ભારતીય બોક્સર અને એશિયન ગેમ્સ 2026ની ગોલ્ડ મેડલિસ્ટ લવલિના બોર્ગોહેન નાના પાટેકરના નિધનથી ખૂબ દુઃખી છે. 75 વર્ષના નાના પાટેકરના નિધનના સમાચાર સાંભળ્યા બાદ લવલિનાએ કહ્યું કે બાળપણથી જ તેઓ નાના પાટેકરની ફિલ્મો જોતી આવી છે અને તેમને એક વખત મળવાનું પોતાનું સપનું હવે ક્યારેય પૂરું નહીં થઈ શકે.
‘મારું એક મોટું સપનું પૂરું ન થયું’
આસામના બોકાખાટમાં લવલિનાનું સન્માન કરવામાં આવ્યું હતું. આ દરમિયાન નાના પાટેકરના નિધન અંગે વાત કરતા તેણે કહ્યું કે તેને થોડા સમય પહેલાં જ આ સમાચાર મળ્યા હતા. લવલિનાએ કહ્યું કે નાના પાટેકરને એક વખત મળવાનું તેનું બાળપણનું સપનું હતું, પરંતુ હવે તે સપનું અધૂરું રહી ગયું છે. લવલિનાએ કહ્યું, “બાળપણથી અમે તેમને જોતા આવ્યા છીએ. તેમનો સ્વભાવ થોડો અલગ હતો અને તેમની પોતાની એક અલગ શૈલી હતી. તેમને એક વખત મળવાનું મારું સપનું હતું, પરંતુ તે પૂરું ન થયું.”
‘દેશ અને ફિલ્મ ઈન્ડસ્ટ્રી માટે મોટું નુકસાન’
લવલિનાએ નાના પાટેકરના નિધનને સમગ્ર દેશ અને ભારતીય ફિલ્મ ઈન્ડસ્ટ્રી માટે મોટું નુકસાન ગણાવ્યું. તેણે કહ્યું કે નાના પાટેકર હવે આપણી વચ્ચે નથી એ દેશ માટે ખૂબ જ દુઃખદ સમાચાર છે. લવલિનાએ કહ્યું, “મને લાગે છે કે આ સમગ્ર દેશ માટે ખૂબ જ ખરાબ સમાચાર છે કે તેઓ હવે આપણી વચ્ચે નથી. ભારતીય ફિલ્મ ઈન્ડસ્ટ્રી માટે આ એક મોટું નુકસાન છે.”
એશિયન ગેમ્સમાં લવલિનાએ જીત્યો હતો ગોલ્ડ
લવલિના તાજેતરમાં જ જાપાનમાં યોજાયેલી એશિયન ગેમ્સ 2026માં ગોલ્ડ મેડલ જીતીને આસામ પરત ફરી છે. મહિલાઓની 75 કિલો બોક્સિંગ કેટેગરીની ફાઈનલમાં તેણે ચીનની બાઓ ઝિયીને 5-0થી હરાવીને ગોલ્ડ મેડલ જીત્યો હતો. આ કેટેગરીમાં એશિયન ગેમ્સમાં ભારતનો આ પહેલો ગોલ્ડ મેડલ હતો.
યુવા ખેલાડીઓને લવલિનાની ખાસ સલાહ
પોતાના સન્માન દરમિયાન લવલિનાએ આસામના લોકોનો પ્રેમ અને સ્વાગત બદલ આભાર માન્યો. તેણે કહ્યું કે તે ભવિષ્યમાં પણ વધુ મેડલ જીતવા માટે મહેનત કરતી રહેશે. સાથે જ યુવા ખેલાડીઓને પણ મહેનત કરવાની અને આસામ તથા દેશનું નામ રોશન કરવાની અપીલ કરી. લવલિનાએ કહ્યું કે દરેક યુવા ખેલાડી પણ લોકોનો આવો જ પ્રેમ મેળવી શકે છે, પરંતુ તેના માટે સતત મહેનત કરવી જરૂરી છે.
75 વર્ષની ઉંમરે નાના પાટેકરનું નિધન
નાના પાટેકરનું ગુરુવારે ગોવામાં 75 વર્ષની ઉંમરે નિધન થયું. તેમને ગંભીર કાર્ડિયાક અરેસ્ટ આવ્યા બાદ હોસ્પિટલ લઈ જવામાં આવ્યા હતા. ડોક્ટરોએ લગભગ 45 મિનિટ સુધી તેમને બચાવવાનો પ્રયાસ કર્યો હતો, પરંતુ તેમને બચાવી શકાયા નહોતા.
આ પણ વાંચો: Asian Para Games 2026 : 20% કમિશનથી સિલેક્શન સુધી ભ્રષ્ટાચાર, પેરા શૂટર્સે કરી તપાસની માંગ
