ભારતમાં રમતગમત ક્ષેત્રે સ્વચ્છતા લાવવા અને વર્ષ 2036માં અમદાવાદ ખાતે ઓલિમ્પિક્સ ગેમ્સનું ભવ્ય આયોજન કરવાની દાવેદારીને વધુ મજબૂત કરવા માટે ભારત સરકારે એક ઐતિહાસિક અને આકરો નિર્ણય લીધો છે. કેન્દ્રીય રમતગમત મંત્રી ડૉ. મનસુખ માંડવિયાએ દિલ્હી ખાતે આયોજિત યૂનેસ્કોના એન્ટી-ડોપિંગ સંમેલન દરમિયાન જાહેરાત કરી છે કે સરકાર નેશનલ એન્ટી-ડોપિંગ એક્ટમાં કડક સુધારો લાવી રહી છે. હવેથી ખેલાડીઓને પ્રતિબંધિત દવાઓ આપનારા કોચ, ડોક્ટરો અને સપ્લાય ચેઈનને ગુનેગાર માનીને તેમની સામે ફોજદારીકેસ દાખલ કરવામાં આવશે.
સપ્લાયર્સ અને કોચ સામે જેલની સજાની જોગવાઈ
અત્યાર સુધી જો કોઈ ખેલાડી ડોપ ટેસ્ટમાં પોઝિટિવ આવે, તો તેના પર બેન મૂકી દેવામાં આવતો હતો. પરંતુ તે દવાઓ કે ઇન્જેક્શન આપનાર મુખ્ય સૂત્રધારો સામે કોઈ ખાસ કાનૂની કારવાઈ કે જેલની જોગવાઈ નહોતી. હવે સંસદના આગામી સત્રમાં રજૂ થનારા આ નવા બિલ હેઠળ ખેલાડીઓને ગેરમાર્ગે દોરનારા સપ્લાયર્સ અને કોચિંગ સ્ટાફને 5 વર્ષ સુધીની જેલની સજા અને ભારે દંડની જોગવાઈ કરવામાં આવશે. આનાથી ડોપિંગ માફિયાઓમાં ભારે ફફડાટ વ્યાપી ગયો છે.
WADAની યાદીમાંથી કાળો ડાઘ ભૂંસવાના પ્રયાસો
છેલ્લા ત્રણ વર્ષથી વર્લ્ડ એન્ટી-ડોપિંગ એજન્સી (WADA)ની યાદીમાં ભારત ડોપિંગ ઉલ્લંઘનના મામલે ટોચના દેશોમાં સામેલ હતું. આ ખરાબ રેકોર્ડના કારણે ભારતીય રમતગમત ક્ષેત્રની આંતરરાષ્ટ્રીય સ્તરે બદનામી થઈ રહી હતી. સ્પોર્ટ્સ મિનિસ્ટરે સ્પષ્ટ કર્યું કે ભારત હંમેશાં "ઝીરો ટોલરન્સ"ની નીતિમાં વિશ્વાસ રાખે છે અને કોઈપણ ખેલાડીની સફળતા તેની મહેનતથી નક્કી થવી જોઈએ, નહીં કે પ્રતિબંધિત દવાઓથી. NADA દ્વારા 2025-26 દરમિયાન 7,000થી વધુ ટેસ્ટ કરવામાં આવ્યા છે અને જાગૃતિ વધારવા માટે 'Know Your Medicine' એપ્લિકેશન પણ લોન્ચ કરાઈ છે.
ઓલિમ્પિક્સ દાવેદારીને મળશે નવું બળ
વિશ્વના ક્રમિક રમતગમત સંગઠનો (જેવા કે આંતરરાષ્ટ્રીય ઓલિમ્પિક કમિટી - IOC) કોઈપણ દેશને ઓલિમ્પિક્સ જેવી મોટી ઈવેન્ટ સોંપતા પહેલાં ત્યાંના એન્ટી-ડોપિંગ નિયમોની કડકાઈ ખાસ ચકાસે છે. ભારત સરકાર દ્વારા ડોપિંગની સપ્લાય ચેઈનને ગુનો જાહેર કરવાના આ ક્રાંતિકારી પગલાથી આંતરરાષ્ટ્રીય સ્તરે દેશની ક્રેડિબિલિટી ખૂબ જ વધી જશે. આ સુધારો અમદાવાદ 2036 ઓલિમ્પિક બિડ માટે ગેમચેંજર સાબિત થશે.
આ પણ વાંચો: Kylian Mbappe: એક મજાક ભારે પડી, રાતોરાત છીનવાયા કરોડોના સ્પોન્સરશિપ કરાર!
