ક્રિકેટની જેમ ફૂટબોલમાં પણ ભારત અને પાકિસ્તાન વચ્ચેની ટક્કર ખાસ માનવામાં આવે છે. બંને દેશોની ટીમો વચ્ચે મેદાન પર હરીફાઈ જોવા મળે છે. દક્ષિણ એશિયાઈ ફૂટબોલમાં ભારતનો દબદબો રહ્યો છે. ખાસ કરીને સાઉથ એશિયન ફૂટબોલ ફેડરેશન (SAFF) ચેમ્પિયનશિપમાં ભારતનું પ્રદર્શન પાકિસ્તાન કરતાં ઘણું સારું રહ્યું છે. નવેમ્બર 2026માં રમાયેલી તાજેતરની ટક્કરમાં પણ ભારતે પાકિસ્તાનને 3-2થી હરાવ્યું હતું. 

30 મુકાબલામાં ભારતની 17 જીત

ભારત અને પાકિસ્તાનની સિનિયર પુરુષ ફૂટબોલ ટીમો અત્યાર સુધી 30 વખત સામસામે આવી છે. આ મુકાબલામાં ભારતે 17 વખત જીત મેળવી છે, જ્યારે પાકિસ્તાનને માત્ર 4 મેચમાં સફળતા મળી છે. બંને દેશો વચ્ચેની 9 મેચ ડ્રો રહી છે. આ આંકડા દર્શાવે છે કે ફૂટબોલમાં પણ ભારતનો પાકિસ્તાન સામે સ્પષ્ટ દબદબો રહ્યો છે. પાકિસ્તાનને ભારત સામે છેલ્લી જીત 2005માં મળી હતી. ત્યારબાદ બંને ટીમો વચ્ચે રમાયેલી મેચોમાં ભારતનું પ્રદર્શન વધુ સારું રહ્યું છે.

છેલ્લી પાંચ મેચમાં ભારતનો દબદબો

ભારતે પાકિસ્તાન સામે છેલ્લી પાંચેય મેચ જીતી છે. આ દરમિયાન ભારતીય ટીમે કુલ 13 ગોલ કર્યા છે, જ્યારે પાકિસ્તાન માત્ર 3 ગોલ કરી શક્યું છે. બંને દેશો વચ્ચે 2023માં બેંગલુરુમાં રમાયેલી SAFF ચેમ્પિયનશિપની મેચમાં ભારતે 4-0થી જીત મેળવી હતી. આ મેચમાં સુનીલ છેત્રીએ હેટ્રિક ફટકારી હતી, જ્યારે ઉદાંતા સિંહે એક ગોલ કર્યો હતો. આ પહેલાં 2018માં પણ ભારતે પાકિસ્તાનને 3-1થી હરાવ્યું હતું. ત્યારબાદની ટક્કરોમાં પણ ભારતે પોતાની જીતનો સિલસિલો જાળવી રાખ્યો છે.

2026માં પણ ભારતે પાકિસ્તાનને હરાવ્યું

SAFF ચેમ્પિયનશિપ 2026માં બંને ટીમો 5 નવેમ્બરે બાંગ્લાદેશના ઢાકામાં સામસામે આવી હતી. આ મેચમાં ભારતે 3-2થી જીત મેળવી હતી. ભારત તરફથી સુહૈલ અહમદ ભટ્ટે 14મી અને 20મી મિનિટે બે ગોલ કર્યા હતા. જ્યારે મંગલેનથાંગ કિપગેને 32મી મિનિટે ત્રીજો ગોલ કર્યો હતો. પાકિસ્તાને મેચના અંતિમ સમયમાં વાપસીનો પ્રયાસ કર્યો હતો અને 91મી તથા 94મી મિનિટે બે ગોલ કર્યા હતા. જોકે, ભારતે પોતાની લીડ જાળવી રાખીને મેચ જીતી લીધી હતી. આ મેચમાં ભારતની ટીમમાં યુવા ખેલાડીઓને તક આપવામાં આવી હતી. નૌશાદ મૂસાની આગેવાની હેઠળની ટીમે દબાણ વચ્ચે પણ જીત મેળવીને ટૂર્નામેન્ટની શરૂઆત કરી હતી.

SAFF ચેમ્પિયનશિપમાં ભારત સૌથી સફળ ટીમ

SAFF ચેમ્પિયનશિપના ઇતિહાસમાં ભારત સૌથી સફળ ટીમ છે. ભારતે અત્યાર સુધી આ ટૂર્નામેન્ટ નવ વખત જીતી છે. 1993, 1997, 1999, 2005, 2009, 2011, 2015, 2021 અને 2023માં ભારત ચેમ્પિયન બન્યું હતું. બીજી તરફ પાકિસ્તાન આ ટૂર્નામેન્ટમાં અત્યાર સુધી એકપણ વખત ચેમ્પિયન બની શક્યું નથી. તેનું સર્વશ્રેષ્ઠ પ્રદર્શન 1997માં રહ્યું હતું, જ્યારે ટીમ ત્રીજા સ્થાને રહી હતી.

આમ, બંને દેશો વચ્ચેના ફૂટબોલ મુકાબલામાં ભારતનો રેકોર્ડ પાકિસ્તાન કરતાં ઘણો મજબૂત રહ્યો છે. જીતના આંકડા હોય કે SAFF ચેમ્પિયનશિપમાં સફળતા, બંને મોરચે ભારતીય ટીમ આગળ છે.

આ પણ વાંચો: UEFA Nations League : વર્લ્ડ ચેમ્પિયન સ્પેનનો ઘમંડ તૂટ્યો! ઇંગ્લેન્ડે 3-2થી હરાવ્યું