજના
