ભારતીય મહિલા હોકી ટીમે શાનદાર રમતનું પ્રદર્શન કરીને જુનિયર એશિયા કપનો ખિતાબ સતત ત્રીજી વખત પોતાના નામે કર્યો છે. રવિવારે રમાયેલી ફાઈનલમાં ભારતે યજમાન ચીનને 1-0થી હરાવીને ટ્રોફી પર કબજો જમાવ્યો. આ જીત સાથે ભારતીય ટીમે FIH જુનિયર વર્લ્ડ કપ માટે પણ સ્થાન મેળવી લીધું છે.ભારતની જીતમાં સાનિકા ચંદ્રકાંત માણેનું મહત્વનું યોગદાન રહ્યું હતું. તેણે મેચની 17મી મિનિટે શાનદાર ગોલ કરીને ભારતને 1-0ની સરસાઈ અપાવી હતી. આ એકમાત્ર ગોલ અંત સુધી નિર્ણાયક સાબિત થયો અને ભારતીય ટીમે ખિતાબ પોતાના નામે કર્યો.
સાનિકાનો ગોલ બન્યો જીતનો આધાર
ભારત અને ચીન વચ્ચેની ફાઈનલની શરૂઆતથી જ બંને ટીમો વચ્ચે જોરદાર ટક્કર જોવા મળી હતી. પ્રથમ ક્વાર્ટરમાં બંને ટીમોએ ગોલ માટે અનેક પ્રયાસો કર્યા, પરંતુ કોઈ ટીમને સફળતા મળી નહોતી.ત્યારબાદ 17મી મિનિટે ભારતને પેનલ્ટી કોર્નર સહિતના પ્રયાસો બાદ સફળતા મળી અને સાનિકાએ બોલને ગોલમાં પહોંચાડીને ટીમને 1-0થી આગળ કરી દીધી. ભારતીય ટીમે ત્યારબાદ ચીનને વાપસી કરવાની તક આપી નહોતી અને હાફટાઈમ સુધી પોતાની સરસાઈ જાળવી રાખી હતી.બીજા હાફમાં ચીનની ટીમે બરાબરીનો ગોલ કરવા માટે આક્રમક રમત અપનાવી હતી. જોકે ભારતીય ખેલાડીઓએ મજબૂત રક્ષણ સાથે ચીનના પ્રયાસોને નિષ્ફળ બનાવ્યા. અંતિમ સીટી વાગી ત્યારે ભારત 1-0થી આગળ હતું અને તેની સાથે જ ટીમે સતત ત્રીજી વખત જુનિયર એશિયા કપનો ખિતાબ જીતી લીધો.